សម្តេចតេជោ ហ៊ុន សែន ប្រកាសឈរនៅជាមួយអ៊ុយក្រែន ប្រឆាំងនឹងការឈ្លានពានរបស់រុស្ស៊ី

សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅព្រឹកថ្ងៃចន្ទនេះ បានគូសបញ្ជាក់ច្បាស់ៗពីគោលជំហររបស់កម្ពុជាចំពោះសង្រ្គាមឈ្លានពានរបស់រុស្ស៊ីនៅក្នុងប្រទេសអ៊ុយក្រែន។ អ្វីជាការកត់សម្គាល់ គឺនៅថ្ងៃនេះ សម្តេចប្រមុខដឹកនាំកម្ពុជា បានអះអាងចំៗថា សម្តេចឈរនៅខាងអ៊ុយក្រែន និងរួមសាមគ្កីជាមួយប្រជាជនអ៊ុយក្រែន ដើម្បីប្រឆាំងនឹងការឈ្លានពានរបស់រុស្ស៊ី។

ពីវេទិកាសម្ពោធដាក់ឱ្យប្រើប្រាស់ជាផ្លូវការ អគារមជ្ឈ​មណ្ឌលត្រចៀក ច្រមុះ បំពង់ក នៃមនី្ទរពេទ្យព្រះអង្គឌួង នាព្រឹកថ្ងៃទី២៨ ខែមីនានេះ សម្តេចតេជោ ហ៊ុន សែន បានមានប្រសាសន៍ដូច្នេះថា៖ «ខ្ញុំនៅតែរក្សាជំហររបស់ខ្ញុំ ទោះបីមានសេចក្តីសម្រេចចិនប៉ុន្មានទៀតក៏ដោយ ខ្ញុំនៅតែឈរខាងអ៊ុយក្រែន សាមគ្គីជាមួយប្រជាជនអ៊ុយក្រែន ដើម្បីប្រឆាំងនឹងការឈ្លានពាន មិនថា ការឈ្លានពានចេញមកពីរុស្ស៊ីទេ ការឈ្លានពាននោះចេញមកពីអ្នកណាទៀត ក៏ខ្ញុំនៅតែថ្កោលទោសដូចគ្នា ខ្ញុំនៅតែប្រឆាំងដូចគ្នា នេះ គឺជាជំហរជាគោលការណ៍»។

ជាមួយគ្នានេះ សម្តេចតេជោ ហ៊ុន សែន សង្ឃឹមថា រុស្ស៉ី នឹងយល់ពីកម្ពុជា ព្រោះកម្ពុជាធ្លាប់ត្រូវបានគេឈ្លានពានពីអតីតកាល។ ដូច្នេះ កម្ពុជា មិនគាំទ្រការឈ្លានពាននោះឡើយ។ សម្តេចតេជោ បានមានប្រសាសន៍ថា ជម្រើសចុងក្រោយរបស់រុស្ស៉ី និងអ៊ុយក្រែន គឺមានបទចរចាមួយគត់ ដើម្បីបញ្ចប់សង្គ្រាម គឺមិនអាចយកសង្គ្រាម ទៅបញ្ចប់សង្គ្រាមបាននោះឡើយ៕

អត្ថបទពី៖ KPT