ការប្រឡងមន្ត្រីអគ្គលេខាធិការដ្ឋានក្រុមប្រឹក្សាអ្នកច្បាប់ ឈានដល់ការប្រឡងវិញ្ញាសា សរសេរលើកទី២

ក្រសួងមុខងារសាធារណៈ នៅថ្ងៃទី ២៥ ខែឧសភា ឆ្នាំ ២០២៥ បានបើកដំណើរការ ការប្រឡង​ជ្រើសរើស មន្ត្រីអគ្គលេខាធិការដ្ឋានក្រុមប្រឹក្សាអ្នកច្បាប់ លើវិញ្ញាសាសរសេរលើកទី ២។ ការប្រឡងវិញ្ញាសាសរសេរលើកទី ២នេះ មានបេក្ខជនចូលរួមសរុប ៤១ នាក់។ ការប្រឡងនេះ ក៏ជាការប្រឡងចុងក្រោយ ដែលគោលដៅជ្រើសរើសមន្ត្រីចំនួន ១៥នាក់ប៉ុណ្ណោះ។

ការប្រឡងជ្រើសរើសមន្ត្រីអគ្គលេខាធិការដ្ឋានក្រុមប្រឹក្សាអ្នកច្បាប់ នៃក្របខណ្ឌទីស្ដីការ​គណៈរដ្ឋមន្ត្រី ​បានឈានមកដល់ការប្រឡងលើវិញ្ញាសាសរសេរលើកទី ២ ដែលជាការប្រឡង​សម្រេចចុងក្រោយ។ ការប្រឡងនេះ ជាប្រភេទវិញ្ញាសាអធិប្បាយ ចែកជា ២វគ្គ ដោយវគ្គទី១ ផ្តោតលើជំនាញ/ឯកទេស រួមមាន នីតិសាធារណៈ, នីតិឯកជន និងនីតិអន្តរជាតិ រីឯវគ្គទី២ ផ្តោតលើចំណេះដឹងទូទៅ។

ការប្រឡងនេះ ក៏ដូចជាការប្រឡងកន្លងទៅ ដោយគោរពតាម និយាមនីតិវិធីប្រតិបត្តិ​ក្នុងការប្រឡងជ្រើសរើសមន្ត្រីរាជការស៊ីវិល ការតាក់តែងវិញ្ញាសា ត្រូវបានធ្វើឡើងភ្លាមៗ នៅព្រឹកថ្ងៃប្រឡង។ ការតាក់តែងវិញ្ញាសា គឺមានសាស្ត្រាចារ្យ ១២រូប មកពីសាកលវិទ្យាល័យ​ផ្សេងៗ និងស្ថាប័នពាក់ព័ន្ធ។

ក្នុងដំណាក់កាល តាក់តែងវិញ្ញាសានេះដែរ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួង​មុខងារសាធារណៈ ក៏បានអញ្ជើញត្រួតពិនិត្យ តាមដានការតាក់តែងវិញ្ញាសា និងជ្រើសរើស​ប្រធានវិញ្ញាសា សម្រាប់ការប្រឡងប្រជែងជ្រើសរើសមន្ត្រីច្បាប់ ឱ្យចូលបម្រើ​ការងារនៅ​អគ្គលេខាធិការដ្ឋានក្រុមប្រឹក្សាអ្នកច្បាប់ ក្នុងក្របខណ្ឌ​ទីស្តីការគណៈរដ្ឋមន្ត្រី។ ឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការ​រៀបចំការប្រឡងប្រជែង តែងតែជាអ្នកជ្រើសរើសប្រធានវិញ្ញាសា សម្រាប់ការប្រឡង​ប្រជែងនីមួយៗ។

សាស្ត្រាចារ្យ ត្រូវតាក់តែងវិញ្ញាសាអធិប្បាយនីមួយៗ ឱ្យបាន ៣ជម្រើស ដើម្បីដាក់ជូនឯកឧត្តមឧបនាយករដ្ឋមន្ត្រី ជ្រើសរើសយក ១ជម្រើស ឬសម្រេចជម្រើសទី៤ ដោយយកសំណួរពីជម្រើសទាំង៣ មកបញ្ចូលគ្នា ដោយសម្ងាត់ មានសុក្រឹត្យភាព និងមានតម្លាភាព។

រាល់ដំណើរការ ចាប់រាប់ពីការតាក់តែងវិញ្ញាសា ការអនុញ្ញាតឱ្យបេក្ខជនចូលមណ្ឌលប្រឡង ការប្រឡង ការធ្វើកំណែ រហូតដល់ការប្រកាសលទ្ធផលជាផ្លូវការ តែងមានវត្តមាន ពីមន្ត្រីអង្គភាពប្រឆាំងអំពើពុករលួយ អនុគណៈកម្មការត្រួតពិនិត្យ និងវាយតម្លៃ នៃគណៈកម្មការរៀបចំការប្រឡងប្រជែង វត្តមានអ្នកសង្កេតការណ៍ស្ម័គ្រចិត្ត មកពីសាកលវិទ្យាល័យផ្សេងៗ អ្នកស្ម័គ្រចិត្តមកពីសហភាពសហព័ន្ធយុវជនកម្ពុជា និងអ្នកស្ម័គ្រចិត្តជាមហាជនផងដែរ។ អត្ថបទ៖គឹមហុក