សហគ្រិនក្នុងស្រុកកំពុងស្រូបយកផលិតផលពីវិស័យកសិកម្មកែច្នៃ ដើម្បីគាំទ្រ​ដល់​ទីផ្សារ​ក្នុង​ស្រុក

សហគ្រិនក្នុងស្រុកបានកំពុងចូលរួមចំណែកកែលម្អខ្សែច្រវាក់ផលិតកម្ម ពង្រីងគុណភាព និង​ពង្រីក​ទីផ្សារ និងបានកំពុងទាញយកផលប្រយោជន៍ពីវិស័យសក្តានុពលផ្សេងៗ ជាពិសេស​ការ​ស្រូប​យក​ផលិតផលក្នុងវិស័យកសិកម្មយកកកែច្នៃចេញជាផលិតផលសម្រេចផ្សេងៗ គាំទ្រ​ដល់​ទីផ្សារ​ក្នុ​ងស្រុក។

រាជរដ្ឋាភិបាលនីតិកាលទី៧នៃរដ្ឋសភា បាននិងកំពុងបន្តអភិវឌ្ឍវិស័យឯកជន ក្នុង​នោះស​ម្រាប់​សហគ្រាស​ក្នុង​ស្រុក បាននឹងកំពុងបន្តពង្រឹងសហគ្រិនភាព និងការអភិឌ្ឍធុរកិច្ច​តាមរយៈ​ផ្សេង​ៗ​រួម​មាន៖​យន្តការ, កម្មវិធី, គម្រោង និងគំនិតផ្តួចផ្តើមនានា សហការជាមួយដៃគូអភិវឌ្ឍ និង​វិស័យ​ឯកជន ដើម្បីកែលម្អខ្សែច្រវាក់ផលិតកម្ម ពង្រឹងគុណភាព និងពង្រីកទីផ្សារព្រមទាំងការ ត​ភ្ជាប់ ​និងទាញយកផលប្រយោជន៍ពីសក្តានុពលសហគ្រាស និងការវិនិយោគធំៗ។

ឯកឧត្តម សួន ម៉ិ ប្រធានសមាគមសហគ្រិនវីម៉ូនៅកម្ពុជា លើកឡើងថា ដោយសារ​ការ​យក​ចិត្ត​ទុក​ដាក់ ការផ្តល់កញ្ចប់ថវិកា គាំទ្រ និងការជំរុញ​ពង្រឹង​សមត្ថភាព​វិស័យ​ជនរ​បស់​រាជ​រដ្ឋាភិបាល​មក​ដល់​បច្ចុប្បន្ន​ឃើញថា សហគ្រិនក្នុងស្រុកបានកំពុងមានសម្ទុះ រីកចម្រើនគួរកត់​សម្គាល់​ដោយ​បាន​បង្កើត​នូវសំណាកផលិតផលនៅក្នុងអាជីវកម្មផ្សេងៗគ្នា គាំទ្រដល់ទីផ្សារ ជាពិសេ​ស​ការ​ផលិត និងកែច្នៃចេញជាផលិតផលសម្រេចផ្សេងៗដូចជា៖ ភេសជ្ជៈ ចំណីអាហារវេចខ្ចប់ និង​កសិផល​ស្រស់ៗជាច្រើន បាននឹងកំពុងដាក់ លក់លើទីផ្សារ, នេះជាការ​គាំទ្រ​ដល់​កសិករ​ដែល​ជា​អ្ន​ក​ដាំដុះ និងការស្រូបកំលាំងពលកម្មជាដើម។

ចំណែក ឯកឧត្តម តាំង សុខឃី ប្រធានក្រុមប្រឹក្សាភិបាលនៃក្រុមហ៊ុន ឃី ចិន្តា ឌីវេឡុបម៉ិន ឯ.ក និង​ជា​ម្ចាស់កសិកដ្ឋានក្នុង ស្រុក លើកឡើងថា ផលិតកម្មក្នុងវិស័យកសិកម្មនៅកម្ពុជា បាន​កំពុង​ដើរ​ឆ្ពោះ​ទៅ​មុខរួចហើយ នៅឡើយតែការកែច្នៃមិនទាន់បានកើត ឡើងផុលផុសនោះទេ ក្នុងនោះ​សម្រាប់​ម្ចាស់​សហគ្រាសធុនតូច និងមធ្យម ត្រូវបង្កើនការ​ផលិត​ឱ្យ​បាន​ច្រើន​ជា​ផលិត​ផល​ដែល​មាន​ស្តង់ដារ, ប្រសិនផលិតផលយើងមានគុណភាព មិនត្រឹមឆ្លើយតបទីផ្សារក្នុងស្រុកប៉ុណ្ណោះទេ ប៉ុន្ដែ​បានជំរុញដល់ការនាំចេញផងដែរ។

ឯកឧត្តមលើកឡើងបន្ថែមថា វិស័យកសិកម្ម គឺជាវិស័យមួយគាំទ្រដល់សេដ្ឋកិច្ច និងជីវភាព​រស់​នៅ​របស់​ប្រជាពលរដ្ឋ បញ្ហានេះ កសិករគួរយកចិត្តទុកដាក់លើការដាំដុះ ចំណែក​បង​ប្អូន​ដែល​ចំណា​ក​ស្រុក, គួរវិលត្រឡប់មកស្រុកកំណើនវិញរួមគ្នាបង្កើតមុខរបរ ក្នុងវិស័យកសិកម្ម ដើម្បី​ចូល​រួម​លើកកម្ពស់វិស័យកសិកម្មទាំងអស់គ្នា ក្នុងនោះប្រសិនបងប្អូនត្រូវការជំនាញបន្ថែម កសិ​ដ្ឋាន​​របស់ឯកឧត្តមផ្ទាល់នឹងស្វាគមន៍ដល់បងប្អូន ក្នុងការជួយបណ្តុះបណ្តាលជំនាញ ដើម្បី​យក​ទៅ​អនុវត្តនៅក្នុងផលិតកម្មរបស់ខ្លួន។

សូមបញ្ជាក់ វិស័យកសិកម្មកម្ពុជានៅក្នុងឆ្នាំ២០២៥នេះ រាជរដ្ឋាភិបាលព្យាករថានឹងកើនឡើង ១,១​% ដោយរំពឹងទុកនូវកំណើនល្អនៃអនុវិស័យដំណាំ និងចិញ្ចឹមសត្វ និងការងើប​ឡើង​សន្សឹម​ៗ​នៃ​អនុ​វិស័យនេសាទ។ អនុវិស័យដំណាំ ត្រូវបានរំពឹងថានឹងមានកំណើនល្អ ដោយសារ​ការ​កើន​ឡើង​នៃ​ការវិនិយោគទាំងក្នុង និងក្រៅស្រុកនៅលើការកែច្នៃផលិតផលសិកម្ម ការកើនឡើង​នៃ​វិនិយោគ​សាធារណៈ និងការអន្តរាគមន៍របស់រាជរដ្ឋាភិបាល។ ចំណែកអនុវិស័យ​ចិញ្ចឹម​សត្វ​ក៏​ត្រូវ​បាន​ព្យាករ​ងើបឡើងសន្សឹមៗដោយសារការអន្តរាគមន៍ របស់រាជរដ្ឋាភិបាលលើការនាំសាច់បង្កក ដែល​នឹង​លើកទឹកចិត្តដល់សហគ្រាសក្នុងស្រុក៕ អត្ថបទ៖ សុន រ៉ាឌី