កម្មវិធីបណ្តុះបណ្តាលជំនាញ ១,៥លាននាក់ ពលរដ្ឋអាចរកប្រាក់​ចំណូល​ជា​មធ្យម​ចាប់​ពី​មួយ​លាន​រៀល​ឡើង​ទៅក្នុងមួយខែ

វិទ្យាស្ថានបណ្តុះបណ្តាលនៅរាជធានីភ្នំពេញ បានឱ្យដឹងថា កម្មវិធីបណ្តុះបណ្តាលបច្ចេកទេស និង​វិជ្ជាជីវៈ ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ (TVET 1.5M) របស់​រាជ​រដ្ឋាភិបាល​កម្ពុជា សិក្ខាកាមដែលរៀនចប់ និងមានការធ្វើ ទទួលបានប្រាក់​បៀវត្ស​ជាមធ្យមចន្លោះ ២៥០ ទៅ៣៥០ដុល្លារ ក្នុងមួយខែៗ។

លោក សយ សុឃាង នាយករង នៃវិទ្យាស្ថានបច្ចេកទេសឧស្សាហកម្ម ហៅកាត់ ITI បាន​មាន​ប្រសាសន៍​ប្រាប់ព័ត៌មាន ប៊ីធីវី ឱ្យដឹងថា កម្មវិធី ១,៥លាននាក់នេះ បានដើរតួនាទីយ៉ាង​សំខាន់​ក្នុង​ការជំរុញ​អ្នក​ប្រកបរបរសេដ្ឋកិច្ចក្រៅប្រព័ន្ធឱ្យចូលទៅក្នុងប្រព័ន្ធកាន់តែច្រើនឡើង ដែល​ស្រប​តាម​យុទ្ធ​សាស្រ្តជាតិរបស់រាជរដ្ឋាភិបាលកម្ពុជា។

លោកនាយករង បានរៀបរាប់ឱ្យដឹងទៀតថា រហូតមកដល់ពេលនេះ តាមរយៈកម្មវិធី ១,៥​លាន​នាក់ ​និយាយចំពោះតែសិស្សក្នុងវិទ្យាស្ថាន ITI គឺទទួលបាន​ការ​ចាប់​អារម្មណ៍​យ៉ាង​ច្រើន​ពី​សំណាក់​យុវជន​ ជាពិសេសយុវជនមកពីគ្រួសារក្រីក្រ ដែលគិតមកដល់បច្ចុប្បន្ននេះ វិទ្យាស្ថាន​ទទួល​បាន​សិស្ស​រៀន​ជំនា​ញខុសៗគ្នាចំនួនប្រមាណជិត ២ពាន់នាក់ ក្នុងនោះកំពុងបណ្តុះ​បណ្តាល​មាន​ចំនួន​ជាង ៦០០នាក់។ ដោយឡែកសិស្សដែលបញ្ចប់ការសិក្សាមានចំនួនជាង ១ពាន់នាក់។ លោកបានបញ្ជាក់ថា អ្នកដែលទទួល​ការងារ​ធ្វើ​ក្រោយប​ញ្ចប់​ការ​សិក្សាមាន​ប្រមាណ​ ៨៨% ដោយទទួលបានប្រាក់បៀវត្សរ៍ជាមធ្យមចន្លោះ ២៥០ ទៅ៣៥០ដុល្លារ។ ក្នុងនោះ ក៏មានអ្នកបើកអាជីវកម្មដោយខ្លួនឯងផងដែរ ដូចជា ការផ្តល់​សេវា​ថែ​ទាំ​ជួស​ជុល​រថយន្ត​ចល័ត ដែលគាត់អាចរកចំណូលបានក្នុងមួយខែៗខ្ទង់ប្រហែល ៧០០ ទៅ៨០០ដុល្លារ។

លោក រស់ សិលា ពលរដ្ឋមកពីស្រុកស្ទឹងត្រង់ ខេត្តកំពង់ចាម បច្ចុប្បន្នជាសិស្សធីវ៉េត ១,៥​លាន​នាក់ ​សិក្សាជំនាញផ្នែកបរិក្ខាត្រជាក់នៅក្នុងវិទ្យាស្ថានបច្ចេកទេសឧស្សាហកម្ម បាននិយាយប្រាប់ ប៊ីធីវី ឱ្យដឹងថា ការសិក្សាជំនាញវិជ្ជាជីវៈ គឺមានភាពងាយស្រួលក្នុងការសិក្សា ពីព្រោះកម្ម​វិធីមួ​យ​នេះ​មាន​ជំនាញ​ជាច្រើនដែលអាចជ្រើសរើសដើម្បីសិក្សាបាន ជាពិសេសមានជំនាញ​ដែល​អាច​ឱ្យ​ពលរដ្ឋ​ដែល​មាន​វ័យ​ច្រើន​អាច​ចូលរៀនបាន។

លោក ពៅ ចិត្រា មកពីស្រុកកំពង់ត្របែក ខេត្តព្រៃវែង កំពុងរៀនជំនាញដូចគ្នាខាងលើនេះ បាន​ឱ្យ​ដឹង​ថា ​ក្រោយចប់ការសិក្សានេះ លោកនឹងចេញទៅធ្វើការងារដើម្បីមានបទពិសោធន៍សិន មុន​នឹង​សម្រេច​បន្តបង្កើតអាជីវកម្មផ្ទាល់ខ្លួនលើជំនាញដែលបានសិក្សាសព្វថ្ងៃនៅស្រុកកំណើត។

យុវជន​ទាំង​ពីរ​ខាង​លើ​នេះ ក៏បានលើកទឹកចិត្តទៅដល់ប្រជាពលរដ្ឋទាំងអស់ ជាពិសេស​ពលរដ្ឋ​ដែល​ត្រឡប់​មកពីប្រទេសថៃ ងាកមកចាប់ឱកាសក្នុង​ការ​សិក្សា​ជំនាញ​វិជ្ជា​ជីវៈ​ណាមួ​យដែ​ល​ខ្លួន​ពេញ​ចិត្ត​ ដើម្បីមានលទ្ធភាពក្នុងការបង្កើត និងបង្កើនមុខរបរថ្មីនាពេលអនាគត។

ដើម្បីឱ្យកម្មវិធីបណ្តុះបណ្តាលលបច្ចេកទេស និងវិជ្ជាជីវៈ ដល់យុវជនមកពីគ្រួសារក្រីក្រ និង​គ្រួសារ​ងាយរងហានិភ័យ (TVET 1.5M) ដោយឥតគិតថ្លៃនេះ កាន់តែងាយស្រួល និង​ទូលំ​ទូលាយ​ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានកំណត់​ឱ្យ​សាលា​បណ្តុះ​បណ្តាល​បច្ចេកទេសទាំងអស់ត្រូវតែមានកម្មវិធីបត់បែន ទន់ភ្លន់ និងច្រើនជម្រើស ដែល​អាច​បណ្តុះ​បណ្តាល​នៅវេនយប់ និងវេនថ្ងៃសៅរ៍-អាទិត្យ ដើម្បីបង្កើតឱកាស​យ៉ាង​ទូលាយ​សម្រា​ប់​យុវជ​ន​ក្រុមគោលដៅអាចមកសិក្សាវគ្គបណ្តុះបណ្តាលដ៏សំខាន់នេះ។ សូមបញ្ជាក់ជូនទៀតថា វិស័យ​សម្រាប់បណ្តុះបណ្តាលជំនាញនេះ មានចំនួន១០វិស័យ មានដូចជា៖ សំណង់, អគ្គិសនី​ និង​ថាមពល, អេឡិចត្រូនិក, បរិក្ខារត្រជាក់និងកម្តៅ, កម្មន្តសាល, មេកានិកទូទៅ/​មេកានិច​រថយន្ត​, ទេសចរណ៍, សេវាកម្ម, កសិកម្មនិងកសិ-ឧស្សាហកម្ម និងធុរកិច្ចនិងព័ត៌មានវិទ្យា៕ អត្ថបទ៖ ឈិត បូរ៉ាវី