ពលរដ្ឋខ្មែរនៅថៃប្រមាណ២០០នាក់ក្នុងមួយថ្ងៃ បានបន្ត​វិលត្រឡប់​មកកម្ពុជា​វិញ​ដោយសារ​ឱកាស​ការងារ​សម្បូរបែបជាងមុន

អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា គិតចាប់​ពី​បញ្ហា​ជម្លោះ​ព្រំដែន​កម្ពុជា​-ថៃ រហូតមកដល់ពេលនេះ នៅតែមានប្រជាពលរដ្ឋខ្មែរនៅថៃ បានបន្ត​វិល​ត្រឡប់​ចូល​មក​ស្រុក​កំណើត​ដើម​វិញ ជាមធ្យមចំនួន២០០នាក់ ក្នុងមួយថ្ងៃ ដោយសារការ​មើល​ឃើញ​ឱកា​ស​ការងារជាច្រើនកន្លែងបានកំពុងប្រកាសតម្រូវការកម្លាំងពលកម្ម។

លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២២ ខែតុលា ឆ្នាំ​២០២៥កន្លងទៅ បាន​ប្រាប់ព័ត៌មាន ប៊ីធីវី ឱ្យដឹងថា គិតមកដល់ពេលនេះ ប្រជាពលរដ្ឋខ្មែរ​ដែល​បាន​ចាក​ចេញ​ពី​ប្រទេសថៃ មានចំនួនសរុបប្រមាណជាង ៩៤ម៉ឺននាក់ ដើម្បី​វិលត្រឡប់​មក​ស្វែង​រក​ការងារ ក៏ដូចជាមករស់នៅក្នុងប្រទេសកម្ពុជាវិញ ក្នុងនោះប្រមាណ៦ម៉ឺននាក់ជាកុមារ និង​អ្នក​មាន​អាយុ​ចាប់ពី៤៥ឆ្នាំឡើងទៅ ចំនួន ២៥ម៉ឺននាក់។

អ្នកនាំពាក្យដដែលនេះ បានបន្តទៀតថា ដោយឡែក រហូតមកដល់ពេលនេះ ក៏​នៅ​តែ​មាន​ការ​វិល​ត្រឡប់​របស់​ប្រជាពលរដ្ឋខ្មែរមកពីថៃផងដែរ ដោយក្នុងមួយថ្ងៃមានចំនួនប្រមាណ២០០នាក់ ដើម្បី​មក​ធ្វើការងារនៅស្រុកកំណើតដើមវិញ ដោយសារការមើលឃើញរបស់ពួកគាត់ថា ប្រទេស​កម្ពុជា​មាន​ការងារសម្បូរបែបជាងមុន ជាក់ស្តែងមកដល់ពេលនេះការងារនៅសល់ប្រមាណជាង ៨ម៉ឺន​កន្លែង ដើម្បីផ្តល់ឱកាសការងារនៅក្នុងវិស័យឧស្សាហកម្ម កសិកម្ម និងទេសចរណ៍។ លោកបន្តថា បន្ថែមពីនេះ ដោយសារកា​រ​មើល​ឃើញ​អំពីអត្ថ​ប្រយោជ​ន៍​ជាច្រើ​ន​ផ្សេង​ៗ​ទៀត​ក្រៅ​ពី​ប្រាក់​ឈ្នួល នៅពេលដែលធ្វើការនៅក្នុងប្រព័ន្ធនៅកម្ពុជា ពួកគាត់នឹងទទួល​បាន​របប​ផ្នែក​ថែទាំ​សុខ​ភាព ​របបហានិភ័យការងារ និងរបបប្រាក់សោធន (ប្រាក់រឺត្រែត) ជាដើម ដែលចំណុច​ទាំង​អស់​នេះ​នៅ​ក្រៅប្រទេសគឺមិនមាននោះទេ។

លោក ស៊ុន មេសា បានអំពាវនាវដល់ប្រជាពលរដ្ឋ ពិសេសពលករមកពីថៃ ដែលមិន​ទាន់​មាន​ការងារ​ធ្វើ​អាចទៅចូលរួមពិព័រណ៍ការងារ និងផលិតភាពជាតិ ដែលនឹងប្រព្រឹត្តទៅ នាថ្ងៃទី១ និង​ទី២ ខែវិច្ឆិកា ឆ្នាំ២០២៥ខាងមុខផងដែរ នៅមជ្ឈមណ្ឌលសន្និបាត និងពិព័រណ៍កោះពេជ្រ ពី​ព្រោះ​ថា ព្រឹត្តិការណ៍នេះមានការចូលរួមពីសំណាក់ក្រុមហ៊ុន សហគ្រាស ក្រសួង ស្ថាប័ន និង​គ្រឹះ​ស្ថាន​អប់រំ​បណ្តុះបណ្តាលប្រមាណ១៥០ ដែលនឹងដាក់តាំងបង្ហាញអំពីឱកាសការងារចំនួនជាង ៣​ម៉ឺន​កន្លែង ជាពិសេសបានជួបជាមួយតំណាងក្រុមហ៊ុន សហគ្រាស និងសម្ភាសន៍​ការងារ​ភ្លាមៗ​តែ​ម្តង​នៅក្នុងព្រឹត្តការណ៍នោះ៕ អត្ថបទ៖ ឈិត បូរ៉ាវី