លេខាធិការគណៈកម្មការកិច្ចការបរទេសរដ្ឋសភាចូលរួមកិច្ចប្រជុំពាក់ព័ន្ធចំនួនបីក្នុងមហាសន្និបាតសហភាពអន្តរសភា IPU លើកទី១៥១ នៅក្រុងហ្សឺណែវ

ឯកឧត្តម ទី សុគន្ធ លេខាធិការគណៈកម្មការកិច្ចការបរទេស សហប្រតិបត្តិការអន្តរជាតិ និង​ព័ត៌មាន​នៃ​រដ្ឋសភា នៅព្រឹកថ្ងៃទី២២ ខែតុលា ឆ្នាំ២០២៥ បានអញ្ជើញចូលរួម កិច្ចប្រជុំ​គណៈ​កម្មាធិការ​អចិន្ត្រៃយ៍ស្ដីពីការអភិវឌ្ឍប្រកប​ដោយចីរភា​ព​នៃមហាសន្និបាត​សហភាព​អន្តរសភា​លើក​ទី១៥១ (151st IPU Assembly) នាទីក្រុងហ្សឺណែវ ប្រទេសស្វីស។

ឯកឧត្តម បានធ្វើបទអន្តរាគមន៍ ២ លើក ក្នុងប្រធានបទទី១ អំពី”ផល​ប៉ះពាល់​នៃ​ការ​កើន​កំដៅ​លើផែ​ន​ដី៖ ការអំពាវនាវរបស់សភាដើម្បីការពារជនងាយរងគ្រោះ”។

ក្នុងបទអន្តរាគមន៍នោះ ឯកឧត្តម ទី សុគន្ធ បានបញ្ជាក់ថា កម្ពុជាស្ថិត​នៅ​ជួរ​មុខ​នៃការប្រែប្រួលអាកាសធាតុ ហើយសភាកម្ពុជាទទួលស្គាល់តួនាទីដ៏សំខាន់ក្នុងការជំរុញនូវយុត្តិធម៌អាកាសធាតុ និងការពារសិទ្ធិប្រជាពលរដ្ឋដែលងាយរងគ្រោះ។ សកម្មភាពសភារបស់យើងរួមមាន ការរួមបញ្ចូលភាពធន់នឹងអាកាសធាតុទៅក្នុងច្បាប់របស់ប្រទេស ការគាំទ្រនូវការធ្វើបច្ចុប្បន្នភាពរបស់កម្ពុជាក្រោមកិច្ចព្រមព្រៀងទីក្រុងប៉ារីស ដើម្បីសម្រេចបានគោលបំណងអព្យាក្រឹតកាបូននៅឆ្នាំ២០៥០ រៀបចំយន្តការហិរញ្ញប្បទានអាកាសធាតុ និងធានាឱ្យមានការចូលរួមពីសាធារណជន។

ចំណែកនៅក្នុងបទអន្តរាគមន៍មួយទៀត របស់ ឯកឧត្តម ទី សុគន្ធ គឺនៅក្នុងកិច្ចប្រជុំ ស្តីពីការត្រៀមរៀបចំកិច្ចប្រជុំសភានៅ COP30 – ប្រេស៊ីល នាពេលខាងមុខ។ កិច្ចប្រជុំនេះ បានសង្កត់ធ្ងន់លើការផ្តល់អាទិភាពដល់សំឡេងរបស់ប្រទេសដែលងាយរងគ្រោះ និងមានការអភិវឌ្ឍតិចតួច (LDCs) ។ កិច្ចប្រជុំបានអំពាវនាវឱ្យមានយន្តការហិរញ្ញវត្ថុអាកាសធាតុរឹងមាំជាងមុន ការលើកឡើងពីតួនាទីរបស់សភាក្នុងការត្រួតពិនិត្យការរួមចំណែករបស់ (NDCs) និងលើកទឹកចិត្តឱ្យមានការផ្លាស់ប្តូរទស្សនៈរវាងយុវជន និងសង្គមស៊ីវិលជាដើម។

នៅរសៀលថ្ងៃដដែល ឯកឧត្តម លេខាធិការគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាននៃរដ្ឋសភា ក៏បានចូលរួមពិនិត្យក្នុងការបោះឆ្នោតនៅក្នុងកិច្ចប្រជុំគណៈកម្មាធិការអចិន្ត្រៃយ៍ស្ដីពីលិទ្ធប្រជាធិបតេយ្យ និងសិទ្ធមនុស្ស នៃមហាសន្និបាតសហភាពអន្តរសភាលើកទី១៥១ (151st IPU Assembly)ផងដែរ៕