ឯកឧត្តម ហ៊ុន ម៉ានី៖ ការជ្រើសរើសគ្រូផ្អែកលើកិច្ចព្រមព្រៀងការងារ គឺដើម្បី​បញ្ចប់​ការ​បង្រៀន​ផ្គួប​ថ្នាក់​មាន​សិស្សច្រើនហួសកំណត់

ក្រសួងមុខងារសាធារណៈ នៅថ្ងៃទី ២៥ ខែតុលា ឆ្នាំ ២០២៥នេះ បានរៀប​ចំ​ការ​ប្រឡង​ជ្រើស​រើស​គ្រូ​បង្រៀន​ផ្អែក​លើកិច្ចព្រមព្រៀងការងារ ជាលើកដំបូងសម្រាប់វិស័យអប់រំ។ ការ​ជ្រើស​រើស​គ្រូ​បង្រៀន​ផ្អែក​លើ​កិច្ច​ព្រម​ព្រៀងការងារនេះ មានគោលដៅសំខាន់បំផុត គឺឈានទៅបញ្ចប់​ការ​បង្រៀន​ផ្គួប​ថ្នា​ក់ ដែលមានសិស្សច្រើនហួសកំណត់ពិបាកក្នុងការសិក្សា និង​ដើម្បី​ជួយ​សម្រួល​ភាព​នឿយ​ហត់​ គ្រូបង្រៀនមួយចំនួនដែលត្រូវបង្រៀនពីរវេន​ព្រោះតែខ្វះគ្រូ។

បេក្ខជនសរុបចំនួន ៨,៨៩៥នាក់ (ស្រី ៦,១៩៥នាក់) បានចូលរួមប្រឡងប្រជែងដើម្បី ក្លាយ​ជា​គ្រូ​បង្រៀន​ផ្អែកលើកិច្ចព្រមព្រៀងការងារនៅសាលាបឋមសិក្សា ក្នុងភូមិសាស្ត្រ ខេត្តព្រៃវែង ខេត្ត​ត្បូង​ឃ្មុំ ខេត្តកំពង់ចាម ខេត្តបាត់ដំបង និងខេត្តតាកែវ។ ការប្រឡងនេះ ជ្រើសរើសត្រឹមតែ ៣២១២កន្លែង​ប៉ុណ្ណោះ។

ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានលើក​ឡើង​ថា​ការ​ប្រឡង​ជ្រើស​រើស គ្រូបង្រៀនផ្អែកលើកិច្ចព្រមព្រៀងការងារនេះ គឺដើម្បី​ដោះស្រាយ​បញ្ហា​នៅ​តាម​សាលា​រៀន ពិសេសផ្តោតលើការបង្រៀនផ្គួបថ្នាក់ ដែលមានសិស្សច្រើនហួសកំណត់ក្នុងមួយថ្នាក់ និង​ជា​ការ​ដោះស្រាយ​ទៅ​លើការ​បង្រៀន​រហូត​ដល់​ពីរវេន​សម្រាប់​គ្រូ​បង្រៀន​នៅ​តាម​សាលា​រៀន​មួយ​ចំនួន​។

ឯកឧត្តមបញ្ជាក់ថា បេក្ខជនដែលប្រឡងជាប់ នឹងទៅជួយសម្រួលលើការងារទាំងនេះ ដែល​ផ្ដល់​ជា​ផល​ជះវិជ្ជមានសម្រាប់សិស្សក្នុងការក្រេបយកចំណេះដឹង ក៏ដូចជា​ជួយ​កាត់​បន្ថយ​ភាព​នឿយ​ហត់ ​របស់គ្រូបង្រៀនមួយចំនួន ដែលត្រូវបង្រៀនពីរវេនដោយសារការខ្វះគ្រូ។ បេក្ខជន​ដែល​ប្រឡង​ជាប់ ​ត្រូវបំពេញការងារភ្លាមៗ ចាប់ពីបវេសនកាលឆ្នាំសិក្សាថ្មី ពីថ្ងៃទី១ ខែវិច្ឆិកា ខាង​មុខ​។

គួរបញ្ជាក់ថា ការប្រឡងរៀបចំឡើងលើ ៣មណ្ឌលប្រឡងផ្សេងគ្នា គឺនៅវិទ្យាស្ថានជាតិអប់រំ នៅ​សាកល​វិទ្យា​ភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និងសាកលវិទ្យាល័យជាតិគ្រប់គ្រង ដោយ​ចាប់​ផ្ដើម​នៅ​ម៉ោង ១២៖ ៣០ នាទី និងបញ្ចប់នៅត្រឹមម៉ោង ៦៖០០ល្ងាច។

បេក្ខជន​ទាំង​អស់ ត្រូវឆ្លងកាត់វិញ្ញាសាប្រឡងចំនួន៣ រួមមាន៖ វិញ្ញាសាភាសាខ្មែរ រយៈពេល ១ម៉ោង វិញ្ញាសាគណិតវិទ្យា រយៈពេល ១ម៉ោង ៣០នាទី និងវិញ្ញាសាចំណេះដឹងទូទៅ និង​ភាសា​អង់​គ្លេស រយៈពេល ១ម៉ោង ៣០នាទី។ ដូចជាការប្រឡងកន្លងទៅផងដែរ ការបង្កើតវិញ្ញាសា ការ​បោះ​ពុម្ព​វិញ្ញាសាប្រឡង និងការប្រឡង ធ្វើឡើងថ្ងៃតែមួយ ដោយឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ ជាអ្នកជ្រើសរើសវិញ្ញាសា កាត់វិញ្ញាសាប្រឡង ក្រោម​ការ​ចូលរួមពីតំណាងក្រសួងអប់រំ មន្ត្រីអង្គភាពប្រឆាំងអំពើពុករលួយ អ្នក​សង្កេត​ការណ៍​ស្ម័គ្រ​ចិត្ត​ចូលរួមសង្កេតក្នុងដំណើរការប្រឡងផងដែរ៕ អត្ថបទ៖ គឹម ហុក