កម្ពុជារៀបចំស្តង់ពិព័រណ៍អំឡុងកិច្ចប្រជុំកំពូលពិភពលោកលើកទី២ សម្រាប់ការអភិវឌ្ឍសង្គម​រយៈពេល​៣០​ឆ្នាំចុងក្រោយ ជាមួយប្រតិភូបណ្តាប្រទេសសមាជិក UN និងអង្គការអន្តរជាតិ​ទូទាំងពិភពលោក

ទីក្រុងដូហា៖ នៅថ្ងៃទី៤ ខែវិច្ឆិកា ឆ្នាំ២០២៥ ក្រសួងអប់រំ យុវជន និងកីឡា ក្នុងនាមព្រះរាជាណាចក្រកម្ពុជា បានតាំងបង្ហាញ ស្តង់ពិព័រណ៍អំឡុងកិច្ចប្រជុំកំពូលពិភពលោកលើកទី២ សម្រាប់ការអភិវឌ្ឍសង្គម (Exhibition Booth during the Second World Summit for Social Development) នៅទីក្រុងដូហា ប្រទេសកាតា ដែលមានការចូលរួមពីស្តង់ពិព័រណ៍របស់បណ្តាប្រទេសសមាជិកអង្គការសហប្រជាជាតិ ស្តង់ពិព័រណ៍របស់អង្គការអន្តរជាតិទូទាំងពិភពលោក ដែលជាដៃគូសន្ទនា និងដៃគូពាក់ព័ន្ធ។

ស្តង់ពិព័រណ៍របស់កម្ពុជាអំឡុងកិច្ចប្រជុំកំពូលពិភពលោកលើកទី២នេះ បានបង្ហាញពីសមិទ្ធផល ការរីកចម្រើន និងការអភិវឌ្ឍសេដ្ឋកិច្ច នយោបាយ និងសង្គម-វប្បធម៌របស់កម្ពុជាក្នុងរយៈពេល៣០ឆ្នាំចុងក្រោយ ដោយផ្តោតលើការលុបបំបាត់ភាពក្រីក្រ, សមាហរណកម្មទីផ្សារការងារ, កិច្ចគាំពារសង្គម, ប្រព័ន្ធសុខាភិបាល, ការអប់រំ, សមាហរណកម្មសង្គមនិងបរិយាបន្ន, ចីរភាពបរិស្ថាននិងភាពធន់នឹងអាកាសធាតុ, ការផ្លាស់ប្តូរបច្ចេកវិទ្យាឌីជីថល និងបញ្ញាសិប្បនិម្មិត។

នេះគឺជាមោទនភាពដ៏ធំមួយរបស់កម្ពុជាលើកឆាកអន្តរជាតិ ដែលប្រតិភូបណ្តាប្រទេសសមាជិកអង្គការសហប្រជាជាតិ អង្គការអន្តរជាតិ និងដៃគូពាក់ព័ន្ធដែលមកចូលរួមកិច្ចប្រជុំកំពូលពិភពលោកលើកទី២នេះ បង្ហាញពីការចាប់រម្មណ៍របស់ខ្លួនមកលើវឌ្ឍនភាព និងការអភិវឌ្ឍរបស់កម្ពុជា។ ពិព័រណ៍នេះក៏បានផ្សារភ្ជាប់ទំនាក់ទំនងសម្រាប់កិច្ចសហប្រតិបត្តិការរវាងកម្ពុជា និងដៃគូអភិវឌ្ឍពាក់ព័ន្ធទូទាំងពិភពលោកផងដែរ៕