វគ្គបណ្តុះបណ្តាល ស្តីពីការថែទាំសុខភាពមាតា និងទារក ដល់គ្រូពេទ្យនៅតាមមណ្ឌលសុខភាពខេត្តកំពង់ឆ្នាំង

កំពង់ឆ្នាំង៖ មន្ទីរសុខាភិបាលខេត្តកំពង់ឆ្នាំង សហការជាមួយអង្គការមូលនិធិទឹកស្អាត និងគាំពារសុខភាព និងមន្ទីរពេទ្យMount Alverniaនៃប្រទេសសឹង្ហបុរី នៅថ្ងៃទី១១ ខែវិច្ឆិកា ឆ្នាំ២០២៥ បានរៀបចំវគ្គបណ្តុះបណ្តាលស្តីពីការថែទាំសុខភាពមាតា និងទារក ដល់គ្រូពេទ្យនៅតាមមណ្ឌលសុខភាពនានាក្នុងខេត្ត ដើម្បីបង្កើនសមត្ថភាព និងផ្លាស់ប្តូរបទពិសោធន៍ បង្កើនការផ្តល់សេវាសុខាភិបាលល្អដល់ប្រជាជននៅតាមមូលដ្ឋាន។

លោកស្រីវេជ្ជបណ្ឌិត ពូន កែវរ៉ានី ប្រធានអង្គការមូលនិធិទឹកស្អាត និងគាំពារសុខភាព(WAH វ៉ា ) បានបញ្ជាក់ឱ្យដឹងថា៖ វគ្គបណ្តុះបណ្តាលនេះ បានចែករំលែកនូវបទពិសោធន៍ថ្មីៗរវាងទ្រឹស្តី និងការអនុវត្តផ្ទាល់អំពីវិធីសាស្រ្តក្នុងការថែទាំសុខភាពរបស់មាតា និងទារក ការលើកកម្ពស់សមត្ថភាពដល់ក្រុមគ្រូពេទ្យនៅតាមមណ្ឌលសុខភាពនានាក្នុងខេត្តលើជំនាញថែទាំសុខភាពមាតា និងទារក ដើម្បីចូលរួមកាត់បន្ថយអត្រាស្លាប់របស់មាតានិងទារកអោយកាន់តែនៅកម្រិតទាបបំផុត ។ តាមរយៈវគ្គបណ្តុះបណ្តាលនេះក្រុមគ្រូពេទ្យនឹងទទួលបានផ្លាស់ប្តូរកាន់តែច្រើនក្នុងការជួយដល់សហគមន៍របស់គាត់ ក្នុងការចូលរួមទប់ស្កាត់ក្នុងទប់ស្កាត់អត្រាស្លាប់របស់មាតានិងទារក និងបានបន្តធ្វើការផ្សព្វផ្សាយបន្ថែមទៀតដល់ក្រុមគ្រូពេទ្យនៅតាមមណ្ឌលសុខភាពបន្ថែមទៀតងដែរ ។

លោកវេជ្ជបណ្ឌិតប្រាក់ វ៉ុន ប្រធានមន្ទីសុខាភិបាលខេត្តកំពង់ឆ្នាំង បានសម្តែងនូវអំណរគុណយ៉ាងជ្រាលជ្រៅចំពោះ ក្រុមគ្រូពេទ្យមន្ទីរពេទ្យMount Alverniaនៃប្រទេសសឹង្ហបុរី អង្គការមូលនិធិទឹកស្អាត និងគាំពារសុខភាព(WAH វ៉ា ) ដែលជានិច្ចកាលតែងតែបានផ្តល់នូវកិច្ចសហការគ្នាបានល្អរសហការជាមួយមន្ទីរសុខាភិបាលខេត្តកំពង់ឆ្នាំងក្នុងការចែករំលែកនូវបទពិសោធន៍ថ្មីលើកកម្ពស់សុមាលភាពសង្គម ពិសេសការផ្តល់សេវាសុខាភិបាលតាមសហគមន៍ឱ្យកាន់តែមានភាពប្រសើរឡើងថែមទៀត ។

សូមជំរាបជូនថា៖ អង្គការមូលនិធិទឹកស្អាត និងគាំពារសុខភាព(WHA) និងសាកលវិទ្យាល័យសុខាភិបាលនៃប្រទេសសឹង្ហបុរី បានរៀបចំវគ្គបណ្តុះបណ្តាលស្តីពីការថែទាំសុខភាពមាតា និងទារក ដល់គ្រូពេទ្យនៅតាមមណ្ឌលសុខភាពនានាក្នុងខេត្តកំពង់ឆ្នាំងជាច្រើនឆ្នាំមកហើយ និងមានសិក្ខាកាមប្រមាណជិត៣០០នាក់បានទទួលនូវចំណេះ បទពិសោធន៍ ហើយសិក្ខាកាមទាំងអស់នោះ បានជួយដល់សុខភាពប្រជាជន ជាពិសេសមាតា និងទារកបានជាច្រើននាក់តាមរយៈចំណេះ ជំនាញទាំងនេះផងដែរ៕ កាំង ហុងវាស្នា