សមាជិកក្រុមប្រឹក្សាថ្នាក់ក្រោមជាតិ កំពុងពង្រឹងសមត្ថភាពផ្នែកច្បាប់ ដើម្បីទប់ស្កាត់​អំពើ​ហិង្សា​ក្នុង​គ្រួសារ

សម្ព័ន្ធភាពជាតិក្រុមប្រឹក្សាថ្នាក់មូលដ្ឋាន បានបើកវគ្គបណ្ដុះបណ្ដាល អំពីច្បាប់ស្តីពី ការ​ទប់​ស្កាត់​អំពើ​ហិង្សា​ក្នុង​គ្រួសារ និងកិច្ចការពារជនរងគ្រោះ ទៅដល់សមាជិកក្រុមប្រឹក្សាក្រុង ស្រុក ខណ្ឌ ឃុំ និងសង្កាត់ រយៈពេល២ថ្ងៃ ចាប់ពីថ្ងៃទី១៣ ដល់១៤ ខែវិច្ឆិកា ឆ្នាំ២០២៥។

ក្នុងពិធីបើកវគ្គបណ្ដុះបណ្ដាល អំពីច្បាប់ស្តីពី ការទប់ស្កាត់អំពើហិង្សាក្នុងគ្រួសារ និង​កិច្ច​ការ​ពារ​ជន​រង​គ្រោះ នៅថ្ងៃទី១៣ ខែវិច្ឆិកា ឆ្នាំ២០២៥ ឯកឧត្តម សយ កុសល ប្រធាន​សម្ព័ន្ធ​ភាព​ជាតិ​សមាគម​ក្រុម​ប្រឹក្សាក្រុង ស្រុក ខណ្ឌ ឃុំ សង្កាត់ (សម្ព័ន្ធភាពជាតិក្រុមប្រឹក្សាថ្នាក់មូលដ្ឋាន) មាន​ប្រសាសន៍ថា ផ្អែកលើកត្តាច្បាប់ សង្គម វប្បធម៌ និងការអភិវឌ្ឍ ច្បាប់ស្តីពី ការ​ទប់​ស្កាត់​អំពើ​ហិង្សា​ក្នុង​គ្រួសារ និងជួយជនរងគ្រោះ គឺជាច្បាប់មួយដ៏សំខាន់ ក្នុងនោះជួយ​ការពារ​សិទ្ធិ​ជា​មូល​ដ្ឋាន​ដល់​ប្រជាពលរដ្ឋ, ការពង្រឹងភាពសុខដុមរមនាក្នុងគ្រួសារ និងស្ថិរភាពសង្គម, ធានាយុត្តិធម៌ និង​ការទទួលខុសត្រូវ, គាំទ្រជនរងគ្រោះតាមរយៈជំនួយ និងសេវាកម្ម, លើកកម្ពស់​សមភាព​យេឌ័រ​ និងការអភិវឌ្ឍ និងចូលរួមចំណែកចំពោះសន្តិភាពជាតិ និងការអភិវឌ្ឍប្រកបដោយចីរភាព ។

ឯកឧត្តមបន្តថា ទោះបីជាច្បាប់នេះ មានសារៈសំខាន់ខ្លាំង ចំពោះសង្គមកម្ពុជាក្តី ក៏​ការ​សិក្សា​មួយ​ចំនួន​ បានរកឃើញចំណុចខ្វះខាត និងបញ្ហាប្រឈមមួយចំនួន ក្នុងការអនុវត្ត ក្នុងនោះ​មាន​ការ​យល់​ដឹង​ពី​ច្បាប់​មិន​ទាន់​ទូលំទូលាយ, ការអនុវត្តច្បាប់មិនបានស៊ីសង្វាក់គ្នា, កិច្ចការពារ​ជន​រ​ង​គ្រោះ ​និងសេវាគាំទ្រមិនទាន់បានពេញលេញ, កង្វះការសម្របសម្រួលក្នុងចំណោមអ្នកពាក់ព័ន្ធ, ថវិកា និងធានធានមិនទាន់គ្រប់គ្រាន់ និងឧបសគ្គសង្គម និងវប្បធម៌។

ឯកឧត្តម សយ កុសល បានគូសបញ្ជាក់ថា វគ្គបណ្ដុះបណ្ដាលនេះ មានគោល​បំណង​ពង្រឹង​ការ​យល់​ដឹង​របស់សិក្ខាកាម អំពីក្របខ័ណ្ឌច្បាប់ស្តីពីការទប់ស្កាត់អំពើហិង្សាក្នុងគ្រួសារ និង​កិច្ច​ការពារ​ជន​រងគ្រោះ ដែលរួមមានគោលការណ៍ គោលបំណង និងបទប្បញ្ញត្តិសំខាន់ៗ នៃច្បាប់ ។ តាម​រយៈការធ្វើឲ្យការយល់ដឹងនេះ កាន់តែស៊ីជម្រៅ ហើយមានលទ្ធភាពកាន់តែប្រសើរ ក្នុង​ការ​អនុវត្ត​ច្បាប់​ឲ្យបានត្រឹមត្រូវ នៅក្នុងការងារប្រចាំថ្ងៃ និងនៅក្នុង​សហគមន៍​រប​ស់​ក្រុម​ប្រឹក្សា​ទាំងអស់។

គួរបញ្ជាក់ថា ច្បាប់ស្តីពី ការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ និង​ចំណុច​ខ្វះ​ខាត់​ ក៏ដូចជាបញ្ហាប្រឈមក្នុងការអនុវត្តច្បាប់នេះ សម្ព័ន្ធភាពជាតិ​ក្រុម​ប្រឹក្សា​ថ្នាក់​មូល​ដ្ឋាន ដែលតំណាងឲ្យក្រុមប្រឹក្សាក្រុង ស្រុក ខណ្ឌ ឃុំ សង្កាត់ នៅទូទាំងប្រទេស តែង​តែ​ផ្ដល់​អាទិភាព​ ទៅលើការបណ្ដុះបណ្ដាលសមាជិករបស់ខ្លួន ក្នុងការអនុវត្តនូវច្បាប់ឲ្យមានប្រសិទ្ធភាព ដើម្បី​ផ្ដល់សេវាជូនប្រជាពលរដ្ឋនៅមូលដ្ឋាន៕ អត្ថបទ៖ បាន សុខរិទ្ធិ