ខេត្តកំពង់ចាម បើកយុទ្ធនាការ១៦ថ្ងៃ ដើម្បីបញ្ចប់អំពើហិង្សាលើស្ត្រី និងក្មេងស្រី នៅស្រុកស្ទឹងត្រង់

កំពង់ចាម៖ លោកជំទាវ ប៉ាង ដានី អភិបាលរងខេត្តកំពង់ចាម នាព្រឹកថ្ងៃទី០៥ ខែធ្នូ ឆ្នាំ២០២៥ អម​ដំណើរដោយ លោកស្រី ស៊ាង វណ្ណលក្ខិណា ប្រធានមន្ទីរកិច្ចការនារីខេត្តកំពង់ចាម បាន​បើក​យុទ្ធនា​ការ ១៦ថ្ងៃ ដើម្បីបញ្ឈប់អំពើហិង្សាលើស្ត្រី និងក្មេងស្រី ក្រោមប្រធានបទ រួមគ្នាបញ្ឈប់​អំពើ​ហិង្សា តាមបច្ចេកខណ្ឌ ឌីជីថល លើក្មេងស្រី ដែលពិធីបើកយុទ្ធនាការនេះ រៀបចំធ្វើ​ឡើង​នៅ​វត្ត​សុវណ្ណគិរីមាឃ ហៅវត្តមាឃ ស្ថិតនៅ ឃុំព្រែកកក់ ស្រុកស្ទឹងត្រង់ ខេត្តកំពង់ចាម។

ក្នុង​ឱកាសនោះ លោកជំទាវ ក៏បានសម្តែងអារម្មណ៍ រីករាយ សប្បាយចិត្ត ពេលបានចូលរួម ពិធី​បើក​យុទ្ធនាការ ១៦ថ្ងៃ ដើម្បីបញ្ឈប់អំពើហិង្សាលើស្ត្រី និងក្មេងស្រី ឆ្នាំ២០២៥ ក្រោម​ប្រធាន​បទ​រួម​គ្នាប​ញ្ឈប់អំពើហិង្សា តាមបច្ចេកវិទ្យា ឌីជីថល លើក្មេងស្រី ដែល រៀបចំដោយក្រុមការងារ GBV នៃមន្ទីរកិច្ចការនារីខេត្តកំពង់ចាម និងមានការគាំទ្រដោយ អង្គការ UNFPA រៀប​ចំ​យុទ្ធនាការ​ដ៏​មានអត្ថន័យ នៅស្រុកស្ទឹងត្រង់ នាពេលនេះ។

លោកជំទាវ បានបន្ថែមថា កាលពីឆ្នាំ១៩៩១ មជ្ឈមណ្ឌលដើម្បីភាពជាអ្នកដឹកនាំសកលស្ត្រី រួម​ជា​មួយ វិទ្យាស្ថានសកល ស្ត្រី ដែលជាស្ថាប័នដំបូងគេធ្វើការងារសិទ្ធិមនុស្ស និងអំពើហិង្សា បាន​អំពាវ​នាវ​ឱ្យមានយុទ្ធនាការជាសកល ចំនួន១៦ថ្ងៃ ជាសកម្មភាព​ប្រឆាំង​នឹង​អំពើ​ហិង្សា​ទាក់​ទង​នឹង​យេនឌ័រ​។ ក្រោយមក យុទ្ធនាការនេះ ត្រូវបានរៀបចំធ្វើឡើង​នៅគ្រ​ប់​ទីកន្លែង​នៅ​លើ​ពិភព​លោក រហូតដល់ទិវានេះបាន ក្លាយទៅជាទិវាអន្តរ ជាតិ ដែលប្រកាសទទួលស្គាល់ដោយអង្គការ សហ​ប្រជាជាតិថាជាទិវាអន្តរជាតិ លុប បំបាត់អំពើហិង្សាលើស្ត្រី តាមរយៈមហា សន្និ​បាត​លើក​ទី​៨៣ របស់អង្គការសហ ប្រជាជាតិដែលបានកំណត់ជាផ្លូវការលេខ A/RES/54/134 ចុះថ្ងៃទី១៧ ខែ​ធ្នូ ឆ្នាំ១៩៩៩ ក៏ដូចជាខួប លើកទី ៣០ នៃការអនុវត្តសេចក្តីថ្លែងការណ៍ទីក្រុងប៉េកាំង។

លើ​ស​ពីនេះទៅទៀត លោកជំទាវ បន្តថា យុទ្ធនាការ១៦ថ្ងៃ គឺជាសកម្មភាព និងជា​វេទិកា​ដ៏​មាន​ប្រសិទ្ធ​ភាពមួយក្នុងការចូលរួមផ្សព្វផ្សាយ និងចូលរួមទប់ស្កាត់អំពើហិង្សាលើស្ត្រី និងក្មេងស្រី ដែល​កើតមាន ឡើងក្នុងស្ថានភាពជាក់ស្តែងតាមរយៈការផ្តល់សារគន្លឹះៗ ការផ្តល់​ព័ត៌មាន​សំខា​ន់​ៗ​ទាក់​ទងនឹង ផលប៉ះពាល់នៃអំពើហិង្សាទៅដល់សាធារណៈជនទូទៅ ផ្សព្វផ្សាយដល់សហគមន៍ ដើម្បី​អោយប្រជាពលរដ្ឋមានការផ្លាស់ប្តូរផ្នត់គំនិតអវិជ្ជមាន ឬផ្នត់គំនិត​ដែល​តែង​យល់​ច្រឡំ​ទៅ​លើ​ស្ត្រី ​និងក្មេងស្រី៕