មកដល់ថ្ងៃនេះ ជនភៀសសឹកកម្ពុជាកើនដល់ជាងជាង ១២ម៉ឺននាក់ ដោយសារ​ការ​ឈ្លាន​ពាន​របស់​ថៃ

មកដល់រសៀលថ្ងៃទី១០ ខែធ្នូ ឆ្នាំ២០២៥នេះ កម្ពុជាមានជនស៊ីវិលបានស្លាប់បាត់បង់ជីវិតចំនួន ៧​នាក់​ រងរបួស ២០នាក់ និងមានជនភៀសសឹកបានកើនឡើងដល់ជាង ៣ម៉ឺន៧ពាន់គ្រួសារ សរុប​ប្រជាពលរដ្ឋ មានជាង១២ម៉ឺននាក់ ដោយសារ​ការ​ឈ្លាន​ពាន​របស់​យោធា​ថៃ​មក​លើ​ដែន​អធិប​តេយ្យភា​ព​របស់កម្ពុជា។ នេះបើយោងតាមរបាយការណ៍របស់​ក្រសួង​ការ​ពារ​ជាតិ​កម្ពុជា​នារសៀល​នេះ។

អំពើឈ្លានពានរបស់ភាគីថៃលើដែនអធិបតេយ្យកម្ពុជាដែល​ផ្តើមឡើងជាថ្មីទៀតចាប់ពីថ្ងៃទី៧ ខែ​ធ្នូ​មក​ដល់​ថ្ងៃទី១០ខែធ្នូនេះ បានបណ្តាលឱ្យប៉ះពាល់យ៉ាងខ្លាំងដល់តំបន់ស៊ីវិលជាច្រើនកន្លែង​ប្រជា​ពលរដ្ឋខ្មែរស្លាប់ របួស បង្ខំចិត្តជម្លៀស បំផ្លិចបំផ្លាញហេដ្ឋារចនាសម្ព័ន្ធ វត្តអារាម សម្បត្តិ​វប្បធម៌​ បេតិកភណ្ឌមនុស្សជាតិ និងបង្អាក់សេវាសាធារណៈជាមូលដ្ឋាននានា។

ក្នុងនោះ​មាន​ប្រជាពលរដ្ឋស្លាប់ចំនួន៧នាក់ ក្នុងនោះ១នាក់នៅខេត្តព្រះវិហារ ៣នាក់នៅខេត្ត​ឧត្តរ​មាន​ជ័យ​ និង៣នាក់ទៀតនៅខេត្តបន្ទាយមានជ័យ។ ចំណែកពលរដ្ឋរងរបួសធ្ងន់ និងស្រាល​សរុប​គិត​មក​ដល់​ពេល​នេះ​មាន​ប្រមាណ​២០​នាក់​ដែល​ភាគ​ច្រើន​កំពុ​ង​សង្គ្រោះ​បន្ទាន់​ដោយ​ក្រុម​គ្រូ​ពេទ្យ​ខេត្ត ​និងបញ្ជូនមកសង្គ្រោះបន្តនៅរាជធានីភ្នំពេញ។

របាយការណ៍បានបញ្ជាក់ថា នៅខេត្តព្រះវិហារមានប្រជាពលរដ្ឋភៀសសឹកចេញពីឃុំចំនួន សរុប ៦១៣៣ គ្រួសារ ស្មើនឹងមនុស្ស ២១៦៣៩ នាក់, ខេត្តឧត្តរមានជ័យមានប្រជាពលរដ្ឋ ៩៧៦៨ គ្រួសារ ស្មើនឹងមនុស្ស ៣៣៧៨៧ នាក់, ខេត្តបន្ទាយមានជ័យ មានប្រជាពលរដ្ឋចំនួន ១០ ២៥៥ គ្រួសារ ស្នើនឹងមនុស្ស ៣៦២៤៤នាក់។ ខេត្តពោធិ៍សាត់ មានចំនួន ៩០០ គ្រួសារ ស្នើនឹង ៣២២១ នាក់ និងខេត្តសៀមរាបចំនួន៩៩៥៨ គ្រួសារ ស្នើនឹង ៣១ ៨៣៧ នាក់។

សូមបញ្ជាក់ថា ករណីបំផ្លិចបំផ្លាញហេដ្ឋារចនាសម្ព័ន្ធស៊ីវិល និងបង្អាក់​សេវា​សាធារណៈ​ជា​មូល​ដ្ឋាន​៖ ប្រតិបត្តិការយោធាគ្រប់ទម្រង់របស់ថៃ បានធ្វើឱ្យផ្ទះសំបែងពលរដ្ឋខ្មែរ អគារ​ក្រុម​ហ៊ុន​ឯកជន ​សាលារៀន និងផ្លូវ សាធារណៈត្រូវបំផ្លាញជាច្រើនកន្លែង ដោយសារគ្រាប់ផ្លោង និង​គ្រាប់​ទម្លាក់​ពី​យន្ត​ហោះចម្បាំងF16 ក្នុងនោះមានសាលារៀនដល់ទៅ២៣៨ លើ ២៦០ទីតាំង ក្នុង​ខេត្ត​ឧត្តរ​មាន​ជ័យបា​នបិទ និងផ្អាកការសិក្សាទាំងស្រុង ខណៈសាលារៀននៅក្នុងក្រុង និងស្រុកជាប់​ព្រំដែន​ក្នុង​ខេត្តព្រះវិហារ បន្ទាយមានជ័យ រួមនឹងខេត្តបាត់ដំបង ស្ទើរទាំងស្រុងក៏បានបិទ និង​ផ្អាក​ជា​បណ្តោះអាសន្នដែរបន្ទាប់ពីកុមារតូចៗរាប់ពាន់នាក់បានជម្លៀសទៅកាន់ទីតាំង សុវត្ថិភាព​ជា​មួយ​ក្រុម​គ្រួសារ​៕