ដំណើរទស្សនកិច្ចនៃអង្គការអន្តរជាតិ និងអង្គទូតនានានៅកម្ពុជាទៅតំបន់ព្រំដែន គឺជាសារថ្មីបន្ថែមប្រាប់ទៅអន្តរជាតិ ស្តីអំពីការឈ្លានពានរបស់ថៃ

អ្នកនាំពាក្យរបស់រាជរដ្ឋាភិបាលកម្ពុជាឯកឧត្តម ប៉ែន បូណា បានថ្លែងថា ដំណើរទស្សនកិច្ចរបស់អង្គការ អន្តរជាតិ និងបណ្តាអង្គទូតនានាប្រចាំនៅកម្ពុជា ទៅកាន់តំបន់ព្រំដែនកម្ពុជា និងថៃកាលពីម្សិលមិញនោះ គឺជាសារថ្មីមួយបន្ថែមទៀតបង្ហាញទៅកាន់សហគមន៍អន្តរជាតិ ស្តីអំពីសកម្មភាពឈ្លានពានរបស់យោធាថៃមកលើដែនអធិបតេយ្យកម្ពុជា។

ក្នុងសន្និសីទសារព័ត៌មានប្រចាំថ្ងៃ នាព្រឹកថ្ងៃទី២៨ ខែមីនា ឆ្នាំ២០២៦នេះស្តីពីស្ថានការណ៍រវាង កម្ពុជា និងថៃឯកឧត្តម ប៉ែន បូណា បានគូសបញ្ជាក់ថា ប្រមុខរាជរដ្ឋាភិបាលកម្ពុជាយើងបាន​កំពុងធ្វើការ ដោះស្រាយផ្នែកផ្លូវច្បាប់ ​និងធ្វើការតវ៉ាយ៉ាងសកម្មផ្នែកការទូត ចំពោះទង្វើឈ្លានពាន​របស់ភាគីថៃ មកលើដែនអធិបតេយ្យកម្ពុជាយ៉ាងគឃ្លើននោះ។ ជាក់ស្តែងដូចកាលពីថ្ងៃទី២៧ ខែមីនា ឆ្នាំ ២០២៦ម្សិលមិញ ប្រមុខការទូតកម្ពុជាបានសម្របសម្រួលឲ្យអង្គការអន្តរជាតិ និង​អង្គទូតនានាប្រចាំនៅកម្ពុជា​ទៅទស្សនកិច្ចនៅខេត្តពោធិ៍សាត់ ហើយដំណើរទស្សនកិច្ច​នេះតំណាងអង្គទូត ​និងអង្គការទាំងនោះបានឃើញដោយផ្ទាល់ភ្នែកចំពោះទង្វើ​ឈ្លានពាន​របស់ពួកទាហានថៃ​ មកលើដែនអធិបតេយ្យកម្ពុជា។ នេះ គឺជាថ្មីមួយទៀត​ប្រាប់ទៅពិភពលោកថា​ថៃ​នៅតែបន្តឈ្លានពានលើដែនអធិបតេយ្យកម្ពុជា​ និងបានបំពានច្បាប់អន្តរជាតិយ៉ាងធ្ងន់ធ្ងរ។សូមបញ្ជាក់ថា អង្គការអន្តរជាតិ និងបណ្តាអង្គទូតដែលបានអញ្ជើញទៅកាន់តំបន់ព្រំដែនច្រកថ្មដា កាលពីម្សិលមិញ រួមមាន ប្រ៊ុយណេ, រុស្ស៊ី, ប៉ាគីស្ថាន,មីយ៉ាន់ម៉ា, គុយបា ,ឥណ្ឌា,ទីម័រឡេស្តេ, ប្រេស៊ីល,ឡាវ,វៀតណាម,តួកគី,សហរដ្ឋអាមេរិក,ជប៉ុន,ចិន,ឥណ្ឌូនេស៊ី, និងម៉ាឡេស៊ី ព្រមទាំង ប្រព័ន្ធអង្គការសហប្រជាជាតិប្រចាំប្រទេសកម្ពុជា និងអង្គការកម្មវិធីស្បៀង អាហារពិភពលោក( WFP) ជាដើម៕អត្ថបទបាន ចក់