រដ្ឋសភាបញ្ជូនសេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភាទៅក្រុមប្រឹក្សាធម្មនុញ្ញ

រដ្ឋសភាបានបញ្ជូនសេចក្តីស្នើច្បាប់ស្តីពី វិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ទៅដល់ក្រុមប្រឹក្សាធម្មនុញ្ញហើយកាលពីថ្ងៃទី៣ ខែមេសា ឆ្នាំ២០២៦ បន្ទាប់ពីបានរដ្ឋសភាអនុម័តកាលពីថ្ងៃទី៣០ ខែមីនា ឆ្នាំ២០២៦ និងព្រឹទ្ធសភា ពិនិត្យ ហើយឱ្យយោបល់ឯកភាពទាំងស្រុងកាលពីថ្ងៃទី៣ ខែមេសា ឆ្នាំ២០២៦។

ឯកឧត្តម ព្រហ្ម វិចិត្រអក្ខរា អគ្គលេខាធិការរង និងជាអ្នកនាំពាក្យក្រុមប្រឹក្សាធម្មនុញ្ញ បានថ្លែងប្រាប់ BTV នៅព្រឹកថ្ងៃទី០៤ ខែមេសា នេះថា ៖ ក្រុមប្រឹក្សាធម្មនុញ្ញបានទទួលលិខិតពីសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា កាលពីថ្ងៃទី០៣ ខែមេសា ឆ្នាំ២០២៦ ដើម្បីស្នើពិនិត្យធម្មនុញ្ញភាពសេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ហើយក្រុមប្រឹក្សាធម្មនុញ្ញកំពុងតែចាត់ចែងតាមនីតិវិធី និងបញ្ជូនទៅថ្នាក់ដឹកនាំដើម្បីពិនិត្យសម្រេចថា តើចាត់ការរបៀបម៉េច។

សូមជម្រាបថា សេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ត្រូវបានរដ្ឋសភាអនុម័តកាលបីថ្ងៃទី០៣ ខែមីនា ឆ្នាំ២០២៦ និងព្រឹទ្ធសភា ពិនិត្យ ហើយឱ្យយោបល់ឯកភាពទាំងស្រុងកាលពីថ្ងៃទី៣ ខែមេសា ឆ្នាំ២០២៦។

សេចក្តីស្នើច្បាប់ស្តីពី វិសោធនកម្មច្បាប់ស្តីពី ការបោះឆ្នោតជ្រើសតាំងសមាជិកព្រឹទ្ធសភា រៀបចំឡើងសមស្របទៅនឹងស្ថានភាពជាក់ស្តែងនៃការអនុវត្តមុខងារតំណាងរបស់សមាជិកព្រឹទ្ធសភា បង្កភាពងាយស្រួលដល់សមាជិកព្រឹទ្ធសភាធ្វើទំនាក់ទំនងដោយផ្ទាល់ជាមួយប្រជាពលរដ្ឋ ផ្តល់ភាពងាយស្រួលក្នុងការផ្តល់ព័ត៌មាន និងគោលនយោបាយនានា ព្រមទាំងក្តាប់បាននូវបញ្ហាប្រឈម និងឆ្លើយតបយ៉ាងឆាប់រហ័សទៅនឹងសេចក្តីត្រូវការរបស់ប្រជាពលរដ្ឋនៅតាមមូលដ្ឋាន៕ អត្ថបទ៖ វង្ស សុភាព