កីឡា

វត្តមានកិត្តិយសកំពូលអ្នកប្រដាល់ហ្វីលីពីន Pacquiao នឹងមកខ្មែរចូលរួមកម្មវិធីប្រដាល់ហនុមាន

លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរបាននិយាយក្នុងបទសម្ភាសថា លោក Manny Pacquiao នឹងចូលរួមក្នុងកម្មវិធីប្រដាល់អន្តរជាតិនៅកោះពេជ្រ

ស្វាគមន៍វត្តមានកិត្តិយសស្តេចប្រដាល់ពិភពលោក Manny Pacquiao ក្នុងព្រឹត្តិការណ៍ សង្វៀនហនុមាន គុនខ្មែរខាងមុខនេះ។

លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរបាននិយាយក្នុងបទសម្ភាសថា លោក Manny Pacquiao នឹងចូលរួមក្នុងកម្មវិធីប្រដាល់អន្តរជាតិនៅកោះពេជ្រ។ បែបណាក្តីនៅមិនទាន់មានព័ត៌មានលំអិតថាតើអ្នកប្រដាល់ឆ្នើមរបស់ហ្វីលីពីននឹងធ្វើអ្វីខ្លះសម្រាប់វត្តមាននៅលើទឹកដីកម្ពុជាសាជាថ្មីនេះ។

លោក គង់ វិសាល តំណាងទូរទស្សន៍បាយ័នបានលើកឡើងថា ៖«ក្នុងមហាព្រឹត្តិការណ៍ប្រដាល់ហនុមានគុនខ្មែរ យើងបានរៀបចំសម្រិតសម្រាំងនូវកំពូលអ្នកប្រយុទ្ធចំនួន៤នាក់ សុទ្ធសឹងតែជើងខ្លាំងលំដាប់ប្រទេសដើម្បីប្រកួតគ្នាលក្ខណៈដណ្តើមខ្សែក្រវាត់ម៉ារ៉ាតុង។ ក្នុងមួយរាត្រី អ្នកឈ្នះជើងឯកនឹងទទូលបានប្រាក់រង្វាន់ចំនួន៥ពាន់ដុល្លារអាមេរិក និងគ្រប់គ្រងខ្សែក្រវាត់សហព័ន្ធគុនខ្មែរ KKF និងទូរទស្សន៍បាយ័ន។ ក្នុងនាមទូរទស្សន៍បាយ័នដែលជាអ្នកផ្សាយផ្ទាល់នូវមហាព្រឹត្តិការណ៍ប្រដាល់នេះ ខ្ញុំសូមគោរពអញ្ជើញពុកម៉ែបងប្អូនចូលរួមទស្សនា លើកទឹកចិត្តកីឡាកររបស់យើងឲ្យបានច្រើនកុះករ»។

កម្មវិធីប្រកួតគុនខ្មែរអន្តរជាតិនេះមានការប្រកួតដណ្តើមខ្សែក្រវាត់ម៉ារ៉ាតុងដែលមានប្រាក់រង្វាន់៥ពាន់ដុល្លារអាមេរិក និងការប្រកួតមិត្តភាពអន្តរជាតិ៣គូ។ សម្រាប់ការប្រកួតខ្សែក្រវាត់ម៉ារ៉ាតុងមានកីឡាករ អេ អាំម៉ារីនភូថង, សូត្រ វាសនា, ឡុង សំណាង និង ផាន់ គ្រាន់។ លទ្ធផលនៃការចាប់ឆ្នោតសម្រាប់ជុំទី១គឺកីឡាករ អេ អាំម៉ារីនភូថង ត្រូវប្រកួតជាមួយ សូត្រ វាសនា ខណៈ ឡុង សំណាង ត្រូវប៉ះ ផាន់ គ្រាន់។ អ្នកដែលទទួលបានជ័យជម្នះនៅជុំទី១នឹងឡើងទៅវគ្គផ្តាច់ព្រ័ត្រដើម្បីប្រជែងជើងឯកដែលប្រាក់រង្វាន់៥ពាន់ដុល្លារ និងជើងឯករងទទួលបាន៣ពាន់ដុល្លារ៕