សំបកកង់រថយន្តស្នាដៃកូនខ្មែរ ទទួលការគាំទ្រយ៉ាងផុលផុស ក្នុង​ពិព័រណ៍​ផលិតផល​ខ្មែរ​នៅ​កោះពេជ្រ

សំបកកង់រថយន្ត ដែលផលិតដោយរោងចក្រកូនខ្មែរ នៅក្នុងខេត្តក្រចេះ បាន​បង្ហាញ​ខ្លួន​យ៉ាង​លេច​ធ្លោ និងទទួលការគាំទ្រយ៉ាងផុលផុស ក្នុងពិព័រណ៌ផលិតផលខ្មែរ នៅកោះពេជ្រ។

លោក ច័ន្ទ សុគន្ធា នាយកក្រុមហ៊ុន ទទួលសិទ្ធិចែកចាយសំបកកង់រថយន្តពីរោងចក្រកូនខ្មែរ ដែលផលិតសំបកកង់រថយន្ត នៅក្នុងខេត្តក្រចេះ ប្រាប់ BTV នៅរសៀលថ្ងៃទី៦ ខែវិច្ឆិកា ឆ្នាំ២០២៦នេះ ថា ពិព័រណ៍​ផលិតផលខ្មែរ ដែលរៀបចំដោយសហភាពសហព័ន្ធយុវជនកម្ពុជា គឺជាឱកាសដ៏មានតម្លៃ ក្នុងការជំរុញឱ្យផលិតផលស្នាដៃកូនខ្មែរ សម្រុកចូលទីផ្សារកាន់តែទូលំទូលាយ។ តាមរយៈពិព័រណ៌នេះ លោកជឿជាក់ថា ផលិតផលរបស់កូនខ្មែរ នឹងកាន់តែទទួលបានការគាំទ្រកើនឡើងបន្ថែម ខណៈសំបករថយន្តដែលផលិតដោយកូនខ្មែរកាន់ទទួលការគាំទ្រខ្លាំង ក្នុងស្មារតីគាំទ្រផលិតផលជាតិ បូករួមនិងគុណភាពខ្ពស់មិនចាញ់ផលិតផលបរទេស។

លោក ហ៊ុន សាវ៉ាត់ ពលរដ្ឋរស់នៅក្រុងតាខ្មៅ ខេត្តកណ្ដាល ដែលមកចូលរួម ពិព័រណ៌ផលិតផលខ្មែរ ឆ្នាំ២០២៦នេះ បានប្រាប់ថា លោកមកទិញសំបកកង់រថយន្តដែលជាផលិតផលខ្មែរបន្ថែមទៀត បន្ទាប់ពីលោកបានប្រើ និងឃើញថា គុណភាពល្អមិនចាញ់ផលិតផលបរទេស។

លោក មាស ឧត្ដម ពលរដ្ឋរស់នៅរាជធានីភ្នំពេញ អះអាង ថា លោកនៅតែបន្តគាំទ្រផលិតផលខ្មែរ ពីព្រោះផលិតផលខ្មែរ មានគុណភាព ដើម្បីឱ្យរោងចក្រមានដំណើរការទៅមុខ ជួយផ្ដល់ទីផ្សារសម្រាប់កសិករ ផ្ដល់ការងារដល់ពលរដ្ឋ ដោយមិនចាំបាច់ចំណាកស្រុក។

សូមជម្រាបជូន ថា ពិព័រណ៌ផលិតផលខ្មែរ​ឆ្នាំ២០២៦​នេះ រៀបចំឡើងក្នុងគោលបំណង បង្ហាញ​ស្មារតីសាមគ្គីភាព និងការរួបរួមគ្នាគ្រប់កាលៈទេសៈរបស់ប្រជាជាតិខ្មែរ ក្នុងនាមជាខឿនការពារជាតិ ជាប្រជាជនដែលមានមោទនភាពចំពោះប្រទេសជាតិ ជឿជាក់លើថ្នាក់ដឹកនាំ និងចូលរួមចំណែកគ្រប់សកម្មភាពជាមួយរាជរដ្ឋាភិបាល ដើម្បីការអភិវឌ្ឍ និងការរីកចម្រើនរបស់កម្ពុជា៕ អត្ថបទ៖ លៀ ស៊ីណា