នគរបាលចាប់អនុវត្តបញ្ចៀសចរាចរណ៍រថយន្តធុនធ្ងន់ លើកំណាត់ផ្លូវ៦០ម៉ែត្រ ដើម្បី​ធានា​សន្តិសុខ ជូនគណៈប្រតិភូអន្តរជាតិ

នៅព្រឹកថ្ងៃទី១២ ខែវិច្ឆិកា ឆ្នាំ២០២៦នេះ កម្លាំងនគរបាលរាជធានីភ្នំពេញ បាន​ចាប់​ផ្តើម​ការ​អនុវត្ត​បញ្ចៀសលំហូរចរាចរណ៍សម្រាប់រថយន្តធុនធ្ងន់គ្រប់ប្រភេទ លើកំណាត់​ផ្លូវ​អាទិភាព​សំខាន់​ៗ ដើម្បីធានាបាននូវសុវត្ថិភាព សន្តិសុខ និងសណ្តាប់ធ្នាប់សាធារណៈ ជូន​ដល់​គណៈ​ប្រតិភូ​អន្តរជាតិ​ទាំងអស់ ដែលនឹងអញ្ជើញចូលរួមក្នុងកិច្ចប្រជុំកំពូលហ្វ្រង់កូហ្វូនី លើកទី២០ និង​កិច្ច​ប្រជុំ​ពាក់ព័ន្ធនានា នៅរាជធានីភ្នំពេញ ចាប់ពីថ្ងៃទី១៣ ដល់ថ្ងៃទី១៧ ខែវិច្ឆិកា ឆ្នាំ២០២៦ ។

លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានឲ្យដឹងថា ៖ កំណាត់មហាវិថី សម្តេច​តេជោ ឬហៅថា ផ្លូវ៦០ម៉ែត្រ គឺជាកំណាត់ផ្លូវអាទិភាពបំផុត សម្រាប់​ការ​អញ្ជើញ​ធ្វើ​ដំណើរ​របស់​គណៈប្រតិភូអន្តរជាតិ ព្រោះផ្លូវនេះជាផ្លូវ​ដែល​មាន​លំហូរ​ចាក​ចេញ​ពី​អាកាស​យាន​ដ្ឋាន​អន្តរជាតិតេជោ ឆ្ពោះចូលទៅកាន់រាជធានីភ្នំពេញ ដូច្នោះហើយ ការសម្រួល​ដល់​លំហូរ​ចរាចរណ៍​ គឺជាភាពចាំបាច់បំផុត ។

លោកអធិការបន្ថែមថា សម្រាប់រថយន្តធុនធ្ងន់ ក៏ត្រូវបានពង្វាងទិសដៅចរាចរណ៍ផងដែរ ស្រប​តាម​បំរាម​ហាមឃាត់របស់រដ្ឋបាលរាជធានីភ្នំពេញ ដោយនៅព្រឹកថ្ងៃខែដដែលនេះ កម្លាំង​នគរបាល​ខណ្ឌ សហការជាមួយនគរបាលរាជធានី បានអប់រំណែនាំអ្ន​ក​បើកបរ​រថយន្ត​ធុន​ធ្ងន់​ទាំង​អស់​ឲ្យពង្វាងទិសដៅចរាចរណ៍របស់ខ្លួន ហើយក្រុមអ្នកបើកបរ​ក៏​មាន​ការ​សហការ​ចូល​រួម​ល្អ​ផង​ដែរ​។

លោកបន្ថែមថា នគរបាលក៏បានពង្រឹងទាំងបញ្ហាសន្តិសុខផងដែរ ដោយពុំ​បណ្តោយ​ឲ្យ​មាន​សភាព​ការណ៍​មិនល្អណាមួយកើតឡើង ក្នុងកំឡុងពេលដែលកិច្ចប្រជុំកំពូលជាប្រវត្តិសាស្ត្រនេះ កំពុង​ដំណើរការប្រារព្ធឡើងនោះឡើយ។

គួរជម្រាបថា ក្នុងឆ្នាំ២០២៦នេះ ព្រះរាជាណាចក្រកម្ពុជា បានទទួលធ្វើជាម្ចាស់ផ្ទះ ក្នុងការរៀបចំកិច្ចប្រជុំកំពូលហ្វ្រង់កូហ្វូនី លើកទី២០ ក្រោមប្រធានបទ៖ « រួមគ្នាបន្តកសាងសន្តិភាព ដើម្បីវិបុលភាពរួម និងស្ថិរភាពយូរអង្វែង» ដែលនឹងប្រព្រឹត្តិទៅ នៅថ្ងៃទី១៥ និង១៦ ខែវិច្ឆិកា ឆ្នាំ២០២៦ ។

បច្ចុប្បន្ននេះ អង្គការអន្តរជាតិ នៃហ្វ្រង់កូហ្វូនី (OIF) មានសមាជិកសរុបចំនួន ៩០រដ្ឋ និងរដ្ឋាភិបាល ទូទាំងពិភពលោក ៕ លីហេង