លោកជំទាវ ភឿង សកុណា អញ្ជើញទទួលវិញ្ញាបនបត្រ «ក្រមា» ត្រូវបាន​បញ្ចូល​ក្នុង​បញ្ជី​របស់​អង្គការ​យូ​ណេស្កូ

លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ​បាន​អញ្ជើញ​ចូល​រួម​ក្នុងពិធីអបអរសាទរ និងទទួលវិញ្ញាបនបត្រ «ក្រមា» ដែលត្រូវ​បាន​បញ្ចូល​ក្នុង​បញ្ជី​តំណាង​បេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ តាមរយៈ សេចក្តីសម្រេច 19.COM 7.b.27 កាលពីថ្ងៃទី៤ ខែធ្នូ ឆ្នាំ២០២៤ នៅទីក្រុងអាសង់ស្យុង សាធារណរដ្ឋ​ប៉ារ៉ាហ្គាយ​។

សូមជម្រាបថា «ក្រមា» ខ្មែរ ត្រូវបានចុះក្នុងបញ្ជីតំណាងរបេតិកភណ្ឌវប្បធម៌អរូបី នៃ​មនុស្ស​ជាតិ​របស់​អង្គការ​យូណេស្កូ កាលពីនាថ្ងៃពុធ ទី៤ ខែធ្នូ ឆ្នាំ២០២៤ នៅទីក្រុងអាសង់ស្យុង (Asunción) សាធារណរដ្ឋប៉ារ៉ាហ្គាយ (Republic of Paraguay) ដោយគណៈ​កម្មការ​អន្តររដ្ឋាភិបាល​ដើម្បីការការពារបេតិកភណ្ឌវប្បធម៌ អរូបីរបស់អង្គការយូណេស្កូ ដែល​បាន​អនុម័ត​ជា​ឯកច្ឆន្ទតាមរយៈសេចក្តីសម្រេច 19.COM 7.b.27។

«ក្រមា» គឺជាផ្នែកមួយ​ដ៏សំខាន់​ក្នុង​ជីវិត​រស់​នៅ​ប្រចាំ​ថ្ងៃ​របស់​ប្រាជ​កម្ពុា​ចាប់​តាំង​ពី​ពេល​កើត​រហូត​ដល់ ពេលស្លាប់ ដោយប្រជាជននិយមប្រើប្រាស់តាមតម្រូវការផ្សេងៗដូចជា គ្របដណ្តប់​ខ្លួន តុបតែងលម្អ ច្នៃជាសម្លៀកបំពាក់ គ្រប់ទម្រង់ បាំងកម្ដៅព្រះអាទិត្យ ចងជាអង្រឹងក្មេង សម្រាប់​ជូត​ខ្លួន និងប្រើប្រាស់ក្នុងពិធីផ្សេងៗទៅតាមប្រពៃណីសាសនាជាដើម។ល។

កន្លងមក កម្ពុជាបាន​ដាក់​បញ្ចូល​មរតក​វប្បធម៌ជាតិ​ផ្នែក​អរូបី​ក្នុង​បញ្ជី​បេតិកភណ្ឌ​វប្បធម៌​អរូបី នៃ​ម​នុស្សជាតិ របស់អង្គការយូណេស្កូជាបន្តបន្ទាប់ សរុបចំនួន៦មរតករួចមកហើយ។ «ក្រមា» គឺជា មរតក​វប្បធម៌អរូបីទី៧ ដែលកម្ពុជាបាន ដាក់បញ្ចូល​ដោយ​ជោគជ័យ​ទៅ​ក្នុង​បញ្ជី​បេតិកភណ្ឌ​វប្បធម៌​អរូបី នៃ​មនុស្សជាតិរបស់អង្គការយូណេស្កូ។ ទាំងអស់នេះ គឺជា សមិទ្ធផលដ៏ត្រចះ​ត្រចង់​មួយ​របស់​រាជរដ្ឋាភិបាលក្នុងកិច្ចការអភិរក្ស ថែរក្សា ការពារ មរតកវប្បធម៌ជាតិ និងផ្សព្វផ្សាយ វប្បធម៌​ខ្មែរ​ទាំងក្នុងប្រទេស និងលើឆាកអន្តរជាតិ។

ក្នុងឱកាសនេះ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រ​សិល្បៈ បានគោរពថ្លែងអំណរគុណដ៏ជ្រាលជ្រៅចំពោះ សម្តេចមហាបវរធិបតី នាយករដ្ឋមន្ត្រី នៃ​ព្រះរា​ជា​ណាចក្រកម្ពុជា ដែលបានចង្អុលបង្ហាញ គាំទ្រ និងដាក់ចេញនូវ​គោល​នយោបាយ​អាទិភាព​សម្រាប់​វិស័យ អភិរក្ស ការពារ និងអភិវឌ្ឍមរតកវប្បធម៌ជាតិ។ លោកជំទាវក៏បានថ្លែងអំណរគុណជាអនេកចំពោះ ក្រសួង ស្ថាប័នពាក់ព័ន្ធ អាជ្ញាធរដែនដី ក្រុម​ការងារ ជំនាញ អង្គការ សហគមន៍តម្បាញទូទាំងប្រទេស ដែលបានជួយជ្រោមជ្រែង កសាង​ឯក​សារ​រហូត​ទទួលបានជោគជ័យ ក្នុងការដាក់បញ្ចូល «ក្រមា» ក្នុងបញ្ជីតំណាង​បេតិកភណ្ឌ​វប្បធម៌ នៃ​មនុស្សជាតិ ដែលជាមោទនភាពថ្មីបន្ថែមសម្រាប់ជាតិខ្មែរទាំងមូល៕