ឯកឧត្តម កើត រិទ្ធ អញ្ជើញសំណេះសំណាលជាមួយអាជីវករផ្សារបឹងឈូក ខណៈសម្ដេចធិបតីជំរុញឱ្យក្រុមការងារពន្លឿនការជួសជុលផ្សារបឹងឈូកឡើងវិញ

បាត់ដំបង៖ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង អមដំណើរដោយឯកឧត្តម សុខ លូ អភិបាលខេត្តបាត់ដំបង ព្រមទាំងក្រុមការងារនៅថ្ងៃទី៧ ខែធ្នូ ឆ្នាំ២០២៤នេះ បានអញ្ជើញសំណេះសំណាលជាមួយអាជីវករផ្សារបឹងឈូក ក្រុងបាត់ដំបងដែលរងគ្រោះដោយអគ្គិភ័យហើយទទួលបានដំណោះស្រាយដ៏ល្អឥតខ្ចោះពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។

ថ្លែងក្នុងឱកាសនោះ ឯកឧត្តម កើត រិទ្ធ បានពាំនាំនូវការផ្ដាំផ្ញើរសាកសួរសុខទុក្ខពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ជូនចំពោះអាជីវករផ្សារបឹងឈូកទាំងអស់។

ឯកឧត្តម កើត រិទ្ធ បានរំលឹកពីប្រសាសន៍របស់សម្ដេចមហាបវរធិបតី ហ៊ុន ម៉ាណែត ក្នុងការផ្ដល់ដំណោះស្រាយសម្រាប់អាជីវករនៅផ្សារបឹងឈូកដែលត្រូវភ្លើងឆេះតូបកាលពីថ្ងៃទី៣ ខែវិច្ឆិកា ឆ្នាំ២០២៤កន្លងទៅដោយរដ្ឋសម្រេចទទួលយកមកគ្រប់គ្រង និងជួយជួសជុលឡើងវិញ ព្រមទាំងផ្ដល់ជូនសិទ្ធិគ្រប់គ្រងមួយជីវិតជូនបងប្អូនអាជីវករដែលនជួូប/រាន ពីអ្នកវិនិយោគផ្សារ តែម្ដងដោយមិនចាំបាច់បង់ថ្លៃតូបប្រចាំខែដូចមុនទៀតឡើយ។ចំពោះការជុសជុលតូបដែលបានឆេះឡើងវិញត្រូវរក្សាទម្រង់ដើម ទាំងទំហំ និងចំនួនតូប។

ឯកឧត្តមប្រធានក្រុមការងារ ថ្លែងបញ្ជាក់បន្ថែមថា សម្ដេចមហាបវរធិបតី ហ៊ុន ម៉ាណែត បានជំរុញឱ្យក្រុមការងារសាងសង់ពន្លឿនការជួសជុលផ្សារបឹងឈូកឱ្យបានលឿនបំផុតតាមដែលអាចធ្វើទៅបាន។

ឯកឧត្តមឧបនាយករដ្ឋមន្រ្តី បានថ្លែងនូវការកោតសរសើរចំពោះឯកឧត្តម សុខ លូ ដែលបានខិតខំប្រឹងប្រែងស្វែងរកដំណោះស្រាយជូនអាជីវករផ្សារបឹងឈូកជាបន្តបន្ទាប់តាមដំណាក់កាលតាំងពីពេលឆេះរហូតដល់ទទួលបានដំណោះស្រាយដ៏ល្អឥតខ្ចោះពីប្រមុខរាជរដ្ឋាភិបាល។

សូមរំលឹកថា ឯកឧត្តម សុខ លូ អភិបាលខេត្តបាត់ដំបង បានណែនាំដល់អាជីវករផ្សារបឹងឈូកដែលលក់ដូរជុំវិញផ្សារឆេះកន្លងមក ត្រូវផ្អាកការលក់ដូរមួយរយៈសិនចាប់ពីថ្ងៃទី៧ ខែធ្នូ ឆ្នាំ២០២៤នេះតទៅដើម្បីក្រុមការងារសាងសង់នឹងពន្លឿនការវាយប្លង់សេ និងជញ្ជាំងដែលខូចខាត យកកំទេចកំទីចេញឱ្យបានឆាប់ដើម្បីបងប្អូនអាចចូលលក់ដូរវិញដោយសុវត្ថិភាព។

សំណង់អគារផ្សារបឹងឈូកនេះ បានដំណើរការសាងសង់នៅក្នុងឆ្នាំ១៩៩២ និងសម្ពោធដាក់ឱ្យដំណើរការប្រើប្រាស់នៅក្នុងឆ្នាំ១៩៩៦។អាគារផ្សារបឹងឈូកជាន់ទី១ ត្រូវបានអគ្គិភ័យឆាបឆេះយ៉ាងសន្ធោសន្ធៅនាយប់ថ្ងៃទី៣ ខែវិច្ឆិកាបណ្ដាលឱ្យឆេះអស់តូបចំនួន១៤៨តូប៕