ឯកឧត្តម ហេង សួរ ទទួលជួបពិភាក្សាការងារជាមួយគណៈប្រតិភូក្រុមហ៊ុនជប៉ុន

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បាន​ទទួល​ជួប​ពិភាក្សា​ការងារ​ជាមួយគណៈប្រតិភូក្រុមហ៊ុន មីនេបៀ មីត្សូមី (Minebea Mitsumi) ដែលដឹកនាំ​ដោយ​លោក យ៉ូស៊ីហ៊ីសា កៃនូម៉ា (Yoshihisa KAINUMA) អគ្គនាយកនៃក្រុមហ៊ុន Minebea Mitsumi​។

ក្នុងជំនួបនាឱកាសនេះ ឯកឧត្តម ហេង សួរ បានសម្តែងការស្វាគមន៍ និងអបអរ​សាទរ​ចំពោះ​ក្រុម​ហ៊ុន Minebea ដែលបង្កើតសាខាថ្មីរបស់ខ្លួននៅខេត្តពោធិ៍សាត់ ដែលជារោងចក្រផលិត ដំឡើង និង​បង្គុំ​សមាសធាតុជាក់លាក់គ្រឿងម៉ាស៊ីន និងមេកានិក។ ឯកឧត្តម បានបញ្ជាក់ថា ក្រសួង​ត្រៀម​រួច​ជាស្រេចក្នុងការផ្គត់ផ្គង់កម្លាំងពលកម្មសម្រាប់រោងចក្រថ្មីនេះ ក៏ដូចជាផ្តល់​ការ​បណ្តុះ​បណ្តាល​ដល់​កម្មករនិយោជិតរបស់ក្រុមហ៊ុនផងដែរ។

ឯកឧត្តមរដ្ឋមន្ត្រី ចាត់ទុកប្រតិបត្តិការអាជីវកម្មរបស់ក្រុមហ៊ុន Minebea គឺជាគំរូអាជីវកម្ម​ដ៏​សំខាន់​នៅ​កម្ពុជា ខណៈដែលការរីក​ចម្រើន​របស់​ក្រុមហ៊ុន​ក៏​ជា​ការ​រីក​ចម្រើន​របស់​កម្ពុជា​ដ​គ្នាដែរ​។

ជាការ​ឆ្លើយតប លោក Yoshihisa KAINUMA បានថ្លែងអំណរគុណចំពោះក្រសួងការងារ និង​បណ្តុះបណ្តាលវិជ្ជាជីវៈ ក្នុងការគាំទ្រជាច្រើនសម្រាប់ប្រតិបត្តិការរបស់ក្រុមហ៊ុនជាបន្តបន្ទាប់ ជាពិសេស​គម្រោងបង្កើតរោងចក្រថ្មី Minebea (Cambodia) នៅក្នុងខេត្តពោធិ៍សាត់ ដែល​នឹង​ត្រូវ​ចាប់​ផ្តើមដំណើរការនាឆ្នាំ២០២៥ ខាងមុខនេះ។ លោកបានបញ្ជាក់ថា ក្រុមហ៊ុន Minebea Mitsumi នឹងបន្តធ្វើការជាមួយកម្ពុជាសម្រាប់ភាពរីកចម្រើន និងការអភិវឌ្ឍរួមគ្នា៕អត្ថបទ ឈិត បូរ៉ាវី