អភិបាលខេត្តកំពង់ស្ពឺ ព្រមានមិនលើកលែងឲ្យមន្ត្រីដែលពាក់ព័ន្ធល្បែងស៊ីសង និងកម្ចីអនឡាញ

កំពង់ស្ពឺ៖ ឯកឧត្តម ជាម ច័ន្ទសោភ័ណ អភិបាលខេត្តកំពង់ស្ពឺ បានព្រមាន​ទៅដ​ល់​មន្ត្រី​ក្រោម​ឱវាទ មិនត្រូវមានការពាក់ព័ន្ធនឹងល្បែងស៊ីសង និងកម្ចីប្រាក់តាមអនឡាញជាដាច់ខាត បើ​រក​ថា​មាន​ជាប់​ពាក់ព័ន្ធ នឹងត្រូវទទួលទោសតាមច្បាប់ ខណៈល្បែង​ស៊ីសង​បាន​និង​កំពុង​បង្ក​ជា​ហានិភ័យ​ខ្ពស់​បំផុតសម្រាប់ប្រជាពលរដ្ឋ ។

នៅក្នុងវេទិកាផ្សព្វផ្សាយសារាចរណែនាំ ស្តីពី ការបញ្ឈប់សកម្មភាព​ផ្សព្វ​ផ្សាយ​ល្បែង​ស៊ី​សង​ខុស​ច្បាប់ កាលពីថ្ងៃទី៩ ខែធ្នូ ឆ្នាំ២០២៤ ឯកឧត្តម ជាម ច័ន្ទសោភ័ណ មានប្រសាសន៍ថា បច្ចុប្បន្ន​នៅ​តាម​បណ្តាញសង្គមមួយចំនួន កំពុងអូស​ទាញ​ប្រជាពលរដ្ឋ​ឱ្យ​ចូល​លេង​ល្បែង​ស៊ី​សង​ខុស​ច្បាប់​ដោយផ្ទាល់ ឬអនឡាញ តាមរយៈការផលិតរូបភាព និងមាតិកាល្បែងស៊ីសង ដោយក្នុង​សកម្មភាព​ផ្សព្វ​ផ្សាយ និងចែករំលែកបន្ត (Share) អំពីល្បែងស៊ីសងខុសច្បាប់ទាំងនេះ ក៏​មាន​ការ​ចូល​រួមពីបុគ្គលមានប្រជាប្រិយភាព និងអ្នកផលិតមាតិកាសង្គមមួយចំនួនផងដែរ ដែល​ជា​ហេតុ​ធ្វើ​ឱ្យ​ាធារណជនមានការភាន់ច្រឡំ ើយបន្តចែកចាយរូបភាពវីដេអូ និងមាតិកា​ទាំង​នោះ​ ធ្វើឱ្យប៉ះពាល់យ៉ាងធ្ងន់ធ្ងរដល់សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។

ឯកឧត្តមបន្តថា ជាមួយនោះដោយសារតែវិបត្តិអាជីវកម្ម និងការលង់ខ្លួន និងល្បែងអនឡាញ មាន​ប្រជាពលរដ្ឋមួយចំនួន បានហក់ឡូត ឬបង្ខំចិត្តទៅខ្ចីប្រាក់ពីកម្ចីអនឡាញ ដែលក្នុ​ង​នោះ​អ្នក​ដាក់​កម្ចី​នេះ គឺជាជនបរទេស បានយកអត្រាការប្រាក់ដ៏ច្រើនលើសលប់ ដោយក្នុងនោះ ខ្លះ​មាន​អត្រា​ការ​ប្រាក់​​ ២០ដុល្លារ ទៅ៥០ដុល្លារ ក្នុងកម្ចី១០០ដុល្លារ ដើម្បី​ទ្រទ្រង់​មុខរបរ និង​ដើម្បី​ដោះ​បំណុល ដែលខ្ចីលេងល្បែងអនឡាញ និងដោយសារតែអត្រាការប្រាក់ខ្ពស់ពេកនេះ បានធ្វើឱ្យ​ប្រជា​ពលរដ្ឋខ្លះវ័ណ្ឌកដោះមិនរួច ហើយខ្លះហ៊ានដល់ទៅបញ្ចប់ជីវិត ដើម្បីគេចវេស​ពី​បំណុល​នេះ​ទៀត​ផង។

ដើម្បីពង្រឹងលើកិច្ចការនេះ អភិបាលខេត្តកំពង់ស្ពឺ បានណែនាំ​ទៅ​ដល់​សមត្ថកិច្ច​ពាក់​ព័ន្ធ និង​អាជ្ញាធរ​ក្រុង-ស្រុកទាំង៩ ត្រូវបង្កើនប្រសិទ្ធិភាព នៃការផ្សព្វផ្សាយ ឱ្យបានទូលំទូលាយ​ពី​ផល​ប៉ះ​ពាល់​ នៃការលេងល្បែងស៊ីសងគ្រប់ប្រភេទ ទាំងល្បែងអនឡាញ ល្បែងនៅតាមផ្ទះ ហើយ​ទន្ទឹម​និង​ការ​ផ្សព្វ​ផ្សាយ​នេះ ត្រូវបន្តពិនិត្យតាមដាននូវរាល់សកម្មភាព ទីតាំងបើកល្បែង ពិនិត្យ​រាល់​ឯក​សារ​ពាក់ព័ន្ធ ផ្ទាំងប៉ាណូដែលបង្កប់ស្លាកសញ្ញាល្បែង និងចាត់វិធាន​ការ​ឱ្យ​បាន​តឹង​រឹង​លើ​ការ​ទប់​ស្កាត់​​បង្ក្រាបឱ្យបាន ។

ឯកឧត្តម ជាម ច័ន្ទសោភ័ណ សង្កត់ធ្ងន់ថា ក្នុងនោះម​ន្ត្រីតុលាកា​រត្រូវ​ដាក់​ទោស​ទណ្ឌ​ឱ្យ​បាន​ធ្ងន់​ធ្ងរ​ ដល់អ្នកលេងល្បែងទាំងអស់នោះ ដើម្បីឱ្យមានការរាងចាល ។ ជាងនេះ​នៅរាល់​ការ​បើក​ឱ្យ​មាន​ការ​កម្សាន្តរាត្រី រដ្ឋបាលខេត្ត និងអង្គភាពពាក់ព័ន្ធ ក៏ត្រូវតាមដាន និងបញ្ឈប់រាល់​សកម្មភាព​របស់​តារា​ល្បីៗ ដែលឆ្លៀតឱកាសផ្សព្វផ្សាយពីល្បែងស៊ីសង ឆែកមើល និងរកឱ្យឃើញ ចំពោះ​បណ្តាញ​សង្គម​ណាែលផ្សព្វផ្សាយពីល្បែង ហើយបើរកឃើញ​ត្រូវ​ចាត់​វិធានការ​បង្ក្រាប​ភ្លាម​ដោយ​មិន​ត្រូវទុកយូរឡើយ ៕ អត្ថបទ បាន សុខរិទ្ធិ