សម្តេចធិបតីអះអាងថា ពលរដ្ឋដែលរកចំណូលបានតិចជាង២៥០លានរៀល ក្នុងមួយឆ្នាំមិនត្រូវបង់ពន្ធឡើយ

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានអះអាងថា បងប្អូនណាដែលរកចំណូលបានតិចជាង២៥០លានរៀល ក្នុងមួយឆ្នាំ មិនត្រូវជាប់កាតព្វកិច្ចបង់ពន្ធចូលរដ្ឋនោះឡើយ ខណៈការចុះឈ្មោះ អ្នកសេដ្ឋកិច្ចក្រៅប្រព័ន្ធនេះ គោលបំណងធំបំផុត របស់រាជរដ្ឋាភិបាល គឺដើម្បីជួយលើកស្ទួយជីវភាព របស់បងប្អូនប្រពលរដ្ឋតែប៉ុណ្ណោះ។

ក្នុងឱកាសអញ្ជើញសម្ពោធដាក់ឱ្យដំណើរការថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធ នាថ្ងៃទី១៦ ខែធ្នូ ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើក​ឡើងថា ការដាក់ឱ្យដំណើរការថ្នាលឌីជីថលចុះឈ្មោះអ្នកសេដ្ឋកិច្ច​ក្រៅ​ប្រព័ន្ធនា​ពេលនេះ ​គឺដើម្បីតភ្ជាប់រវាងបងប្អូនប្រជាពលរដ្ឋ ​និងរាជរដ្ឋាភិបាល ហើយក៏ដើម្បីងាយស្រួលជួយរកដំណោះស្រាយដល់បងប្អូនដែលជួបបញ្ហាផងដែរ។

សម្តេច បានបន្ថែមទៀតថា អ្នកសេដ្ឋកិច្ចក្រៅប្រព័ន្ធ ​មានភាពងាយរងគ្រោះជាង​អ្នក​សេដ្ឋកិច្ចក្នុងប្រព័ន្ធ ​ដូច្នេះត្រូវ​ទាមទារ​ការយកចិត្តទុកដាក់ខ្ពស់ចំពោះពួកគាត់។

ជាមួយគ្នានោះដែរសម្តេចធិបតី ហ៊ុន ម៉ាណែត​ ក៏នែំឲ្យក្រសួងឧស្សាហកម្ម បច្ចេកវិទ្យា និងនវានុវត្តន៍ សូម​កុំបង្ករឲ្យមាន​ភាព​ស្មុគស្មាញ​ដល់​បងប្អូន​ប្រជាពលរដ្ឋច្រើន​ពេក​ទាក់ទង​នឹងការ​ចុះឈ្មោះនេះ ហើយក្រសួងត្រូវចុះអប់រំ និងធ្វើការផ្សព្វផ្សាយបន្ថែមទៀតដល់បងប្អូន​តាមសហគមន៍ ​ទាក់ទងនឹងចុះឈ្មោះអ្នកសេដ្ឋកិច្ចក្រៅប្រព័ន្ធនេះ។

ក្នុងនោះ​សម្តេចនាយករដ្ឋមន្រ្តី ក៏បានព្រមានចំពោះអ្នកណាដែលបន្លំប្រជាពលរដ្ឋរត់ការ ដើម្បីបានលុយពីប្រជាពលរដ្ឋទាក់ទង នឹង​ការងារនេះ ។ ដោយសម្តេចធិបតី បានបញ្ជាក់បន្ថែមថា ការចុះឈ្មោះអ្នកសេដ្ឋកិច្ចក្រៅប្រព័ន្ធ គឺមិនត្រូវធ្វើយ៉ាងណាយក​គេងចំណេញ​ពី​បងប្អូន​ប្រជាពលរដ្ឋ​នោះឡើយ ។ សម្តេច ក៏បានឲ្យស្ថាប័នពាក់ព័ន្ធទាំងអស់ត្រូវតាមដាន​ចំពោះ​បញ្ហានេះ​ជាប្រចាំផងដែរ ជៀសវាងបងប្អូនប្រជាពលរដ្ឋចាញ់​បោក​ពួកឱកាសនិយម៕អត្ថបទបាន ចក់