វិស័យសហគ្រាស គ្រឹះស្ថាន និងរោងចក្រ នៅខេត្តកំពង់ស្ពឺ កំពុងផ្ដល់​ការងារដល់​ពលរដ្ឋជាង ៣១ម៉ឺននាក់

កំពង់ស្ពឺ៖ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានថ្លែងថា វិស័យ​សេដ្ឋកិច្ច​ ក្នុងខេត្តកំពង់ស្ពឺ មានការរីកចម្រើនគួរឲ្យកត់សម្គាល់ ដោយក្នុងនោះវិស័យសហគ្រាស គ្រឹះស្ថាន និងរោងចក្រ កំពុងផ្ដល់ការងារដល់ពលរដ្ឋប្រមាណជាង ៣១ម៉ឺននាក់ ដែល​អាច​រក​ប្រាក់​ចំណូល​បានប្រចាំខែ ខណៈរោងចក្រថ្មីៗ ក៏បានកើតឡើងជាបន្តបន្ទាប់ ។

ក្នុងសន្និបាតបូកសរុបលទ្ធផលការងាររបស់រដ្ឋបាលខេត្តកំពង់ស្ពឺ ឆ្នាំ២០២៥ និង​លើក​ទិស​ដៅ​អនុវត្ត​ការងារ​បន្តឆ្នាំ២០២៦ នៅថ្ងៃទី១៤ ខែមករា ឆ្នាំ២០២៦ ឯកឧត្តមអភិបាលខេត្ត មាន​ប្រសាសន៍​ថា គិតត្រឹមឆ្នាំ២០២៥ ខេត្តកំពង់ស្ពឺ មានសហគ្រាស គ្រឹះស្ថាន និងរោងចក្រចំនួន ១ ៥៦៦​កន្លែង ដែលមានកម្មករនិយោជិកកំពុងបម្រើការងារចំនួនជាង ៣១ម៉ឺននាក់ ក្នុង​នោះ​វិស័យ​វាយ​នណភ័ណ្ឌកាត់ដេរសម្លៀកបំពាក់ និងស្បែកជើងចំនួន ៤១៤កន្លែង វិស័យក្រៅ​ពី​កាត់​ដេរ​ចំនួន ១១៥២កន្លែង ។

ឯកឧត្តមបណ្ឌិត បានបន្តថា គិតត្រឹមឆ្នាំដដែលនេះ ខេត្តកំពង់ស្ពឺ មានសហគ្រាសធុនតូច និង​មធ្យម និងសិប្បកម្មសរុបចំនួន ៣១៣មូលដ្ឋាន ដែលមានទុនវិនិយោគសរុបប្រមាណជាង ៤៩​លាន​ដុល្លារ។ មានសហគ្រាសធុនតូច និងមធ្យម និងរោងចក្រកើតថ្មីចំនួន ២៧០រោងចក្រ មាន​ប្រកាស​ពី​ក្រសួង​ចំនួន ១៤៧រោងចក្រ, ចេញសេចក្តីសម្រេចពីរដ្ឋបាលខេត្តចំនួន ៧៧រោងចក្រ និង​ចេញសេចក្តីសម្រេចពីមន្ទីរចំនួន ៤៦រោងចក្រ ។

ឯកឧត្តមបណ្ឌិត ជាម ច័ន្ទសោភ័ណ បានបន្ថែមថា ក្រៅពីវិស័យរោងចក្រសហគ្រាស ខេត្ត​ក៏​មាន​ការ​រីក​ចម្រើន​ផង​ដែរ លើវិស័យកសិកម្ម ក្នុងនោះមានដំណាំស្រូវ ស្វាយ និង​ដំណាំ​កសិកម្ម​មួយ​ចំនួន​ទៀត​ ខណៈខេត្តកំពង់ស្ពឺ ក៏មានការចិញ្ចឹមសត្វជាលក្ខណៈតូចធំរាប់លានក្បាល ជា​មួយ​នឹង​ការ​ពង្រាយ​មន្ត្រីកសិកម្ម ទៅតាមបណ្ដាឃុំ-សង្កាត់ ដើម្បីជួយដោះស្រាយបញ្ហាការដាំដុះកសិករ ។

ឯកឧត្តមអភិបាលខេត្ត បានបន្តទៀតថា នៅក្នុងខេត្តកំពង់ស្ពឺ មានប្រភព​ទឹក​ស្ទឹង​សំខាន់​ៗ​ចំនួ​ន​៣ ​ក្នុងនោះស្ទឹងកព្រែកត្នោត ស្ទឹងក្រាំងពន្លៃ និងស្ទឹងស្លាគូ, មានទំនប់ និងអាង​ទឹក​ចំនួន​៣៧៥​កន្លែង មានប្រឡាយមេសរុបចំនួន២៣៧កន្លែង និងសំណង់សិល្បៈការចំនួន ៦៩៥កន្លែង ដែល​ប្រព័ន្ធ​ធារា​សាស្ត្រទាំងអស់នេះ ពិតជាបានចូលរួមចំណែកជំរុញដល់កំណើនវិស័យឧស្សាហកម្ម សិប្បកម្ម កសិកម្ម និងការប្រើប្រាស់ប្រចាំថ្ងៃរបស់ប្រជាពលរដ្ឋ។

គួរបញ្ជាក់ថា ក្នុងទិសដៅបន្ត រដ្ឋបាលខេត្តកំពង់ស្ពឺ នឹងខិតខំទាក់ទាញការវិនិយោគ ពីក្រៅ​ឲ្យ​មាន​ការ​កើនឡើងជាបន្តបន្ទាប់ ដើម្បីបង្កើតឱកាសការងារ ឲ្យបានកាន់តែច្រើនឡើង សម្រាប់​ប្រជា​ពលរដ្ឋ អាចរកប្រាក់ចំណូល និងជាចលករពុំអាចខ្វះបាន ដើម្បីចូលរួម​ចំណែក​អភិវឌ្ឍ​ខេត្ត​លើ​គ្រប់​វិស័យ៕ អត្ថបទ បាន សុខរិទ្ធិ