មន្ត្រីរាជការ ៤០រូបមកពីក្រសួងចំនួន១០នឹងចូលរួមវគ្គបណ្តុះបណ្តាល ស្តីពី​គោល​នយោបាយ​សាធារណៈ ​និងអភិបាលកិច្ចសម្រាប់មន្ត្រីរាជការកម្ពុជានៅសាធារណរដ្ឋឥណ្ឌា

ឆ្លើយតបតាមសំណើដើម្បីទទួលបានការណែនាំតម្រង់ទិស ឯកឧត្តម ប៉ូល ពីឌូ រដ្ឋ​លេខា​ធិការ​ក្រសួង​មុខងារសាធារណៈ តំណាងដ៏ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រី​ក្រសួង​មុខងារសាធារណៈបានអនុញ្ញាតទទួលជួបសំណេះសំណាល និងសម្តែងការ​គួរសម​ជាមួ​យ​មន្ត្រី​រាជការរបស់កម្ពុជាដែលត្រូវបានចូលរួមវគ្គបណ្តុះបណ្តាលរយៈពេលខ្លី ស្តីពីគោល​នយោបាយ​សាធារណៈ និងអភិបាលកិច្ចសម្រាប់មន្ត្រីរាជការកម្ពុជានៅទីក្រុង Mussorie សាធារណ​រដ្ឋ​ឥណ្ឌា។ វគ្គបណ្តុះបណ្តាលខ្លីនេះ រៀបចំឡើងក្រោមកម្មវិធី (ITEC) ដោយប្រតិភូ​កម្ពុជា​សរុប​ចំនួន ៤០រូបមកពីក្រសួងចំនួន១០ នឹងចូលរួម។

មានប្រសាសន៍ណែនាំ និងផ្តាំផ្ញើរដល់ប្រតិភូទាំងអស់ ឯកឧត្តម ប៉ូល ពីឌូ រដ្ឋលេខាធិការ ក្នុងនាមឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ឯកឧត្តមរដ្ឋលេខាធិការបានមានមតិផ្តាំផ្ញើរចំពោះសិក្ខាកាម គឺត្រូវរក្សាឱ្យបាននូវគុណតម្លៃ នៃភាពជាតំណាងរបស់ជាតិ ប្រជាជន និងមន្ត្រីរាជការស៊ីវិល រក្សាឱ្យបាននូវឧត្តមភាពមន្ត្រីរាជការ និងត្រូវមានភាពបុរេសកម្មរបស់ខ្លួន ត្រូវស្តាប់ការណែនាំរបស់ ប្រធានតំណាង ក្នុងសា្មរតីសាមគ្គីភាពព្រមទាំងបង្ហាញសន្តានចិត្តល្អ រក្សាឱ្យបាននូវសាមគ្គីផ្ទៃក្នុង ផ្តល់ការគោរពឱ្យតម្លៃទៅលើស្ថាប័ន និងគ្រូឧទ្ទេស នៃសាធារណរដ្ឋឥណ្ឌា និងផ្តល់ការគាំទ្រការអភិវឌ្ឍសមត្ថភាពមន្ត្រីកម្ពុជា។

ឯកឧត្តមក៏បានក្រើនរំលឹកឱ្យមន្ត្រីយើង រំលឹកទំនាក់ទំនងល្អជាប្រពៃរវាងរាជរដ្ឋាភិបាល និងប្រជាជនទាំង២ប្រទេស និងផ្តល់ព័ត៌មានទំនាក់ទំនងល្អជាប្រពៃណី ពេលជួបមន្ត្រីរាជការឥណ្ឌា ជាពិសេសត្រូវចូលរួមផ្សព្វផ្សាយពីវិស័យទេសចរណ៍ទៅកាន់ប្រទេសឥណ្ឌា ដើម្បីទាក់ទាញអ្នកទេសចរមកកំសាន្ត។

ជាចុងក្រោយ ឯកឧត្តម ប៉ូល ពីឌូ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានជូនពរសិក្ខាកាមដែលត្រូវទៅសិក្សាវគ្គបណ្តុះបណ្តាលរយៈពេលខ្លីនៅសាធារណរដ្ឋឥណ្ឌា និងពេលត្រឡប់មកវិញប្រកបដោយសុខសុវត្ថិភាព និងទទួលបានជោគជ័យក្នុងការរៀនសូត្រ។ ឯកឧត្តមក៏សង្ឃឹមថា មន្ត្រីសិក្ខាកាមទាំងអស់ នឹងទទួលបានចំណេះដឹង និងបទពិសោធល្អៗ និងមានសារៈសំខាន់ យកទៅបន្តចែករំលែកដល់មន្ត្រីផ្សេងៗតាមស្ថាប័នរៀងៗខ្លួន ព្រមទាំងយកចំណេះដឹង និងបទពិសោធដែលទទួលបានយកទៅអភិវឌ្ឍការងារតាមស្ថាប័នរបស់ខ្លួនប្រកបដោយប្រសិទ្ធភាព៕