ព័ត៌មាន

សមាគមសុខុមាលភាពជនពិការកូរ៉េចង់ចូលរួមលើកកម្ពស់វិស័យសុខាភិបាលនៅកម្ពុជា ពិសេសការងារជួយជនមានពិការភាព

សមាគមសុខមាលភាពជនពិការកូរ៉េ (Korea Disabled Welfare Association – KDWA) បានបង្ហាញគោលបំណងចង់ចូលរួមលើកកម្ពស់វិស័យសុខាភិបាលនៅក្នុងប្រទេសកម្ពុជា ជាពិសេសការងារជួយដល់ជនមានពិការភាព តាមរយៈការផ្ដល់សម្ភារប្រើប្រាស់ និងការបណ្ដុះបណ្ដាល។

ក្នុងជំនួបសម្ដែងការគួរសម និងពិភាក្សាការងារជាមួយឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ កាលពីថ្ងៃទី២៥ ខែមីនា ឆ្នាំ២០២៦ លោកស្រី LEE Ju-yeon នាយកគ្រប់គ្រងគម្រោងអាជីវកម្ម នៃសមាគមសុខមាលភាពជនពិការកូរ៉េ បានឲ្យដឹងថា សមាគមនេះត្រូវបានបង្កើតឡើងក្នុងឆ្នាំ ១៩៨១ ជាសមាគមគាំពារជនពិការដំបូងគេរបស់កូរ៉េ។

លោកស្រី បានបន្តថា សម្រាប់គោលបំណង នៃការមកទស្សនកិច្ចនៅកស្ថានទូតកម្ពុជានេះ ដើម្បីបង្ហាញអំពីបំណងបង្កើតកិច្ចសហប្រតិបត្តិការ ជាមួយស្ថាប័នរដ្ឋ និងអង្គការនៃបណ្តាប្រទេសអាស៊ាន ជាពិសេសកម្ពុជា ដើម្បីបង្កើនការឧបត្ថម្ភគាំពារដល់សកម្មភាពរបស់ជនពិការ ដូចជាការឧបត្ថម្ភនូវសម្លៀកបំពាក់ កៅអីរុញជនពិការ ជើងសប្បនិម្មិត និងវគ្គបណ្តុះបណ្តាលសម្រាប់ជនពិការ ដើម្បីឱ្យពួកគាត់មានលទ្ធភាពក្នុងការបង្កើតមុខរបរចិញ្ចឹមជីវិត ។

បន្ថែមពីនេះ លោកស្រី LEE Ju-yeon ក៏បានលើកឡើងនូវបច្ចេកវិទ្យាថ្មីៗ របស់កូរ៉េ ដែលបញ្ចូលបច្ចេកទេសបញ្ញាសប្បនិម្មិត AI ដើម្បីសម្រួលដល់ការប្រាស្រ័យទាក់ទង របស់ប្រជាជនដែលមានពិការភាពផ្នែកភ្នែក និងត្រចៀកផងដែរ ។

ឯកឧត្តម ឯកអគ្គរាជទូត បានសម្តែងការស្វាគមន៍ ចំពោះគំនិតផ្តួចផ្តើមនេះ ព្រោះប្រទេសកម្ពុជា បានឆ្លងកាត់សង្គ្រាមជាង៣ទស្សវត្សន៍ បន្សល់ទុកនូវប្រជាជនដែលមានពិការភាពប្រមាណ ៧០ម៉ឺននាក់ ដែលរដ្ឋាភិបាលក៏ដូចជាអង្គការនានា បានធ្វើសកម្មភាពជាច្រើន ដើម្បីជួយគាំទ្រដល់ការរស់នៅរបស់ពួកគាត់។

ឯកឧត្តមបានបន្តថា គម្រោងរបស់សមាគមសុខមាលភាពជនពិការកូរ៉េ នឹងអាចជួយសម្រួលជនមានពិការភាពកម្ពុជា ក្នុងជីវភាពរស់នៅ និងអាចជួយបង្កើននូវចំណូលសម្រាប់គ្រួសារ ព្រមទាំងអាចឱ្យពួកគាត់ មានលទ្ធភាពចូលរួមចំណែកជួយដល់ការអភិវឌ្ឍសេដ្ឋកិច្ចជាតិផងដែរ ។

ឯកឧត្តមឯកអគ្គរាជទូត បានជម្រាបប្រតិភូ នៃសមាគមសុខមាលភាពជនពិការកូរ៉េថា ស្ថានទូតត្រៀមខ្លួនជាស្រេច ដើម្បីសហការជាមួយគ្នា រៀបចំជំនួបជាមួយក្រសួង-ស្ថាប័នពាក់ព័ន្ធ និងស្វែងរកអង្គការដៃគូ ដើម្បីសហការជាមួយសមាគមធ្វើការងារនេះ ៕ អត្ថបទ បាន សុខរិទ្ធិ