ក្រសួងពាណិជ្ជកម្ម ជំរុញធ្វើពិពិធកម្មទីផ្សារ ដើម្បីឆ្លើយ​តបការ​កើន​ឡើង​នៃ​ការ​ប្រើប្រាស់​ផលិតផល​ជាតិ

ក្រសួងពាណិជ្ជកម្ម បើកសិក្ខាសាលាស្តីពីការធ្វើពិពិធកម្មទីផ្សារផលិតផលកម្ពុជា ដើម្បី​ឆ្លើយ​តប​ទៅ​នឹង​និន្នាការ​នៃកា​រកើនឡើងនូវ ការប្រើប្រាស់ផលិតផលជាតិ ជំនួសឱ្យផលិតផលនាំចូល ដែល​ជា​កម្លាំងចលករជំរុញ SME បង្កើនការផលិត និងពង្រីកសមត្ថភាពបន្ថែម ដើម្បី​ផ្គត់ផ្គង់​តម្រូវ​​ការ​ទីផ្សារ និងជំរុញការធ្វើពិពិធកម្មទីផ្សារនាំចេញ។

ឯកឧត្តម កៅ កោសល អនុរដ្ឋលេខាធិការក្រសួងពាណិជ្ជកម្ម លើកឡើងនៅក្នុងសិក្ខាសាលាស្តីពី «ការ​ធ្វើ​ពិពិធកម្មទីផ្សារ ផលិតផលកម្ពុជា» នៅថ្ងៃទី៣១ ខែមីនា ឆ្នាំ២០២៦ នេះថា ជុំវិញ​និង​ការ​ចូល​រួម​របស់ភាគីពាក់ព័ន្ធក្នុងសិក្ខាសាលានេះ បានឆ្លុះ បញ្ចាំងឱ្យឃើញពីការប្តេជ្ញាចិត្តយ៉ាងមុតមាំ ក្នុង​ទំនាក់ទំនងភាពជាដៃគូនឹងគ្នារវាងរដ្ឋ និងឯកជន ដើម្បីស្វែងរកឱកាសពង្រីកទីផ្សារ និង​បង្កើន​សមត្ថ​ភាពបន្ថែម លើការធ្វើយុទ្ធសាស្ត្រទីផ្សារបែបទំនើប ក្នុងគោល​បំណង​លើក​កម្ពស់​ការ​ប្រើ​ប្រាស់​ផលិតផលក្នុងស្រុក និងជំរុញការនាំចេញទៅក្រៅប្រទេសឱ្យបានទូលំទូលាយ និង​ប្រកប​ដោយ​ចីរភាព។

ឯកឧត្តម បន្ថែម ទាក់ទិនការរៀបចំសិក្ខាសាលានេះដែរ ក៏ជាផ្នែកមួយនៃយុទ្ធនាការ ដែល​កន្លង​មក​ក្រសួង​បានរៀបចំគាំទ្រ និងជំរុញការប្រើប្រាស់ផលិតផលខ្មែរជាច្រើនលើកច្រើនសារ ដើម្បី​ឆ្លើយ​តប​ទៅនឹងនិន្នាការនៃការកើនឡើង នូវការប្រើប្រាស់ផលិត ផលជាតិរបស់ប្រជាជនកម្ពុជា ជំនួស​ឱ្យផលិតផលនាំចូល ដែលនេះជាកំលាំងចលាករជំរុញឱ្យសហគ្រាសធុនតូច និងមធ្យម ចាប់​ផ្តើមបង្កើនការផលិតទំនិញក្នុងស្រុក និងពង្រីកសមត្ថភាពខ្លួនឯងបន្ថែមទៀត ដើម្បី​ផ្គត់​ផ្គង់​តាម​តម្រូវ​ការ​ទីផ្សារ​នា​ពេលបច្ចុប្បន្ន ក៏ដូចជា ដើម្បីជំរុញការធ្វើពិពិធកម្មទីផ្សារនាំចេញ និង​បង្កើន​ចំណែក​ទីផ្សារ​អន្តរជាតិ។

ដោយឡែកផលិតករធំៗកំពុងប្រតិបត្តិការអាជីវកម្មក្នុងស្រុក ថ្លែងថា សិក្ខា​សាលា​ស្តីពី​ការ​ធ្វើ​ពិពិធកម្ម​ទីផ្សារផលិតផលកម្ពុជា ខាងលើនេះ ពិតជាមានសារៈសំខាន់ណាស់ គឺជា​យុទ្ធសាស្ត្រ​ពង្រី​កវិ​សាលភាពនៃការលក់ ឬការនាំចេញទៅកាន់អតិថិជន តំបន់ និង ប្រទេសផ្សេងៗទៀត ដើម្បី​កាត់​បន្ថយការពឹងផ្អែកលើទីផ្សារតែមួយ ហើយនេះ​ក៏​ជា​ការ​បង្ហាញ​ឱ្យ​ឃើញ​អំពី​ការ​ខិត​ខំ​ប្រឹង​ប្រែង​របស់ក្រសួងពាណិជ្ជកម្ម ក្នុងការជួយបើក​ទីផ្សារ​ឱ្យ​វិស័យ​ឯកជន​កាន់​តែ​រី​ក​ធំ​ធាត់​ឡើង​។

ឯកឧត្តម កៅ កោសល លើកឡើងឱ្យដឹងថា ក្រសួង​ពាណិជ្ជកម្ម​ក្នុង​នាម​ជា​សេនាធិការ​របស់​រាជ​រដ្ឋាភិបាល​ បាននិងកំពុងបន្តធ្វើការកែ ទម្រង់យ៉ាងមុតស្រួច ជាពិសេសលើ​កិច្ច​សម្រួល​ពាណិជ្ជ​កម្ម​ ដើម្បីជំរុញការនាំចេញ និងទាក់ទាញវិនិយោគិនទាំងក្នុងនិងក្រៅប្រទេស ឱ្យមក​វិនិយោគ​នៅ​កម្ពុជា​តាម​រយៈ ការកសាងលិខិតបទដ្ឋានគតិយុត្តនានា ស្របតាមការវិវត្តនៃសេដ្ឋកិច្ចនិងសង្គម, ការ​បន្តធ្វើទំនើប កម្មប្រព័ន្ធស្វ័យប្រវត្តិកម្មលើការផ្តល់សេវាសាធារណៈរបស់ក្រសួង, ការ​ចរចា​បើក​ទីផ្សារ​តាមរយៈការរៀបចំឱ្យមានកិច្ចព្រមព្រៀង ពាណិជ្ជកម្មសេរី ទាំងក្នុង​ក្រប​ខ័ណ្ឌ​ទ្វេ​ភាគី​ពហុ​ភាគី តំបន់និងពិភពលោក, ការបង្កើតមជ្ឈមណ្ឌលពាណិជ្ជកម្មឯកជនកម្ពុជា ដើម្បី តាំង​បង្ហាញ ​និងផ្សព្វផ្សាយផលិតផលខ្មែរ, ការរៀបចំពិព័រណ៍ពាណិជ្ជកម្មកម្ពុជា, ការដាក់​ឱ្យ​ប្រើប្រា​ស់​ផ្សារ​អេឡិចត្រូនិក CambodiaTrade.com និងថ្មីៗនេះក្រសួងក៏បានដាក់ឱ្យដំណើរការ “យុទ្ធនា​ការ​ផលិតផលជាតិ”ជាដើម ក្នុងគោលបំណងលើក កម្ពស់ការយល់ដឹង និងជំរុញការ​ប្រើ​ប្រាស់​ផលិត​ផល​ក្នុងស្រុក ស្របតាមនិន្នាការកើនឡើងនៃការគាំទ្រផលិតផលខ្មែរ និងបង្ហាញក្តី ស្រលាញ់​ផលិតផលខ្មែរ៕ អត្ថបទ៖ សុន រ៉ាឌី