ប្រមុខការទូតកម្ពុជា អញ្ជើញជាអធិបតីក្នុងពិធីជប់លៀងដើម្បីអបអរទិវាអន្តរជាតិហ្វ្រង់កូហ្វូនី ក្រោម​មូល​បទ «ជំនាន់Z ជំនាន់សន្តិភាព? ការចូលរួមចំណែក​របស់​យុវជន ដើម្បី​ពិភព​លោក​ប្រកប​ដោយ​សន្តិភាព»

ភ្នំពេញ៖ នៅល្ងាចថ្ងៃទី៣១ ខែមីនា ឆ្នាំ២០២៦ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រី​ការ​បរទេស និងសហប្រតិបត្តិការអន្តរជាតិ បានអញ្ជើញ​ជា​អធិបតី​ក្នុង​ពិធី​ជប់​លៀង​ដើម្បី​អបអរ​ទិវា​អន្តរជាតិ​ហ្វ្រង់កូហ្វូនី ក្រោមមូលបទ « ជំនាន់Z ជំនាន់សន្តិភាព? ការចូលរួមចំណែក​របស់​យុវជន​ដើម្បី​ពិភពលោកប្រកបដោយសន្តិភាព» នៅសណ្ឋាគាររ៉ូសវូដភ្នំពេញ ដោយមានការ​អញ្ជើញ​ចូល​រួម​ពីឥស្សរជនជាថ្នាក់ដឹកនាំមកពីស្ថាប័ននីតិបញ្ញត្តិ បណ្ដាក្រសួង/ស្ថាប័ន​នៃ​រាជ​រដ្ឋាភិបាល តំណាងអង្គទូតបរទេស និងឯកឧត្ដមឯកអគ្គរដ្ឋទូតបារាំង ដែលបាន​ចូលរួ​ម​ជា​គណៈ​អធិបតី​ ព្រមទាំងតំណាងមកពីវិស័យសាធារណៈ និងវិស័យឯកជនហ្វ្រង់កូហ្វូន ប្រមាណ ២០០​នាក់​។

ពិធីនេះធ្វើឡើងដើម្បីរំលឹកខួបនៃការបង្កើតអង្គការអន្តរជាតិហ្វ្រង់កូហ្វូនី កាលពីថ្ងៃទី២០ ខែមីនា ឆ្នាំ​១៩៧០ នៅទីក្រុង Niamey ប្រទេសនីហ្សេ ផងដែរ។ ជាងនេះ​ទៅ​ទៀត នៅចុងឆ្នាំ២០២៦ នេះ កម្ពុជានឹងទទួលធ្វើជាម្ចាស់ផ្ទះរៀបចំកិច្ចប្រជុំកំពូលហ្រ្វង់កូហ្វូនីលើកទី២០ ក្រោមមូលបទ «ខិត​ខំ​ថែរក្សាសន្តិភាពឡើងវិញ ដើម្បីវិបុលភាពរួម និងស្ថិរភាពយូរអង្វែង»៕