រដ្ឋបាលខេត្តកំពង់ស្ពឺ ត្រៀមនំត្នោតចំនួន១លាននំ សម្រាប់​ទទួល​ភ្ញៀវ​ទេសចរ​ទៅ​លេង​សង្ក្រាន្ត​ឆ្នាំថ្មី

កំពង់ស្ពឺ៖ នៅក្នុងពិធីអបអរសាទរកំពង់ស្ពឺសង្ក្រាន្តឆ្នាំថ្មី ឆ្នាំ២០២៦ រដ្ឋបាល​ខេត្ត​កំពង់​ស្ពឺ​ក្រោម​ការ​ផ្តួច​ផ្តើម​របស់​ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ និងលោកជំទាវ ម៉េង វ៉ាន់ដានីន បានរៀបចំព្រឹត្តិការណ៍សង្ក្រាន្ត ដោយរៀបចំវេចខ្ចប់នំធ្វើពីត្នោតទុំ ដើម្បី​ដាក់​ទទួល​ភ្ញៀវ​ទេសចរជាតិ អន្តរជាតិពិសាដោយឥតគិតថ្លៃ។

ឯកឧត្តមបណ្ឌិត ជាម ច័ន្ទសោភ័ណ មានប្រសាសន៍ថា ត្នោតជាអត្តសញ្ញាណជាតិ អត្ត​សញ្ញាណនៃ​អ្ន​កកំពង់ស្ពឺ ។ ដូច្នេះដើម្បីលើកកម្ពស់ នៃអត្តសញ្ញាណជាតិដ៏លេចធ្លោនេះ រដ្ឋ​បាល​ខេត្ត​ បានរៀបចំដោយយកផ្លែត្នោតទុំមកធ្វើជានំចំរុះ ដើម្បីត្រៀមទទួលស្វាគមន៍ និងចែក​ជូន​ភ្ញៀវ​ទេសចរ​ជាតិ ​និងអន្តរជាតិដែលមកកម្សាន្តក្នុងព្រឹត្តិការណ៍ “កំពង់ស្ពឺសង្ក្រាន្ត” សម្រាប់ឆ្នាំ​នេះ​ឆ្នាំ​២០២៦។

ឯកឧត្តមអភិបាលខេត្ត បានបន្តថា ការរៀបចំឱ្យមានវត្តមាននំត្នោត សម្រាប់​ជូន​ដល់​ភ្ញៀវ​ទេសចរ​សម្រាប់​ពិសា ​ក្នុងឱកាសសង្ក្រាន្ត មិនត្រឹមតែបង្ហាញពីការបដិសណ្ឋារកិច្ច ដ៏កក់ក្តៅប៉ុណ្ណោះទេ ប៉ុន្តែ​វា​បាន​ទាំងជាការចូលរួមលើកកម្ពស់កសិផលខ្មែរ និងបង្ហាញពីសក្តានុពលដ៏សម្បូរបែប នៃ​ទឹក​ដី​ខេត្ត​កំពង់ស្ពឺ។ ជាងនេះ គឺបានបង្ហាញពីរសជាតិ នៃនំត្នោតដែលវេចខ្ចប់ដោយដៃ របស់​អ្នក​កំពង់​ស្ពឺ​ផងដែរ ។

គួរបញ្ជាក់ថា ដើម្បីអបអរសាទរមហាព្រឹត្តិការណ៍កំពង់ស្ពឺសង្ក្រាន្តឆ្នាំថ្មីនេះ អភិបាលខេត្តកំពង់ស្ពឺ បាន​អំពាវនាវដល់បងប្អូនប្រជាពលរដ្ឋ ភ្ញៀវជាតិ អន្តរជាតិ ទៅលេងឱ្យបានច្រើនកុះករ ហើយ​សូម​ចូល​រួមលេងកម្សាន្ត ជាមួយល្បែងប្រជាប្រិយគ្រប់ប្រភេទ ដែលរៀបចំដោយក្រុមការងារ ហើយ​សូមអញ្ជើញមកទទួលយករសជាតិដើមដ៏ឈ្ងុយឆ្ងាញ់ នៃនំត្នោតចំរុះចំនួន១លាននំ ដោយ​ឥត​គិត​ថ្លៃ នៅបរិវេណសួនសម្តេចសង្ឃជួនណាត ចាប់ពីថ្ងៃទី១៤-១៥-១៦ ខែមេសា ឆ្នាំ២០២៦ ៕ អត្ថបទ បាន សុខរិទ្ធិ