ប្រជាពលរដ្ឋ និងមន្ត្រីតាមមូលដ្ឋានរៀបចំពិធីទទួលទេវតាឆ្នាំថ្មី តាមទំនៀមទម្លាប់ប្រពៃណីខ្មែរ

គ្រួសារពលរដ្ឋខ្មែរតាមខ្នងផ្ទះ និងមន្ត្រី អាជ្ញាធរមូលដ្ឋាន មានការរៀបចំតុបតែងរានរណ្តាប់ទទួលទេវតា ឆ្នាំថ្មី យ៉ាងស្រស់ស្អាតទៅតាមទំនៀមទម្លាប់តតាំងពីបុរាណមក ដោយមិនអាចអាកខានបាន ដើម្បីទទួលអំណរសាទរទេវតាឆ្នាំថ្មី ព្រះនាម “រាក្យសាទេវី” បុត្រីទី៣ កបិលមហាព្រហ្ម ទ្រង់យាងចុះ នៅវេលាម៉ោង១០:៤៨ ព្រឹក ថ្ងៃទី១៤ ខែមេសាឆ្នាំ២០២៦នេះ។

ពលរដ្ឋ តាមខ្នងផ្ទះ និងមន្ត្រី អាជ្ញាធរមូលដ្ឋាន នៅខេត្តកណ្តាល ថ្លែងថា រៀងរាល់ឆ្នាំ តាមប្រពៃណីទំនៀមទម្លាប់ខ្មែរ ពលរដ្ឋតាមកេហដ្ឋាន គឺមានរៀបចំសម្អាតផ្ទះ តុបតែងដាក់ភ្លើងលម្អរកេហដ្ឋាន រៀបចំរានរណ្តាប់ថ្វាយទេវតាឆ្នាំចាស់ផ្លាស់ចូលឆ្នាំថ្មី ដោយមិនអាចខានបានឡើយ ហើយសម្រាប់ការរៀបចំតុបតែងរានទទួលទេវតា ឆ្នាំថ្មី ឆ្នាំមមី អដ្ឋស័ក ព.ស ២៥៧០ ឆ្នាំនេះតាមទម្លាប់ គឺគេបានរៀបចំក្រាលសំពត់ រៀបគ្រឿងសក្ការបូជាទេវតា រួមមាន៖ បាយសី បាយសីប៉ាឆាម ស្លាធម៌ ធូប ទៀន ទឹកអប់ប្រេងម្សៅ ផ្កាភ្ញី ចេកនួន ចេកណាំវ៉ា ផ្លែឈើច្រើនមុខដាក់លើជើងពាន ដូងឡៅ និងទឹកស្អាតជាដើម ទៅតាមលទ្ធភាពធនធានដែលខ្លួនមាន។

នៅក្នុងវេលាទទួលទេវតា ឆ្នាំថ្មី ព្រះនាម “រាក្យសាទេវី” យាងចុះនៅវេលាម៉ោង១០:៤៨ព្រឹកមិញនេះ ក្រុមគ្រួសារពលរដ្ឋបានជួបជុំគ្នា ធ្វើពិធីនមស្សការថ្វាយបង្គំ ព្រំរតនៈត្រ័យ ហើយបានតាំងចិត្តស្អាតបរិសុទ្ធជ្រះស្រឡះនូវមន្ទិលទាំងពួង និងបានបួងសួងសុំសេចក្តីសុខចម្រើនក្នុងគ្រួសារបងប្អូនសាច់ញ្ញាតិ ប្រកបរបរ ការងារ មានភាពជោគជ័យ រីកចម្រើន ជាពិសេសជាងនេះ ពលរដ្ឋនានានោះ ក៏បានបួងសួងសូមវីរៈកងទ័ពខ្មែរជួរជើងតាមតំបន់ព្រំដែន មានសុខភាពល្អ កម្លាំងពលំខ្លាំងក្លា ឈ្នះអស់ខ្មាំងសត្រូវឈ្លានពាន ប្រទេសជាតិមានសុខសន្តិភាព មានការអភិវឌ្ឍ រីកចម្រើនគ្រប់វិស័យ ។

សូមបញ្ជាក់ថា ពិធីបុណ្យចូលឆ្នាំថ្មី ប្រពៃណីខ្មែរ ឆ្នាំមមី ព.ស ២៥៧០ ប្រារព្វឡើងរយៈពេលបីថ្ងៃជាប់ៗគ្នា ៖ ថ្ងៃទី១ គឺជាថ្ងៃចូលឆ្នាំ ឬជាថ្ងៃមហាសង្ក្រាន្ត ដែលឈានចូលនៅថ្ងៃអង្គារ៍ ១២រោច ខែចេត្រ ត្រូវនឹងថ្ងៃទី១៤ ខែមេសា ឆ្នាំ២០២៦ វេលាម៉ោង ១០: ៤៨នាទីព្រឹក ថ្ងៃទី២ គឺជាថ្ងៃ វារៈវន័បត ថ្ងៃទី៣ គឺជាថ្ងៃ វារៈឡើងស័ក គម្រប់ជាសង្ក្រាន្តបីថ្ងៃ។

អត្ថបទ ស៊ុម សុខជា