ភោជនីយដ្ឋាននានានៅភ្នំពេញរីករាយក្រោយចូលឆ្នាំនេះរកប្រាក់ចំណូលបានច្រើនជាងថ្ងៃធម្មតា

ម្ចាស់ភោជនីយដ្ឋានជាច្រើននៅរាជធានីភ្នំពេញ បាននិយាយឱ្យដឹង ពិធីបុណ្យចូលឆ្នាំថ្មីប្រពៃណីជាតិ គឺជាពេលវេលាដ៏សំខាន់សម្រាប់រកប្រាក់ចំណូលខ្ពស់ជាងថ្ងៃធម្មតា ដោយសារកំណើនអតិថិជនជួបជុំគ្នា។ អាជីវកម្មសេវាកម្មម្ហូបអាហារ និងតំបន់កម្សាន្តនានា រៀបចំសង្ក្រាន្ត និងតុបតែងលម្អ ដើម្បីទាក់ទាញភ្ញៀវទេសចរ និងអ្នកស្នាក់នៅទីក្រុងឱ្យមកប្រើប្រាស់សេវាកម្ម។

ជួបសម្ភាសន៍ជាមួយម្ចាស់ភោជនីយដ្ឋាន និងអ្នកគ្រប់គ្រងទូទៅនៃហាងនានា ក្នុងតំបន់បាសាក់ឡេន ដែលគេនិយមឱ្យឈ្មោះថា ផាប់ស្រ្ពីតទី២បន្ទាប់ពីខេត្តសៀមរាប ដែលមានទីតាំងស្ថិតនៅខណ្ឌចំការមន រាជធានីភ្នំពេញ ពួកគាត់បានឱ្យព័ត៌មាន ប៊ីធីវី ដឹងកាលពីរាត្រីថ្ងៃទី១៤ ខែមេសាកន្លងទៅថា សម្រាប់ពិធីបុណ្យចូលឆ្នាំប្រពៃណីជាតិខ្មែរឆ្នាំ២០២៦នេះ មានក្តីសង្ឃឹមទុកថា នឹងមានភ្ញៀវច្រើនកុះករមកលេងកម្សាន្តក៏ដូចជាទទួលអាហារនៅទីនេះ ដោយសារតែឆ្នាំនេះ កម្ពុជាមានរៀបចំព្រឹត្តិការណ៍ “នគរសង្រ្កាន្ត” ដែលជាកម្មវិធីដ៏សំខាន់និងវិសេសវិសាលជាខ្លាំងក្នុងការថែរក្សាការពារ វប្បធម៌ ទំនៀមទម្លាប់ ប្រពៃណី របស់ដូនតា និងការស្គាល់ច្បាស់ពីអត្តសញ្ញាណជាតិ គឺជាផ្នែកមួយ នៃខឿនការពារជាតិដ៏រឹងមាំរបស់ប្រជាជន។

តំណាងភោជនីយដ្ឋានផ្សេងៗទៀត បានលើកឡើងស្រដៀងដែរថា ជារៀងរាល់ឆ្នាំ ក្នុងរដូវបុណ្យទាននានា ជាពិសេសរដូវបុណ្យចូលឆ្នាំប្រពៃណីជាតិខ្មែរ កត់សម្គាល់ឃើញថា ការរកប្រាក់ចំណូលគឺល្អប្រសើរច្រើនជាងថ្ងៃធម្មតា ដោយសារមានការជួបជុំគ្នាដើរលេងកម្សាន្តក្នុងថ្ងៃឈប់សម្រាក។ កាន់តែពិសេសជាងនេះថែមទៀត ដោយសាររាជរដ្ឋាភិបាល និងសហភាពសព័ន្ធយុវជនកម្ពុជា (ស.ស.យ.ក.) បានបង្កើតនិងរៀបចំព្រឹត្តិការណ៍ល្អៗ ដើម្បីញាំងឱ្យបរិយាកាសកាន់តែអ៊ូអរ និងសប្បាយរីករាយ។

ព្រឹត្តការណ៍ នគរសង្ក្រាន្ត រៀបចំឡើងក្នុងគោលបំណង មានដូចជា៖ ដើម្បីការថែរក្សាការពារ វប្បធម៌ ទំនៀមទម្លាប់ ប្រពៃណីរបស់ដូនតា និងការស្គាល់ច្បាស់ពីអត្តសញ្ញាណជាតិ គឺជាផ្នែកមួយនៃខឿនការពារជាតិដ៏រឹងមាំរបស់ប្រជាជន, ការទាក់ទាញទេសចរឱ្យមកទស្សនាកម្ពុជា និងយុទ្ធនាការ “ចូលឆ្នាំខ្មែរ មកលេងស្រុកខ្មែរ – Homecoming” ដោយ ផ្សព្វផ្សាយទៅកាន់បងប្អូនប្រជាពលរដ្ឋខ្មែរឯនាយសមុទ្រ អំពីអត្ថន័យនៃការជួបជុំសាច់ញាតិបងប្អូន ក្នុងឱកាសពិធីបុណ្យចូលឆ្នាំថ្មី ប្រកបដោយភាពកក់ក្តៅ និងមនោសញ្ចេតនានឹកនា និងវិលត្រឡប់មកលេងស្រុកកំណើតវិញ និងការផ្សារភ្ជាប់ជាមួយវីរកងកម្លាំង និងជនភៀសសឹក ដែលបង្ហាញពីការដឹងគុណ និងការយកចិត្តទុកដល់ពួកគាត់ ដែលកំពុងប្រឈមពីការឈ្លានពានជាដើម៕

អត្ថបទ៖ ឈិត បូរ៉ាវី