ប្រជាពលរដ្ឋខេត្តកំពង់ឆ្នាំង ចូលរួមលេងល្បែងប្រជាប្រិយជាមួយ រដ្ឋបាលខេត្ត រីករាយក្រោមសន្តិភាព

ពិធីបើកសង្ក្រាន្តនៃបុណ្យចូលឆ្នាំថ្មីប្រពៃណីខ្មែររបស់រដ្ឋបាលខេត្តកំពង់ឆ្នាំង ដែលបានប្រព្រឹត្តិទៅនៅរសៀលថ្ងៃទី១៤ ខែមេសា ឆ្នាំ២០២៦នេះ មានប្រជាពលរដ្ឋជាច្រើនកុះករ ចូលរួមសប្បាយរីករាយនឹងការលេងល្បែងប្រជាប្រិយប្រពៃណីខ្មែរ រាំលេងកម្សាន្តយ៉ាងសប្បាយរីករាយជាមួយថ្នាក់ដឹកនាំ ក្រោមដំបូលសុខសន្ដិភាព។

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានថ្លែងថា ពិធីចូលឆ្នាំថ្មីប្រពៃណីខ្មែរឆ្នាំនេះ រដ្ឋបាលខេត្តកំពង់ឆ្នាំង បានធ្វើខុសពីពិធីចូលឆ្នាំមុនៗ ដោយរដ្ឋបាលខេត្តបានរៀបចំជារបាំប្រៃណីខ្មែរជាច្រើនប្រភេទ សម្រាប់បងប្អូនទស្សនាកំសាន្ត និងបានស្គាល់ពីទំនៀមទំលាប់ប្រពៃណីខ្មែរយើងពីដូនតា។

ក្នុងនោះ មានការដាក់តាំងបង្ហាញនូវការធ្វើនំគ្រក់ នំបញ្ចុក ធ្វើអន្សម និងនំជាច្រើនប្រភេទផ្សេងទៀត ការលេងល្បែងប្រជាប្រិយប្រពៃណីខ្មែរ បោះអង្គុញ ចោលឈូង ទាញព្រ័ត្រ វាយក្អម លាក់កន្សែង និងល្បែងដទៃទៀត រួមនឹងការប្រគុំតន្ត្រីសម័យជាច្រើនវង់ និងតាមទីតាំងផ្សេងៗគ្នា។ ការដាក់តាំងបង្ហាញ និងការរៀបចំទាំងនេះ ក្នុងន័យឱ្យបងប្អូនប្រជាពលរដ្ឋក្នុងខេត្ត ភ្ញៀវទេសចរជាតិ អន្តរជាតិ បានលេងសប្បាយ និងបានស្គាល់ច្បាស់ពីទំនៀមទម្លាប់ប្រពៃណីខ្មែរ។

ពិធីបុណ្យចូលឆ្នាំខ្មែរឆ្នាំនេះ មានប្រជាពលរដ្ឋចូលរួមយ៉ាងច្រើនកុះករនៅមុខ​ និងខាងក្នុងសាលាខេត្តកំពង់ឆ្នាំង ជាមួយនឹងទឹកមុខសប្បាយរីករាយ ហ៊ោរកញ្រ្ជៀវ រីករាយ ហាក់បង្ហាញពីសេចក្ដីសុខពេញបេះដូង ចំពោះការរៀបចំសង្ក្រាន្តដ៏អស្ចារ្យនេះរបស់ថ្នាក់ដឹកនាំខេត្តកំពង់ឆ្នាំង ពិសេសគឺប្រជាពលរដ្ឋបានរស់នៅក្រោមម្លប់សុខសន្តិភាព ដែលដឹកនាំដោយ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា៕ ដោយ ៖ ហុង វាសនា