ស្នងការ៖ស្ថានភាពសន្តិសុខក្នុងព្រឹត្តិការណ៍នគរសង្ក្រាន្តមានភាពល្អប្រសើរមិនមានបាតុភាពណាមួយកើតឡើងទេ

ភ្នំពេញ៖ស្នងការនគរបាលរាជធានីភ្នំពេញបានបញ្ជាក់ថា នៅថ្ងៃទី២ នៃពិធីបុណ្យចូលឆ្នាំថ្មី ប្រពៃណីជាតិខ្មែរ គឺមានប្រជាពលរដ្ឋមួយទ្វេជាបីបាននាំគ្នាមកដើរលេងកំសាន្តនៅរមណីយដ្ឋានវត្តភ្នំ ពោលគឺច្រើនជាងថ្ងៃទី១។ ហើយមកដល់ពេលនេះ គឺមិនមានអ្វីកើតឡើងដែលជាការព្រួយបារម្ភនោះទេ ដោយសារប្រជាពលរដ្ឋមានការយល់ដឹងច្រើន។

ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានដឹកនាំកងកម្លាំងអាជ្ញាធរមានសមត្ថកិច្ចចុះពិនិត្យក្នុងការការពារសន្តិសុខ សុវត្ថិភាព របៀបរៀបរយជូនប្រជាពលរដ្ឋ ភ្ញៀវជាតិ និងអន្តរជាតិនៅក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ នាថ្ងៃទី២ ថ្ងៃទី១៥ ខែមេសា ឆ្នាំ២០២៦។

ឯកឧត្តម ឧត្តមសេនីយ៍ឯក ជួន ណារិន្ទ បានមានប្រសាសន៍ថ្លែងប្រាប់ BTV ថា តាមប្រសាសន៍ដឹកនាំដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្ត្រី

គឺយករាជធានីភ្នំពេញធ្វើនគរសង្ក្រាន្ត។ ក្នុងនាមគណៈបញ្ជាការរាជធានីភ្នំពេញក្រោមការចង្អុលបង្ហាញរបស់អគ្គស្នងការដ្ឋាននគរបាលរាជធានីភ្នំពេញ ស្នងការដ្ឋាននគរបាលរាជធានីភ្នំពេញ បានពង្រាយកម្លាំងជាង ៣៦០០នាក់ គ្រប់គោលដៅការពារកន្លែងសប្បាយភាព សម្រួលចរាចរណ៍កុំឲ្យកកស្ទះ និងនៅតាមវត្តអារាម។ ហើយនៅថ្ងៃទី២ នៃពិធីបុណ្យចូលឆ្នាំខ្មែរ គឺមាន ប្រជាពលរដ្ឋមួយទ្វេជាបីបាននាំគ្នាមកលេងកំសាន្តនៅវត្តភ្នំ ពោលគឺច្រើនជាងថ្ងៃទី១។

ឯកឧត្តមស្នងការបានបញ្ជាក់ថា គិតមកដល់ពេលនេះ គឺមិនមានអ្វីកើតឡើងដែលជាការព្រួយបារម្ភនោះទេ ដោយសារប្រជាពលរដ្ឋមានការយល់ដឹងច្រើន។ ហើយបញ្ហាសន្តិសុខ សណ្តាប់ធ្នាប់ ក៏មិនមានបញ្ហាអ្វីដែរ គឺមានតែភាពសប្បាយរីករាយ។ អត្ថបទ: វង្ស សុភាព

, រូបភាព អាត់ សុធា