ពីរថ្ងៃដំបូងនៃពិធីបុណ្យចូលឆ្នាំថ្មី រាជធានីភ្នំពេញ ទាក់ទាញទេសចរជាតិ-អន្តរជាតិ ជិត២,៦លាននាក់

ភ្នំពេញ៖ របាយការណ៍មន្ទីរទេសចរណ៍រាជធានីភ្នំពេញ បានឲ្យដឹងថា នៅក្នុងរយៈពេលពីរថ្ងៃដំបូង នៃការរៀបចំព្រឹត្តិការណ៍នគរសង្ក្រាន្ត អបអរសាទរបុណ្យចូលឆ្នាំថ្មី ប្រពៃណីជាតិខ្មែរ រាជធានីភ្នំពេញ ទទួលបានពលរដ្ឋ និងភ្ញៀវទេសចរជាតិ អន្តរជាតិ ដើរកម្សាន្តសប្បាយ ប្រមាណជិត២លាន ៦សែននាក់ ដែលចំនួននេះ មានការកើនឡើងបើប្រៀបធៀបនឹងឆ្នាំមុន។

លោក ម៉ម វាសនា ប្រធានមន្ទីរទេសចរណ៍រាជធានីភ្នំពេញលោក ម៉ម វាសនា បានឲ្យដឹងថា ចំនួនពលរដ្ឋ និងភ្ញៀវទេសចរជាតិអន្តរជាតិ ដើរកម្សាន្តនៅរាជធានីភ្នំពេញ មានការកើនឡើងច្រើនជាងឆ្នាំមុន ដោយសារ ឆ្នាំនេះ មានការរៀបចំព្រឹត្តិការណ៍នគរសង្ក្រាន្ត សាទរឆ្នាំថ្មី ហើយគោលដៅដែលមានការដើរកម្សាន្តច្រើនជាងគេ រួមមាន៖ រមណីយដ្ឋានទេសចរណ៍ វប្បធម៌ ប្រវត្តិសាស្ត្រវត្តភ្នំ, ភូមិវប្បធម៌, ផ្លូវថ្មើជើងចតុមុខ, ព្រះបរមរាជវាំង, សួនវត្តបុទុមវតី, ផ្សារទួលទំពូង, អាកាសយានដ្ឋានអន្តរជាតិភ្នំពេញ (ចាស់), បាសាក់លែន និងគោលដៅទេសចរណ៍ជាយរាជធានីភ្នំពេញច្រើនកន្លែងទៀត៕