ស.ស.យ.ក និងគណៈបញ្ជាការឯកភាព​រាជធានី​ភ្នំពេញ​វាយ​តម្លៃ​ខ្ពស់​ពី​ការ​រៀប​ចំ​ព្រឹត្តិការណ៍​នគរសង្ក្រាន្ត

សហភាពសហព័ន្ធយុវជនកម្ពុជា និងគណៈបញ្ជាការឯកភាពរាជធានីភ្នំពេញបានវាយតម្លៃថា ពិធី​បុណ្យ​ចូល​ឆ្នាំថ្មី ប្រពៃណីជាតិខ្មែរ និងព្រឹត្តិការណ៍«នគរសង្ក្រាន្ត» រយៈពេល៥ថ្ងៃ ពីថ្ងៃទី១៤-១៨ ខែ​មេសា ឆ្នាំ២០២៦ បានប្រព្រឹត្តទៅដោយរលូន សន្តិសុខ សុវត្ថិភាព មានភាពល្អប្រសើរ។ ហើយ​មានប្រជាពលរដ្ឋ និងភ្ញៀវបរទេសដើរលេងកម្សាន្ត​ជាង ៧លាន ៣សែននាក់។

ការវាយតម្លៃនេះ នៅក្នុងកិច្ចប្រជុំគណៈបញ្ជាការឯកភាពរាជធានីភ្នំពេញនៅព្រឹកថ្ងៃទី១៨ ខែ​មេសា ឆ្នាំ២០២៦ នេះឆ្នាំ២០២៦ ដឹកនាំដោយឯកឧត្តម ឃ្លាំង ហួត អភិបាលរងរាជធានីភ្នំពេញ និង​ដោយ​មានការចូលរួមពីសំណាក់មន្ត្រីអាជ្ញាធរមានសមត្ថកិច្ចដែលពាក់ព័ន្ធ។

ឯកឧត្តម សុខ សប្បាយណា សមាជិកគណៈអចិន្ត្រៃយ៍គណៈកម្មាធិការកណ្តាល ស.ស.យ.ក.​ និងជាប្រធានក្រុមការងារប្រតិបត្តិ បានមានប្រសាសន៍ថា ដំណើរការ​ព្រឹត្តិការណ៍​នគរសង្ក្រាន្តពីថ្ងៃទី១៤-១៨ ខែមេសា ឆ្នាំ២០២៦ បានប្រព្រឹត្តទៅដោយរលូន មាន​ភាព​ល្អ​ប្រសើរ​លើស​ពី​ការ​រំពឹងទុក។ ហើយបានវាយ​តម្លៃ​ខ្ពស់​ចំពោះ​កិច្ច​ខិត​ខំ​ប្រឹង​ប្រែង​របស់​កង​កម្លាំង​អាជ្ញាធរ​មាន​សមត្ថ​កិច្ច​ពាក់​ព័ន្ធ​ទាំង​អស់​ ក្នុងការការពារសន្តិសុខ សណ្តាប់ធ្នាប់ ក្នុងពិធីបុណ្យចូលឆ្នាំថ្មី ប្រពៃណីជាតិខ្មែរ និង​ព្រឹត្តិការណ៍នគរសង្ក្រាន្ត។

ឯកឧត្តម សុខ សប្បាយណា បានបញ្ជាក់ថា ការរៀបចំព្រឹត្តិការណ៍នគរសង្ក្រាន្ត គឺជាការផ្សារ ភ្ជាប់​រវាង​ជួរមុខនិងជួរក្រោយ និងបានផ្ញើក្តី​នឹក​រលឹក​ដល់​វីរកងទ័ព និង​វីរនគរបាល​ដែល​កំពុង​តែ​ការ​ពារ​ព្រំដែន​។

ចំណែកឯកឧត្តម សុខ ពេញវុធ អភិបាលរងរាជធានីភ្នំពេញ បានថ្លែងថា រយៈពេល៥ថ្ងៃ ពីថ្ងៃ​ទី១៤-១៨ ខែមេសា ឆ្នាំ២០២៦ ពិធីបុណ្យចូលឆ្នាំថ្មី ប្រពៃណីជាតិខ្មែរ និង​ព្រឹត្តិការណ៍​នគរ​សង្ក្រាន្ត ​មានប្រជាពលរដ្ឋដើរលេងកំសាន្តជាង ៧លាន ៣សែននាក់។ សន្តិសុខ សណ្តាប់​ធ្នាប់​សាធារណៈ​មិន​មានបញ្ហាអ្វីកើតឡើងគួរឲ្យកត់សម្គាល់នោះទេ។ ជារួមប្រព្រឹត្តល្អប្រសើរ​ដោយ​រលូន និង​មិនមានអ្វីកើតឡើថជាដុំកំភួននោះទេ។ ហើយមិនមាន​បញ្ហា​បាតុ​ភាព​អ្វី​កើត​ឡើង​នោះ​ទេ។

សូមជម្រាបថា សហភាពសហព័ន្ធយុវជនកម្ពុជា សហការជាមួយរដ្ឋបាលរាជធានីភ្នំពេញ បានរៀបចំពិធីធីបុណ្យចូលឆ្នាំថ្មី ប្រពៃណីជាតិខ្មែរ នៃព្រឹត្តិការណ៍នគរសង្ក្រាន្ត ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ មានដូចជានៅ រមណីយដ្ឋានប្រវត្តិសាស្ត្រវត្តភ្នំ ស្ពាននាគភ្លោះ ផ្លូរថ្មើរជើងចតុមុខ សួនច្បារវឌ្ឍនៈ ផ្សារទួលទំពូង ផ្លូវបាសាក់ ជាដើម ដើម្បីលើកយកនៅកម្មវិធីប្រពៃណីវប្បធម៌ជាតិខ្មែរតាំងពីបុរាណ មកបង្ហាញជូនភ្ញៀវជាតិនិងអន្តរជាតិ បានយល់ដឹងកាន់តែច្បាស់ពីមរតកវប្បធម៌ដ៏ផូរផង់របស់ខ្មែរ៕ អត្ថបទ៖ វង្ស សុភាព