ប្រជាពលរដ្ឋពេញចិត្ត និងចង់ឱ្យមានការរៀបចំព្រឹត្តិការណ៍ «នគរសង្ក្រាន្ត» នៅភ្នំពេញ នា​ឆ្នាំបន្ត​បន្ទាប់​ទៀត

ព្រឹត្តិការណ៍នគរសង្ក្រាន្ត បានបញ្ចប់ដោយបន្សល់នូវស្នាមញញឹម ពោពេញ​ដោយ​ភាព​សប្បាយ​ចិត្ត ​និង​ការចងចាំល្អៗ សម្រាប់ប្រជាពលរដ្ឋគ្រប់រូបដែលចូលរួមទស្សនា ខណៈ​ពលរដ្ឋ​បង្ហាញ​ចំណាប់​អារម្មណ៍​ច​ង់ឱ្យមានការរៀបចំព្រឹត្តិការណ៍ «នគរសង្ក្រាន្ត» បែបនេះ នៅ​ឆ្នាំ​បន្ត​បន្ទាប់​ទៀត​នៅ​រាជ​ធានីភ្នំពេញ សម្រាប់ឱកាសចូលឆ្នាំប្រពៃណីជាតិខ្មែរ។

ពិធីបុណ្យចូលឆ្នាំប្រពៃណីជាតិខ្មែរបានបញ្ចប់ ក្នុងនោះព្រឹត្តិការណ៍ «នគរសង្ក្រាន្ត» នៅ​រាជ​ធានី​ភ្នំពេញ​រយៈ​ពេល​៦ថ្ងៃក៏បានកន្លងផុតទៅ ប៉ុន្ដែតែស្នាមញញឹមរបស់ប្រជាពលរដ្ឋ និង​ការ​ចង​ចាំ​ល្អ​ៗ ​ពីការបង្ហាញវប្បធម៌ប្រពៃណីជាតិ ទស្សនីយភាពនានា និងការផ្សារភ្ជាប់ជាមួយវីរៈ​កងទ័ព​ជួរ​មុខ ​និង​ប្រជាពលរដ្ឋភៀសសឹកនៅតែដិតជាប់ក្នុងដួងចិត្តអ្នកចូលរួមគ្រប់រូប។ ​ប្រជា​ពលរដ្ឋ​បាន​លើក​​ឡើង​ដោយ​បង្ហាញនូវការពេញចិត្តពេញចិត្ត ដែលព្រឹត្តិការណ៍«នគរសង្ក្រាន្ត» បាន​បន្សល់​ទុក​នូវ​ការ​ចង​ចាំដ៏ល្អបែបនេះ។ ពលរដ្ឋលើកឡើងថា ពួកគេចង់​ឱ្យ​មាន​ការ​រៀបចំ​ព្រឹត្តិការណ៍​«នគរសង្ក្រាន្ត» នៅ​ឆ្នាំបន្តបន្ទាប់ទៀត នៅរាជធានីភ្នំពេញ។

សូមជម្រាបថា ព្រឹត្តិការណ៍«នគរសង្ក្រាន្ត» រៀបចំឡើងដោយសហភាពសហព័ន្ធយុវជនកម្ពុជា ក្នុង​គោលដៅស្រូបទាញភ្ញៀវទេសចរ ផ្សព្វផ្សាយវប្បធម៌ប្រពៃណីជាតិ និងជាការ​ផ្សារ​ភ្ជាប់​ប្រជា​ពលរដ្ឋ​ជួរ​ក្រោយ​ទៅនឹងវីរៈកងទ័ពជួរមុខ និងប្រជាពលរដ្ឋភៀសសឹក។ នៅតាមទីតាំងមួយចំនួន ជាក់​ស្ដែង​នៅភូ​មិវប្បធម៌ មានការវេចនំអន្សម ធ្វើនំខ្ញី វេចខ្ចប់អំបុក និងនំខ្ញី និង​មាន​ការ​ទទួល​ការ​ឧបត្ថម្ភ​ដោយផ្ទាល់សម្រាប់ជូនដល់វីរៈកងទ័ពជួរមុខ និងពលរដ្ឋភៀសសឹកផងដែរ៕ អត្ថបទៈ គឹមហុក