ស្ថានការណ៍សន្តិសុខ សុវត្ថិភាពសង្គម ក្នុងពិធីបុណ្យចូលឆ្នាំថ្មី បានប្រព្រឹត្ត​ទៅ​ក្នុង​បរិយាកាស​ដ៏ល្អប្រសើរ

អ្នកនាំពាក្យអគ្គស្នងការដ្ឋាននគរបាលជាតិ បានបញ្ជាក់ថា ក្នុងរយៈពេល៦ថ្ងៃ នៃ​ពិធី​បុណ្យ​ចូល​ឆ្នាំថ្មី នៅទូទាំងប្រទេស គឺបានប្រព្រឹត្តទៅក្នុងបរិយាកាសដ៏ល្អប្រសើរ ពុំមាន​ហេតុការណ៍​ណាមួយ​កើតឡើង​គួរឲ្យកត់សម្គាល់ឡើយ។

ឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នង​ការដ្ឋាន​នគរបាល​ជាតិ បានប្រាប់ BTV នៅថ្ងៃទី២០ ខែមេសា នេះថា ក្នុងអំឡុងពេលប្រជាពលរដ្ឋកំពុងរីករាយសប្បាយក្នុងបុណ្យចូលឆ្នាំថ្មី ស្ថានការណ៍សន្តិសុខ សណ្តាប់ធ្នាប់ សុវត្ថិភាពសង្គម នៃពិធីបុណ្យចូលឆ្នាំថ្មីប្រពៃណៃជាតិខ្មែរទូទាំងប្រទេស និងការរៀបចំព្រឹត្តិការណ៍នគរសង្ក្រាន្ត គឺបានប្រព្រឹត្តទៅក្នុងបរិយាកាសដ៏ល្អប្រសើរ ការដើរកំសាន្តសប្បាយរបស់ប្រជាពលរដ្ឋ រួមទាំងភ្ញៀវទេសចរណ៍ជាតិ និងអន្តរជាតិ នៅគ្រប់ទីកន្លែងមានចំនួនច្រើនកុះករ និងបានកំសាន្តសប្បាយប្រកបដោយទឹកចិត្ត និងភាពកក់ក្តៅ ក្រោមការយកចិត្តទុកដាក់ពីសំណាក់អាជ្ញាធរមានសមត្ថកិច្ចពាក់ព័ន្ធទាំងអស់។ ពុំមានហេតុការណ៍ណាមួយធំដុំកើតឡើងគួរឲ្យកត់សម្កាល់ឡើយ។

ឧត្តមសេនីយ៍ឯក បានបញ្ជាក់ថា មានការយកចិត្តទុកដាក់រៀបចំផែនការច្បាស់លាស់របស់សមត្ថកិច្ច ជាពិសេសស្នងការដ្ឋាននគរបាលរាជធានី ខេត្ត ទូទាំងប្រទេស ខិតខំប្រឹងប្រែងយកចិត្តទុកដាក់ទាំងយប់ទាំងថ្ងៃដើម្បីធានាសុវត្ថិភាពជូនប្រជាពលរដ្ឋ និងមានការចូលរួមពីប្រជាពលរដ្ឋផងដែរ។

សូមជម្រាបថា សហភាពសហព័ន្ធយុវជនកម្ពុជា សហការជាមួយរដ្ឋបាលរាជធានីភ្នំពេញ បានរៀបចំពិធីធីបុណ្យចូលឆ្នាំថ្មី ប្រពៃណីជាតិខ្មែរ នៃព្រឹត្តិការណ៍នគរសង្ក្រាន្ត រយៈពេល ៦ថ្ងៃ ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ មានដូចជានៅ រមណីយដ្ឋានប្រវត្តិសាស្ត្រវត្តភ្នំ ស្ពាននាគភ្លោះ ផ្លូរថ្មើរជើងចតុមុខ សួនច្បារវឌ្ឍនៈ ផ្សារទួលទំពូង ផ្លូវបាសាក់ ជាដើម ដើម្បីលើកយកនៅកម្មវិធីប្រពៃណីវប្បធម៌ជាតិខ្មែរតាំងពីបុរាណ មកបង្ហាញជូនភ្ញៀវជាតិនិងអន្តរជាតិ បានយល់ដឹងកាន់តែច្បាស់ពីមរតកវប្បធម៌ដ៏ផូរផង់របស់ខ្មែរ៕ អត្ថបទ៖ វង្ស សុភាព