គណៈកម្មាធិការវិនិយោគ ពិនិត្យសំណើសុំចុះបញ្ជីចំនួនគម្រោងវិនិយោគចំនួន ៨ មានទុន ៤៩០លានដុល្លារ

គណៈកម្មាធិការវិនិយោគកម្ពុជា ពិនិត្យ និងពិភាក្សា លើសំណើ​សុំចុះ​បញ្ជី​គម្រោង​វិនិយោគ​មាន​លក្ខណៈ​សម្បត្តិ​គ្រប់គ្រាន់ចំនួន ៧ គម្រោង និងគម្រោងពង្រីកបន្ថែមមុខសញ្ញាផលិតកម្មចំនួន ១ គម្រោង មានទុនវិនិយោគសរុបប្រមាណ ៤៩០ លានដុល្លារអាម៉េរិក។

ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៅថ្ងៃទី២១ ខែមេសា ឆ្នាំ​២០២៦​នេះ បានដឹកនាំកិច្ចប្រជុំ ច្រកចេញចូលតែមួយលើកទី៤ ដោយមានការអញ្ជើញ​ចូល​រួម​ពី​តំណាង​ក្រសួង-ស្ថាប័ន និងរដ្ឋបាលរាជធានី-ខេត្តពាក់ព័ន្ធ ដើម្បី ពិនិត្យ ពិភាក្សា លើសំណើ​សុំ​ចុះ​បញ្ជី​គម្រោងវិនិយោគមានលក្ខណៈសម្បត្តិគ្រប់គ្រាន់ចំនួន ៧ គម្រោង និងគម្រោង​ពង្រីក​បន្ថែម​មុខ​សញ្ញាផលិតកម្មចំនួន ១ គម្រោង មានទុនវិនិយោគសរុបប្រមាណ ៤៩០ លាន​ដុល្លារ​អាម៉េរិក ដែលអាចបង្កើតការងារបានប្រមាណ ២ ពាន់កន្លែង។

គម្រោងវិនិយោគទាំងនេះរួមមាន៖ រោងក្រផលិត ផ្គុំ និងដំឡើងសម្ភារៈអគ្គិសនីប្រើប្រាស់ក្នុងផ្ទះ, ផលិ​តពូ​កខ្យល់ សាឡុង ខ្យល់ ពោងហែលទឹក អាងហែលទឹក ទូកខ្យល់ កាបូបក្លាស្សេ សម្ភារៈ​កីឡា និងសម្ភារៈក្មេងលេង (ពីប្លាស្ទិក), រោងចក្រផលិតអំបោះ និងជ្រលក់ពណ៌ និង​ពង្រីក​បន្ថែម​មុខ​សញ្ញាផលិតកម្ម “បោកគក់សម្លៀកបំពាក់” លើមុខសញ្ញាចាស់ (កាត់ដេរសម្លៀកបំពាក់ និង ប៉ាក់) នៅលើទីតាំងដដែល។

ចំណែក​ការវិនិយោគលើវិស័យកសិកម្ម និងកសិ-ឧស្សាហកម្ម មានចំនួន២គម្រោងរួមមាន បង្កើត​រោង​ចក្រ​កែច្នៃដំឡូងមី, និង បង្កើតកសិដ្ឋានចិញ្ចឹម និងបង្កាត់ពូជសត្វចតុប្បាទ។ វិស័យ​ហេដ្ឋា​រចនា​សម្ព័ន្ធ មាន២គម្រោង គឺការអភិវឌ្ឍន៍ស្ថានីយផលិតអគ្គិសនី ដើរដោយថាមពលខ្យល់ មាន​អានុ​ភាព ​១៥០ មេហ្គាវ៉ាត់ និងអភិវឌ្ឍន៍ស្ថានីយផលិតអគ្គិសនីដើរដោយថាមពលពន្លឺព្រះអាទិត្យ មាន អានុភាព ៣៥០ មេហ្គាវ៉ាត់។ គម្រោងវិនិយោគទាំង៨ខាងលើនេះ គ្រោង​វិនិយោគ​នៅ​តំបន់​ផ្សេង​ៗ​គ្នា​រួមមាន នៅរាជធានីភ្នំពេញ ខេត្តតាកែវ កំពង់ស្ពឺ ពោធិ៍សាត់ កំពង់ចាម កំពង់ធំ និង​ខេត្ត​មណ្ឌលគីរី៕ អត្ថបទ៖ សុន រ៉ាឌី