មគ្គទេ្ទសក៍ទេសចរណ៍ជិត១០០នាក់ ចូលរួម​ប្រលង​ដំឡើង​កម្រិត​មគ្គទ្ទេសក៍​ទេសចរណ៍​ថ្នាក់​ជាតិ​ និងតំបន់

នៅថ្ងៃទី២២ ខែមេសា នេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បាន​អញ្ជើញ​បើក​វិញ្ញាសា​ការ​ប្រលងចូលរៀនវគ្គបណ្តុះបណ្តាលមគ្គទ្ទេសក៍ទេសចរណ៍ថ្នាក់ជាតិ ជំនាន់ទី៧ និង​ថ្នាក់​តំបន់​ភ្នំពេញ និងតំបន់ជុំវិញ ជំនាន់ទី២១ ដែលមានបេក្ខជន បេក្ខនារី ចូលរួមជិត១០០នាក់ ក្នុង​នោះ​មាន​បេក្ខជនថ្នាក់តំបន់ចំនួន២៣នាក់ នៅរាជធានីភ្នំពេញ។

បេក្ខជនបានឱ្យដឹងថា ការប្រលងជ្រើសរើសបេក្ខជន បេក្ខនារី ចូល​រៀន​វ​គ្គ​បណ្តុះ​បណ្តាល​មគ្គទ្ទេសក៍​ឆ្នាំនេះ គឺមានការរឹតបន្តឹងខ្លាំង ក្នុងគោលដៅ ចេះ ជាប់។ តែយ៉ាងណា ក្នុងនាម​ពួក​គេ​ជា​អ្នក​បម្រើការងារជាមគ្គទេ្ទសក៍ទេសចរណ៍ស្រាប់ គឺនឹងខិតខំប្រលងចូលរៀនបន្ថែម ដើម្បី​ដំឡើង​កម្រិត​របស់ខ្លួនគេឱ្យក្លាយមគ្គទេ្ទសក៍ទេសចរណ៍ថ្នាក់ជាតិ ពង្រីកវិសាលភាព ងាយ​ស្រួល​នាំ​ភ្ញៀវ​ទេសចរអន្តរជាតិដើរកម្សាន្តនៅទូទាំងប្រទេស។

ឯកឧត្តម រដ្ឋមន្ត្រី ហួត ហាក់ បានបញ្ជាក់ថា បច្ចុប្បន្ន មគ្គទ្ទេសក៍ទេសចរណ៍ បាន​នឹង​កំពុង​ដើរ​តួនាទី​យ៉ាង​សំខាន់ក្នុងការនាំភ្ញៀវទេសចរជាតិអន្តរជាតិដើរកម្សាន្ត អមដោយមាន​ការ​បក​ប្រែ​ភាសា ​រៀបរាប់រឿងរ៉ាវពីតាមគោលដៅទេសចរណ៍នានាឲ្យភ្ញៀវទេសចរមានការយល់ដឹងពីកម្ពុជា ហើយ​មគ្គទ្ទេសក៍ទេសចរណ៍ក៏មានតួនាទីសំខាន់ដែរក្នុងផ្តល់ពិសោធន៍ អនុស្សាវរីយ៍ល្អៗ និង​ជួយ​ផ្សព្វ​ផ្សាយគោលដៅទេសចរណ៍កម្ពុជា សំដៅធ្វើយ៉ាងណាឲ្យភ្ញៀវទេសចរជាតិ អន្តរជាតិ មក​ទស្សនា​កម្សាន្ត​ម្តងហើយម្តងទៀត និងទាក់ទាញទេសចរ​អន្តរជាតិ​នានា​ទៀត​ឲ្យ​មក​ទស្សនា​កម្ពុជា​ផង​ដែរ។

នៅក្នុងដំណើរ​ការ​ប្រលងនេះ មានមគ្គទ្ទេសក៍ទេសចរណ៍ថ្នាក់ជាតិ ចំនួន៧៥នាក់ រួមមានផ្នែក​ភាសា​អង់​គ្លេស បារាំង អាល្លឺម៉ង់ ជប៉ុន អេស្ប៉ាញ ថៃ ចិន រ៉ុស្សី និងភាសាវៀតណាម។ ដោយ​ឡែក​ម​គ្គទ្ទេសក៍ទេសចរណ៍ថ្នាក់តំបន់វិញ មានចំនួន២៣នាក់ ក្នុងនោះមានផ្នែកភាសាបារាំង អាល្លឺ​ម៉ង់ ជប៉ុន និងវៀតណាម។

សូម​បញ្ជាក់ថា មកដល់ឆ្នាំ២០២៦នេះ នៅទូទាំងប្រទេស មានមគ្គទ្ទេសក៍ទេសចរណ៍ថ្នាក់ជាតិ ថ្នាក់​តំបន់ភ្នំពេញ ថ្នាក់តំបន់សៀមរាប ថ្នាក់តំបន់ឆ្នេរ អ្នកបកប្រែភាសា សរុប​ប្រមាណ​ជិត​២០៥០​នាក់ ក្នុងនោះអ្នកបកប្រែភាសា មានប្រមាណជាង២០០នាក់៕ អត្ថបទ៖ ស៊ុម សុខជា