ក្រសួង-ស្ថាប័នចំនួន៣ ចាប់ផ្ដើមទទួលពាក្យជ្រើសរើសមន្ត្រីថ្មី ក្រោយ​ទទួល​ការ​អនុញ្ញាត​ពី​រដ្ឋាភិបាល

ក្រសួង-ស្ថាប័នចំនួន៣ រួមមាន ក្រសួងយុត្តិធម៌ ក្រសួងការបរទេស និង​សហ​ប្រតិបត្តិកា​រ​អន្តរ​ជាតិ និងរដ្ឋលេខាធិការដ្ឋានកិច្ចការព្រំដែន បានប្រកាសបើកជ្រើសរើសមន្ត្រីឡើងវិញ។ កា​រ​ជ្រើស​រើស​មន្ត្រី​ថ្មី​បន្ថែមនេះ ជាការឆ្លើយតបនឹងតម្រូវការជាក់ស្ដែង និងត្រូវឆ្លង​កាត់​ការ​សម្រេចឯក​ភាព​ពី​រាជ​រដ្ឋាភិបាល។

គណៈកម្មការរៀបចំការប្រឡងប្រជែងជ្រើសរើសមន្ត្រីរាជការស៊ីវិល នៃក្រសួងមុខងារសាធារណ: បាន​នឹង​កំពុងដាក់ដំណើរការប្រព័ន្ធចុះឈ្មោះតាមអនឡាញ សម្រាប់​ការ​ប្រឡង​ប្រជែង​ជ្រើស​រើស​មន្ត្រី​​រាជ​ការរបស់ក្រសួង ស្ថាប័នចំនួន៣។ ក្រសួង-ស្ថាប័នទាំង ៣រួមមាន ក្រសួងយុត្តិធម៌ ក្រសួង​ការ​បរទេស និងសហប្រតិបត្តិការអន្តរជាតិ និងរដ្ឋលេខាធិការដ្ឋានកិច្ចការព្រំដែន ។

ទី១ ជាការប្រឡងប្រជែងជ្រើសរើសមន្ត្រីជំនាញច្បាប់ ក្របខ័ណ្ឌប្រភេទ “ក” ចំនួន ៤៥នាក់ ឱ្យ​ចូល​បម្រើ​ការងារក្នុងក្របខ័ណ្ឌក្រសួងយុត្តិធម៌។ ការដាក់ពាក្យដំណើរការ ចាប់ពីថ្ងៃទី០៦ ខែ​មេសា ​រហូតដល់ថ្ងៃទី០៦ ខែឧសភា ឆ្នាំ២០២៦ ត្រឹមវេលាម៉ោង ១៧:០០នាទី ជាកំហិត។

ទី២ ជាការប្រឡងប្រជែងជ្រើសរើសមន្ត្រីរាជការក្របខ័ណ្ឌប្រភេទ “ក” ចំនួន ៥២នាក់ ឱ្យ​ចូល​បម្រើ​ការងារក្នុងក្របខ័ណ្ឌក្រសួងការបរទេស និងសហប្រតិបត្តិការអន្តរជាតិ។ ការដាក់​ពាក្យ​ដំណើរ​ការ​ ចាប់ពីថ្ងៃទី១០ ខែមេសា រហូតដល់ថ្ងៃទី២៤ ខែឧសភា ឆ្នាំ២០២៦ វេលាម៉ោង ១៧:​០០​នាទី​។

ទី៣ ជាការប្រឡងប្រជែងជ្រើសរើសមន្ត្រីរាជការក្របខ័ណ្ឌប្រភេទ “ក” ចំនួន ៤០នាក់ ឱ្យ​ចូល​បម្រើ​ការ​ងារក្នុងក្របខ័ណ្ឌរដ្ឋលេខាធិការដ្ឋានកិច្ចការព្រំដែន។ ដំណើរការដាក់ពាក្យ ចាប់​ពី​ថ្ងៃ​ទី​១៣​ ខែមេសា រហូតដល់ថ្ងៃទី១២ ខែឧសភា ឆ្នាំ២០២៦ វេលាម៉ោង ១៧:០០នាទី ជាកំហិត។

លោកជំទាវ ឈី វិជ្ជរ៉ា រដ្ឋលេខាធិការក្រសួងមុខងារសាធារណ:កន្លងទៅ បានលើកឡើងថា ការ​ប្រឡង​ជ្រើស​រើសមន្ត្រីគឺពាក់ព័ន្ធនឹងការវិភាគមុខងារនិងហេដ្ឋារចនាសម្ពន្ធ័ក្រសួង-ស្ថាប័ន។ លោក​ជំទាវបញ្ជាក់ថា ការប្រឡងជាច្រើនលើកកន្លងទៅ ជាង៩០ភាគរយ ជាការប្រឡងដែលទទួលបានការអនុញ្ញាតរួចរាល់តាំងពីរដ្ឋាភិបាលនីតិកាលទី៦មកម្លេះ។ ការ​ប្រឡង​ជ្រើស​រើសមន្ត្រីថ្មី ក្នុងក្របខណ្ឌរាជរដ្ឋាភិបាលទី ៧ គឺធ្វើឡើងក្នុងករណីដែលក្រសួង-ស្ថាប័ន មានតម្រូវការជាក់ស្ដែងចាំបាច់បំផុតប៉ុណ្ណោះ។ លោកជំទាវ លើកជាឧទាហរណ៍ជាក់ស្ដែង នូវតម្រូវការមន្ត្រីជំនាញ សម្រាប់ក្រសួងការបរទេសជាដើម។

សម្រាប់កម្ពុជា រាជរដ្ឋាភិបាលនីតិកាលទី ៧នេះ បានដាក់ចេញនូវអភិក្រម “ពង្រឹងជាជាងពង្រីក” ដោយមិនពង្រីកលើសពីអ្វីដែលកំពុងមាន ហើយពង្រឹងអ្វីដែលមានស្រាប់ និងកែសម្រួល​មួយ​ចំនួន​ឱ្យបានសមស្រប៕ អត្ថបទ៖ គឹមហុក