រយៈពេល៤ខែឆ្នាំនេះ កម្ពុជាប្រមូលចំណូលពន្ធអាករ សួយសារពីរ៉ែមាសបានជាង ៦០ លានដុល្លារ

ក្នុងរយៈពេលជិត ៤ខែ ក្នុងឆ្នាំ២០២៦នេះ រាជរដ្ឋាភិបាលកម្ពុជាបានប្រមូលចចំណូលពន្ធអាករ សួយសារពីវិស័យរ៉ែមាស ចូល ថវិការដ្ឋ បានចំនួនជាង ៦០ លានដុល្លារអាមេរិក បច្ចុប្បន្នវិស័យនេះកំពុងមានការរីកចម្រើន និងអាចបង្កើតប្រភពចំណូលសម្រាប់ ការអភិវឌ្ឍជាតិកាន់តែប្រសើរ។

ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល លើកឡើងនៅក្នុងកម្មវិធីបើកសម្ពោធដាក់ឱ្យដំណើរការរោងចក្រស្ល មាសរបស់ក្រុមហ៊ុន ខេមបូឌាន ខេ88 អ៊ិនដាសស្រ្ទី ឯ.ក (Cambodian K88 Industry Co., Ltd.) ស្ថិតនៅតំបន់ស្នងអន ឃុំសុចិត្រ ស្រុកសណ្តាន់ ខេត្តកំពង់ធំ និងស្រុកសំបូរ ខេត្តក្រចេះ នៅថ្ងៃទី២២ ខែមេសា ឆ្នាំ២០២៦ នេះថា ជុំវិញការធ្វើអាជីវកម្មរ៉ែមាស គិត ទាំងក្រុមហ៊ុន ខេមបូឌាន ខេ88 អ៊ិនដាសស្រ្ទី ឯ.ក នេះគឺជាការដ្ឋានទី៧ហើយ ដែលបានដាក់ឱ្យដំណើរការលើការធ្វើអាជីវកម្មរ៉ែមាស ក្នុងនោះសម្រាប់ក្រុមហ៊ុនទាំង៧នេះ បើគិតក្នុងរយៈពេលជាង៥ឆ្នាំមកនេះ ពន្ធអាករ និងសួយសារដែលរាជរដ្ឋាភិបាលប្រមូលបាន ពី អាជីវកម្មរ៉ែមាស មានចំនួនសរុបជាង ២០០ លានដុល្លារអាមេរិក ចូលថវិកាជាតិ។

ឯកឧត្តម បន្ថែមថា ទាក់ទិនវិស័យរ៉ែនេះ បើគិតការប្រមូលវិស័យរ៉ែគ្រប់ប្រភេទដូចជា រ៉ែមាស ខ្សាច់ និងថ្មសំណង់ជាដើម បាននិងកំពុងបង្កើតការងារជូនកម្ពុជាជាងរាប់ម៉ឺនកន្លែង ក្នុងនោះអាជីវកម្មរ៉ែមាស មានចំនួនជាង ១ ពាន់កន្លែងផងដែរ។ បញ្ហានេះ រាជរដ្ឋាភិបាលមិនទាន់ស្កប់ស្កល់នៅឡើយ ដោយរាជរដ្ឋាភិបាលចង់បង្កើតការងារជូនប្រជាជនកម្ពុជាបន្ថែម និងប្រាក់ចំណូលសម្រាប់ ការអភិវឌ្ឍជាតិ ជាក់ស្តែងនៅក្នុងរយៈពេលជិត ៤ខែ ដើមឆ្នាំ២០២៦នេះ រាជរដ្ឋាភិបាលប្រមូលពន្ធអាករ និងសួយសារពីរ៉ែមាស បានចំនួនជាង ៦០ លានដុល្លារអាមេរិករួចហើយ ខណៈបច្ចុប្បន្នវិស័យបាននិងកំពុងហក់ឡើងខ្ពស់។

សូមបញ្ជាក់ថា ជុំវិញការប្រមូលចំណូលមិនមែនសារពើពន្ធនេះ យោងតាមច្បាប់ស្តីពីហិរញ្ញវត្ថុសម្រាប់ការគ្រប់គ្រងថវិកាឆ្នាំ២០២៦ ចំពោះវិស័យរ៉ែ, រាជរដ្ឋាភិបាលនឹងបន្តពង្រឹងយន្តការ និងប្រសិទ្ធភាពនៃការប្រមូលចំណូលពីវិស័យធនធានរ៉ែឱ្យអស់សក្តានុពល ជាពិសេសផលិតផលរ៉ែសម្រាប់ការនាំចេញក្រៅប្រទេសរួមមាន៖ រ៉ែមាស រ៉ែដែកឆៅ រ៉ែម៉ង់កាណែសឆៅ និងរ៉ែខ្សាច់ជាដើម និងការចុះ ពិនិត្យផ្ទាល់ដល់ការដ្ឋានអាជីវកម្ម ដោយក្រុមការងារអន្តរក្រសួង-ស្ថាប័ន ដើម្បីត្រួតពិនិត្យ និងផ្ទៀងផ្ទាត់លើការបង់សួយសារ និង បរិមាណធ្វើអាជីវកម្មជាក់ស្តែង៕អត្ថបទ៖ សុន រ៉ាឌី