ព្រះសង្ឃនៅខេត្ដសៀមរាបថ្វាយព្រះពរព្រះមហាក្សត្រឱ្យព្រះអង្គឆាប់ជាព្រះរោគ

ព្រះសង្ឃនៅខេត្ដសៀមរាប បានថ្វាយព្រះពរព្រះមហាក្សត្រ ព្រះករុណាជាអម្ចាស់ជីវិតលើត្បូងជាទីគោរពសក្ការៈដ៏ខ្ពង់ខ្ពស់បំផុត សូមឱ្យទ្រង់ឆាប់ជាសះស្បើយពីព្រះរោគ និងមានព្រះរាជសុខភាពល្អបរិបូណ៍ឡើងវិញ ដើម្បីឆាប់បានយាងនិវត្តមកកាន់មាតុប្រទេសវិញ ដើម្បីគង់ជាម្លប់ដ៏ត្រជាក់ដល់ប្រជានុរាស្ត្រ។

ព្រះគ្រូចៅអធិការវត្ដគោកចក និងជាទីប្រឹក្សាពុទ្ធិកសមាគមកម្ពុជរដ្ឋ ព្រះអង្គ ហែម គឹមសាន និងព្រះគ្រូចៅអធិការវត្ដព្រះឥន្ទកោសី ព្រះអង្គ តាត មហាទី ព្រះអង្គទាំងទ្វេ តំណាងឱ្យពុទ្ធបរិស័ទ្ធ នៅក្រុងសៀមរាប ខេត្ដសៀមរាប ព្រះអង្គ បានថ្វាយព្រះពរព្រះមហាក្សត្រ ព្រះករុណាជាអម្ចាស់ជីវិតលើត្បូងជាទីគោរពសក្ការៈដ៏ខ្ពង់ខ្ពស់បំផុត សូមឱ្យទ្រង់ឆាប់ជាសះស្បើយពីព្រះរោគ និងថ្វាយព្រះពរឱ្យអង្គមានព្រះរាជសុខភាពល្អបរិបូណ៍ បន្ទាប់ពីព្រះអង្គបានទទួលការព្យាបាលព្រះរោគដោយវះកាត់ពីក្រុមវេជ្ជបណ្ឌិត នៃមន្ទីរពេទ្យប៉េកាំង ដោយជោគជ័យ និងបានបួងសួងដល់គុណព្រះរត្នត្រ័យ គុណវត្ថុស័ក្តិសិទ្ធិក្នុងលោក គុណអតីតព្រះមហាវីរៈក្សត្រខ្មែរ សូមជួយឃុំគ្រងបីបាច់ថែរក្សា ព្រះអង្គឲ្យឆាប់ជាសះស្បើយ និងមានព្រះកាយពលរឹងមាំ ដើម្បីគង់ជាម្លប់ដ៏ត្រជាក់សម្រាប់កូនចៅប្រជារាសស្ដ្របន្តទៀត។

សូមបញ្ជាក់ បើតាមសេចក្តីប្រកាសព័ត៌មានរបស់ក្រសួងព្រះបរមរាជវាំង ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត បានទទួលការព្យាបាលព្រះរោគមហារីកក្រពេញប្រូស្តាត ដោយវះកាត់ ពីក្រុមវេជ្ជបណ្ឌិតចំណានៗ នៅមន្ទីពេទ្យប៉េកាំង នៃសាធារណរដ្ឋប្រជាមានិតចិន កាលពីថ្ងៃទី២០ខែមេសា ឆ្នាំ២០២៦ ហើយព្រះអង្គបានយាងចាកចេញពីបន្ទប់វះកាត់រួចរាល់នៅថ្ងៃដដែល ៕

អត្ថបទ សាវី