កម្ពុជាគាំទ្រការប្រើប្រាស់ថាមពលនុយក្លេអ៊ែរដោយសន្តិវិធី

ភ្នំពេញ៖ កម្ពុជាគាំទ្រការប្រើប្រាស់ថាមពលនុយក្លេអ៊ែរដោយសន្តិវិធី។ ការប្រកាសគាំទ្របែបនេះ ធ្វើឡើងនៅរសៀលថ្ងៃទី២៧ ខែមេសា ឆ្នាំ២០២៦ ដោយឯកឧត្តម សុក ស៊ីផាន់ណា ទេសរដ្ឋមន្ត្រី ប្រសិតពិសេសរបស់សម្តេចធីបតី ទទួលបន្ទុកបេសកកម្មនៅ អ.ស.ប. អមដោយឯកឧត្តម កែវ ឈា តំណាងអចិន្ត្រៃយ៍ តំណាងអាជ្ញាធរជាតិទប់ស្កាត់អាអាវុធគីមី នុយក្លេអ៊ែរ ជីវសាស្ត្រ និងវិទ្យុសកម្ម និងមន្ត្រីស្ថានបេសកកម្ម បានចូលរួមធ្វើសេចក្តីថ្លែងការណ៍ នៅក្នុងសន្និសីទត្រួតពិនិត្យឡើងវិញលើកទី១១ នៃសន្ធិសញ្ញស្តីពីការមិនរីកសាយភាយអាវុធនុយក្លេអ៊ែរ នៅទីស្នាក់ការអ.ស.ប. នាទីក្រុងញូវយ៉ក។

ឯកឧត្តមទេសរដ្ឋមន្ត្រី បានគូសបញ្ជាក់អំពីសារៈសំខាន់នៃសន្ធិសញ្ញាមិនសាយភាយអាវុធនុយក្លេអ៊ែរ (NPT) ដែលត្រូវតែនៅជាសសរស្តម្ភនៃកិច្ចខិតខំប្រឹងប្រែងសកលក្នុងការរំសាយអាវុធនុយក្លេអ៊ែរ ការមិនរីកសាយភាយអាវុធនុយក្លេអ៊ែរ និងការប្រើប្រាស់ថាមពលនុយក្លេអ៊ែរដោយសន្តិវិធី។

ឯកឧត្តមក៏បានវាយតម្លៃខ្ពស់ចំពោះទីភ្នាក់ងារថាមពលបរមាណូអន្តរជាតិ (IAEA) ដែលបានលើកកម្ពស់វិទ្យាសាស្ត្រ និងបច្ចេកវិទ្យានុយក្លេអ៊ែរសម្រាប់ការអភិវឌ្ឍប្រកបដោយចីរភាព និងកិច្ចសហប្រតិបត្តិការបច្ចេកទេស ដល់ប្រទេសកំពុងអភិវឌ្ឍន៍។