សម្ដេចធិបតី៖ «អាជ្ញាធររាជធានី-ខេត្ត និងកងកម្លាំងពាក់ព័ន្ធត្រូវបន្តអនុវត្តឱ្យបានតឹងរ៉ឹង និងមិនត្រូវបន្ធូរដៃឡើយក្នុងការទប់ស្កាត់ និងបង្ក្រាបក្មេងទំនើង»

ភ្នំពេញ៖ អ្នកនាំពាក្យរាជរដ្ឋាភិបាលកម្ពុជា ឯកឧត្តម ប៉ែន បូណា នៅក្នុងសន្និសីទសារព័ត៌មាននៅថ្ងៃទី៤ ខែឧសភា ឆ្នាំ២០២៦នេះ បានរម្លឹកឡើងវិញនូវបទបញ្ជារបស់សម្ដេច មហាបវរធិបតី ហ៊ុន ម៉ាណែត នាយករដ្ឋមន្រ្ដី ប្រាប់ទៅកាន់ «អាជ្ញាធររាជធានី-ខេត្ត និងកងកម្លាំងពាក់ព័ន្ធ ត្រូវបន្តអនុវត្តឱ្យបានតឹងរ៉ឹង និងមិនត្រូវបន្ធូរដៃឡើយក្នុងការទប់ស្កាត់និងបង្ក្រាបក្មេងទំនើង»។

សម្ដេចធិបតី នាយករដ្ឋមន្រ្ដី បានបន្តដាក់ចេញនូវបទបញ្ជាយ៉ាងម៉ឺងម៉ាត់នេះ ក្នុងឱកាសអញ្ជើញជួបសំណេះសំណាលជាមួយថ្នាក់ដឹកនាំសហជីពនិងសមាគមនៃសេដ្ឋកិច្ចក្រៅប្រព័ន្ធ កាលពីពេលថ្មីៗនេះ។ បទបញ្ជានេះធ្វើឡើងដើម្បីធានាសន្តិសុខ និងសណ្តាប់ធ្នាប់នៅក្នុងមូលដ្ឋាន។

ព្រមជាមួយគ្នានេះដែរ សម្តេចធិបតីនាយករដ្ឋមន្ត្រី ក៏បានណែនាំឱ្យ ក្រសួងយុត្តិធម៌ និង អគ្គស្នងការនគរបាលជាតិ ព្រមទាំង អគ្គមេបញ្ជាការនៃកងយោធពលខេមរភូមិន្ទសិក្សាផ្លូវច្បាប់ដែលមានស្រាប់ចំពោះចំណាត់ការលើក្មេងទំនើងដែលចូលចិត្តបង្កការអូកឡុកក្នុងមូលដ្ឋានដើម្បីយកពួកគេទៅជួយការងារចាក់បេតុងបម្រើឱ្យការសាងសង់លេណដ្ឋានជួសជុល និងសេវាតម្រូវការផ្សេងៗនៅជួរមុខតែមិនមែនយកពួកគេទៅធ្វើជាកងទ័ពទេ៕