កងទ័ពកម្ពុជា-ចិន គ្រោងធ្វើសមយុទ្ធយុទ្ធនាគមាសឆ្នាំ២០២៦ ដើម្បីពង្រឹងពង្រីកកិច្ចសហប្រតិបត្តិការយោធា

កងយោធពលខេមរភូមិន្ទ និងកងទ័ពរំដោះប្រជាជនចិន គ្រោងនឹងរៀបចំធ្វើសមយុទ្ធយុទ្ធនាគមាស ឆ្នាំ២០២៦ នៅពេលខាងមុខនេះ ដើម្បីពង្រឹងពង្រីកកិច្ចសហប្រតិបត្តិការ ចំណងទាក់ទងមិត្តភាព កិច្ចសហប្រតិបត្តិការល្អរវាងកងទ័ពទាំងពីរឱកាន់តែមានភាពប្រសើរឡើង។

នេះបើតាម ឯកឧត្តម នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជាប្រធានគណៈកម្មការដឹកនាំធ្វើសមយុទ្ធនាគមាសភាគីកម្ពុជា ឆ្នាំ២០២៦ បានបញ្ជាក់ក្នុងជំនួបពិភាក្សាជាមួយក្រុមការងាររៀបចំសមយុទ្ធនាគមាស-២០២៦ កងទ័ពរំដោះប្រជាជនចិន ដឹកនាំដោយលោក ជី ហ៊្សាំង នាយករង នាយកដ្ឋានហ្វឹកហ្វឺនសេនាធិការដ្ឋានចម្រុះតំបន់យោធភូមិភាគខាងត្បូងនៃកងទ័ពរំដោះប្រជាជនចិន កាលពីថ្ងៃទី២៨ ខែឧសភា ឆ្នាំ២០២៦នៅទីស្ដីការក្រសួងការពារជាតិ។

ក្នុងឱកាសនោះ ឯកឧត្តម នាយឧត្តមសេនីយ៍ ឥត សារ៉ាត់ បានថ្លែងថា សមយុទ្ធនាគមាសកម្ពុជា-ចិន គឺមានសារៈសំខាន់សម្រាប់កងទ័ពប្រទេសទាំងពីរ ហើយក៏មានការយកចិត្តទុកដាក់អង្កេតតាមដានពិនិត្យមើលណាស់ពីសំណាក់បណ្ដាប្រទេសក្នុងតំបន់ និងអន្តរជាតិ ចង់ដឹង ចង់ឃើញ អំពីខ្លឹមសារ ផែនការ និងអត្ថន័យសមយុទ្ធនេះ។ ឯកឧត្តមបន្តថាសមយុទ្ធរវាងកងទ័ពទាំងពីរនេះ មានគ្រឿងបំពាក់ថ្មី ទំនើប សមស្របទៅនឹងសភាពការណ៍បច្ចុប្បន្ននៅក្នុងតំបន់ និងលើសកលលោក។

ឯកឧត្តមបានបន្តថា ក្រុមការងារដែលបានមកកាន់កម្ពុជាដើម្បីជួបពិភាក្សាគ្នាសម្រាប់ដំណើរការសិក្សាត្រៀមរៀបចំសមយុទ្ធនាគមាសឆ្នាំ២០២៦នាឆ្នាំនេះ គឺជាការងារមួយដែលភាគីកងទ័ពទាំងពីរតែងតែបានរៀបចំធ្វើការពិភាក្សាគ្នាឡើងនូវរៀងរាល់ឆ្នាំ មុនពេលដំណើរការជាផ្លូវការនៃសមយុទ្ធនេះ លើការត្រៀមទាំងផែនការ ខ្លឹមសារ អត្ថន័យ និងទីកន្លែង គ្រឿងបំពាក់ ដើម្បីត្រៀមរៀបចំសមយុទ្ធរវាងកងទ័ពទាំងពីរនាឆ្នាំនេះប្រកបដោយលទ្ធផលកាន់តែល្អប្រសើរ។

ចំណែកលោក ជី ហ៊្សាំង បានបញ្ជាក់ថា សមយុទ្ធនាគមាសចិន-កម្ពុជា គឺជានិមិត្តរូបមួយសម្រាប់ការពង្រឹងកិច្ចសហប្រតិបត្តិការរវាងកងទ័ពចិន-កម្ពុជា ហើយក៏ជាគំរូមួយដែលមានឥទ្ធិពលក្នុងសហគមន៍តំបន់ និងអន្តរជាតិ យ៉ាងសំខាន់ផងដែរ។ លោកបន្តថា ចាប់តាំងពីឆ្នាំ២០២៤ មក សមយុទ្ធនាគមាសដែលរៀបចំឡើងដោយប្រទេសងទាំងពីរ កងទ័ពទាំងពីរ គឺសុទ្ធតែមានការចូលរួមពីកងទ័ពជើងគោក កងទ័ពជើងទឹក នឹងកងទ័ពជើងអាកាស។ ថ្នាក់ដឹកនាំជាន់ខ្ពស់កងទ័ពប្រទេសទាំងពីរ មានការយកចិត្តទុកដាក់ក្នុងកម្រិតខ្ពស់លើការរៀបចំធ្វើសមយុទ្ធនាគមាសរវាងចិន-កម្ពុជា ហើយមេដឹកនាំជាន់ខ្ពស់កងទ័ពទាំងពីរ ក៏បានផ្ដល់ការលើកទឹកចិត្ត និងជំរុញឲ្យមានកិច្ចដំណើរការរៀបចំសមយុទ្ធនាគមាស ចិន-កម្ពុជា នៅលើទឹកដីកម្ពុជាជាច្រើនលើកដែលប្រការទាំងនេះ គឺជាការរួមចំណែកយ៉ាងធំធេងជំរុញឲ្យកិច្ចសហប្រតិបត្តិការរៀបចំសមយុទ្ធនាកមាសរវាងកងទ័ពទាំងពីរ ប្រព្រឹត្តទៅដោយភាពរលូន និងទទួលបានកាន់តែជោគជ័យ៕អត្ថបទ៖ វង្ស សុភាព