ការប្រកួតក្រុមភ្លេងកាយរឹទិ្ធថ្នាក់ជាតិលើកទី៣ ឈានដល់វគ្គផ្តាច់ព្រ័ត្រ នៅថ្ងៃនេះ

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួអប់រំ យុវជន និងកីឡា និងជាប្រធានកាយរឹទិ្ធជាតិកម្ពុជា និងឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ នៅព្រឹកថ្ងៃទី១៦ ខែមិថុនា នេះ បានអញ្ជីញជាអធិបតីនៅក្នុងវគ្គប្រកួតផ្តាច់ព្រ័ត្រនៃការប្រកួតក្រុមភ្លេងកាយរឹទិ្ធថ្នាក់ជាតិលើកទី៣ ក្រោមប្រធានបទ “ភ្លេងកាយរឹទិ្ធ ដើម្បីសន្តិភាព និងការអភិវឌ្ឍ” នៅពហុកីឡដ្ឋានជាតិអូឡាំពិក។

លោក ឯម ពិសិដ្ឋ ប្រធាននាយកដ្ឋានសហប្រតិបត្តិការកាយរឹទិ្ធ និងជាប្រធានលេខាធិការ បានធ្វើរបាយការណ៍ជូនអង្គពិធីថា ឆ្នាំ២០២៦ មានក្រុមភ្លេងកាយរឹទិ្ធចុះឈ្មោះចូលរួមប្រកួត ១៣រាជធានី-ខេត្ត និងបន្ទាប់ពីបានឆ្លងកាត់ការប្រកួតជម្រុះ ថ្ងៃទី១៤-១៥ ខែមិថុនា ឆ្នាំ២០២៦ គណៈកម្មការវាយតម្លៃផ្តល់ពិន្ទុ បានរកឃើញក្រុមភ្លេងកាយរឹទិ្ធ ៥ក្រុម ដើម្បីចូលរួមការប្រកួតផ្តាច់ព្រ័ត្រដណ្តើមជ័យលាភីលេខ១ លេខ២ និងលេខ៣ នាព្រឹកនេះ។

ឯកឧត្តមបណ្ឌិតសភាចារ្យ ឧបនាយករដ្ឋមន្រ្តី បានថ្លែងថា ឆ្លើយតបតាមអនុសាសន៍ដ៏ថ្លៃថ្លារបស់ សម្តេច មហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដែលបានថ្លែង នៅក្នុង កិច្ចប្រជុំដំបូងគណៈរដ្ឋមន្រ្តីសម្រាប់នីតិកាលទី៧ នាថ្ងៃទី២៤ ខែសីហា ឆ្នាំ២០២៣ ដោយបានលើក ឡើងអំពីការលើកកម្ពស់គុណភាពអប់រំ ផ្តោតលើការពង្រឹងគុណភាពសាលារៀនរដ្ឋចាប់ពីថ្នាក់មត្តេយ្យ សិក្សាដល់មធ្យមសិក្សា។

ក្នុងន័យនេះ ការអប់រំកាយរឹទិ្ធកម្ម ពិតជាបានដើរតួនាទីយ៉ាងសំខាន់ដល់ការគាំទ្រវិស័យអប់រំ និងសកម្មភាពសិក្សា នៅតាមគ្រឹះស្ថានសិក្សា។ ការបង្កើតក្រុមភ្លេងកាយរឹទិ្ធ បានជួយបង្កើតបរិយាកាសសិក្សាប្រកបដោយវិន័យ សកម្មភាពរស់រវើក និងការច្នៃប្រឌិត។ ក្រុមភ្លេងកាយរឹទិ្ធ មានអត្ថន័យលើសពីសិល្បៈតន្រ្តី ដែលជាវិធីសាស្រ្តអប់រំមួយដ៏មានប្រសិទ្ធភាពក្នុងការអភិវឌ្ឍបុគ្គលិកលក្ខណៈ ការងារជាក្រុម ការគោរពវិន័យ ការទទួលខុសត្រូវ និងភាពជាអ្នកដឹកនាំ។

គួរបញ្ជាក់ដែរថា កម្មវិធីប្រកួតក្រុមភ្លេងកាយរឹទ្ធិកម្ពុជា នៅវគ្គផ្តាច់ព្រ័ត្រនៅព្រឹកថ្ងៃទី១៦ ខែមិថុនានេះ មានក្រុមភ្លេងចំនួន៦រាជធានី-ខេត្ត រួមមាន៖ រាជធានីភ្នំពេញ ខេត្តកណ្តាល ខេត្តព្រះសីហនុ ខេត្តកោះកុង ខេត្តបាត់ដំបង និងខេត្តឧត្តរមានជ័យ៕ អត្ថបទ៖ទូច សោភ័ណ