ប្រតិភូក្រសួងប្រៃសណីយ៍កម្ពុជា ​បង្ហាញពីសមិទ្ធផល​ និង​សក្ដានុពលថ្នាល verify.gov.kh នៅ​វេទិកា​​សេវាសាធារណៈអង្គការ​សហប្រជាជាតិ

ប៊ីលីស៊ី៖ ក្នុងឱកាស​ចូលរួមវេទិកា​សេវាសាធារណៈរបស់​អង្គការ​សហប្រជាជាតិ ឆ្នាំ​២០២៦ ឯកឧត្ដម​ ជា វ៉ាន់ដេត រដ្ឋមន្ត្រីក្រសួងប្រៃសណីយ៍និង​ទូរគមនាគមន៍​ បាន​អញ្ជើញចូលរួមជំនួប​ទ្វេ​ភាគី​ និង​ពិភាក្សា​ការងារ​ជាមួយថ្នាក់ដឹកនាំ​ក្រសួង-ស្ថាប័នមួយចំនួន រួមមានទី១ ឯកឧត្ដម Faquir Mahbub Anam រដ្ឋមន្ត្រីក្រសួង​ប្រៃសណីយ៍ ទូរគមនាគមន៍ និង​បច្ចេកវិទ្យា​ព័ត៌មាន​នៃ​ប្រទេស​បង់ក្លាដេស, ទី២ លោកជំទាវ Tashi Pem ប្រធាន​រាជ​គណៈកម្មការ​មុខងារសាធារណៈ​នៃ​​ប្រទេស​ប៊ុយតង់ និងទី៣ លោក Patrick Duong ប្រធាន​សាកលផ្នែកអភិបាលកិច្ចសម្រាប់​ធន​ធាន​សាធារណៈ​និង​​សេវាសាធារណៈ នៃ​កម្មវិធីអភិវឌ្ឍន៍អង្គការ​សហប្រជាជាតិ (UNDP Governance for Public Goods and Services)។

ក្នុង​ជំនួបជាមួយ​ ឯកឧត្ដម Faquir Anam ឯកឧត្ដម​រដ្ឋមន្ត្រីទាំង​ពីរ​រូប​បាន​ពិភាក្សា​អំពី​វឌ្ឍន​ភាព​ការ​ងារ​​​នៃសំណើ​របស់​ប្រទេស​បង់ក្លាដេស​ក្នុង​ការ​រ​ដាក់ឱ្យ​ប្រើប្រាស់​ថ្នាល verify.gov​ នៅប្រទេស​បង់ក្លាដេស ​និង​ការ​ផ្សព្វផ្សាយ​បន្ត​នៅតំបន់​​អាស៊ីខាងត្បូង។

ក្នុង​ជំនួបជាមួយ​ លោកជំទាវ Tashi Pem ឯកឧត្ដម​រដ្ឋមន្ត្រី​ក៏បាន​ចែករំលែក​អំពី​បទពិសោធ​ជោគជ័យនៃ​ការ​ដាក់ឱ្យ​ប្រើ​ថ្នាល verify.gov.kh ហើយ​ឯកឧត្ដម​រដ្ឋមន្ត្រី​ និង​លោកជំទាវ​បាន​ដោះដូរ​យោបល់​យ៉ាង​ស៊ីជម្រៅ​អំពី​បរិវ​ត្ត​កម្ម​ឌីជីថល​​ក្នុង​វិស័យ​សាធារណៈនៃ​ប្រទេស​ទាំង​ពីរ និង​បាន​ឯកភាពគ្នា​ក្នុងការ​ពិនិត្យលទ្ធភាព​សហការ​។

ក្នុង​កិច្ចប្រជុំជាមួយ UNDP វិញ គណៈប្រតិភូ​ក្រសួង​បានណែនាំឱ្យ​ក្រុមការងារ GPGS ​របស់​ UNDP បាន​ស្គាល់​អំពី​បរិវត្តកម្ម​រដ្ឋាភិបាល​ឌីជីថល​នៅកម្ពុជា ជាពិសេស​សមិទ្ធផល​ទាំង​​កម្រិត​​ជាតិ ​និង​អន្តរជាតិ​នៃ​ថ្នាល verify.gov.kh​។ ភាគីទាំង​ពីរ​បាន​ឯកភាព​សិក្សា​បន្ត​ដើម្បី​ស្វែង​រក​ឱកាស​​សហការ​ផ្ទាល់​ពាក់ព័ន្ធ​នឹង​ថ្នាល verify.gov.kh និង​ការ​កសាង​សមត្ថភាព​បរិវត្ត​កម្ម​ឌីជីថល​។

ក្នុងឱកាសវេទិកាសេវាសាធារណៈនេះដែរ ឯកឧត្ដម ជា សេរីវឌ្ឍ អគ្គលេខាធិការ​នៃ​អគ្គលេខា​ធិការ​ដ្ឋាន​គណៈកម្មាធិការ​រដ្ឋាភិបាល​​ឌីជីថល បាន​ចូលរួម​ជា​វាគ្មិន​ក្នុង​សិក្ខាសាលា​ចំនួន​ពីរលើ​ប្រធាន​បទ “សេវាសាធារណៈឆ្លាតវៃ​៖ កាត់បន្ថយ​ភាពស្មុគស្មាញ” និង ប្រធាន​បទ “ហេដ្ឋារចនា​សម្ព័ន្ធ​​សាធារណៈឌីជីថលសម្រាប់​សេវា​សាធារណៈ”។ ក្នុង​សិក្ខាសាលា​ទាំង​ពីរ​នេះ ឯកឧត្ដម​អគ្គ​លេខា​ធិការ​ បាន​ពន្យល់​អំពី​សមិទ្ធផល​និង​សក្ដានុពល​នៃ​ថ្នាល verify.gov.kh និង​កម្មវិធីទូរសព្ទ DG SuperApp ក្នុង​ការ​បម្រើ​សេវាសាធារណៈឱ្យ​មាន​ភាព​ងាយស្រួល​ ឆាប់រហ័ស សុវត្ថិភាព និង​មានបរិយាបន្ន​ចំពោះ​ប្រជាពលរដ្ឋ​នៅគ្រប់​មូលដ្ឋាន។

គម្រោង​បរិវត្តកម្មឌីជីថល​ទាំង​នេះ ជា​ការ​បំពេញភារកិច្ច​របស់​ក្រសួង​ក្នុង​ការ​អនុវត្ត​វិធានការ​ក្នុង​បញ្ច​កោណទី៥​នៃ​​យុទ្ធសាស្ត្រ​បញ្ចកោណដំណាក់កាលទី១ ក្រោមការ​ដឹកនាំប្រកបដោយ​គតិ​បណ្ឌិត​​​របស់សម្ដេច​មហាបវរធិបតីនាយករដ្ឋមន្ត្រីនៃព្រះរាជាណាចក្រកម្ពុជា។

សូមជម្រាបជូនថា តបតាមការអញ្ជើញរបស់ ឯកឧត្ដម Li Junhua អគ្គលេខាធិការ​រង​អង្គការ​សហ​ប្រ​ជាជាតិ និង ឯកឧត្ដម Paata Salia រដ្ឋមន្ត្រីក្រសួងយុត្តិធម៌​នៃ​ប្រទេស​ហ្ស៊កហ្ស៊ី​ជា​ម្ចាស់​ផ្ទះ ​ឯកឧត្ដម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ ត្រូវ​បាន​អញ្ជើញ​ចូល​រួម​វេទិកា​សេវា​សាធារណៈអង្គការសហប្រជាជាតិ (UN Public Service Forum) នៅក្រុងប៊ីលីស៊ី ប្រទេស​ហ្សក​ហ្ស៊ី ក្រោមអធិបតីភាព ឯកឧត្ដម Irakli Kobakhidze នាយករដ្ឋមន្ត្រីនៃ​ប្រទេស​ហ្សក​ហ្ស៊ី។​ កម្មវិធីនេះមានការចូលរួមពីរដ្ឋមន្ត្រីមកពីជាង២០ប្រទេស និងតំណាង​ជា​អនុរដ្ឋ​មន្ត្រី​ និង​ថ្នាក់​ដឹក​នាំមកពីសមាជិកអង្គការសហប្រជាជាតិជាង១០០ប្រទេស និងអង្គការ​អន្តរជាតិ​ផ្សេងៗ​។

ពិធីបើកវេទិកានេះបាន​រៀបចំនៅថ្ងៃទី២៣ ខែមិថុនា ដែលត្រូវនឹង “ទិវាសេវាសាធារណៈ” របស់​អង្គការ​សហ​ប្រជាជាតិ។ ទិវានេះរៀបចំឡើងជារៀងរាល់ឆ្នាំតាំងពីឆ្នាំ២០០៣មក ដើម្បី​ទទួល​ស្គាល់​តម្លៃ​នៃ​ការ​បម្រើ​សេវា​សាធារណៈជូនប្រជាពលរដ្ឋ ដែលជាមូលដ្ឋានដ៏សំខាន់នៃការអភិវឌ្ឍ​នៅ​គ្រប់​ប្រទេស​លើ​សាកលលោក។ រីឯវេទិកាសេវាសាធារណៈអង្គការសហប្រជាជាតិ ត្រូវបា​ន​ចាប់​ផ្ដើម​រៀប​ចំអ​មទិ​វានេះ ចាប់ពីឆ្នាំ២០០៩មក ដើម្បីឱ្យបណ្ដាប្រទេសរៀនសូត្រ​ពី​បទ​ពិសោធ​គ្នា​ទៅវិ​ញទៅ​មកក្នុងការផ្ដល់សេវាសាធារណៈឱ្យបានល្អប្រសើរ។ ឆ្នាំនេះ ប្រទេសហ្ស៊កហ្ស៊ីត្រូ​វបា​ន​ជ្រើស​រើសជាម្ចាស់ផ្ទះ ដោយសារវឌ្ឍនភាព​ដ៏​គួរ​ឱ្យក​ត់ស​ម្គាល់​ក្នុង​ប្រទេស​ហ្ស៊ក​ហ្ស៊ី​លើ​ផ្នែក​សេវាសា​ធារណៈ ជាលទ្ធផលនៃកំណែទម្រង់ក្នុងរយៈពេលប្រមាណ៤ឆ្នាំចុងក្រោយនេះ។ ក្នុងពិធីនេះ ថ្នាល verify.gov.kh កម្ពុជាក៏បាន​ចូល​រួម​តាំង​បង្ហាញ​ជូន​អ្នក​ចូល​រួម​ពី​គ្រប់​ប្រទេស​បាន​ស្គាល់​ផងដែរ​៕