ដង្កូវហ្វូងកំពុងរាតត្បាតបំផ្លាញ ដំណាំស្រូវ និងដំឡូងមី ប្រជាពលរដ្ឋក្នុងស្រុកចំនួន ៣ នៃខេត្តត្បូងឃ្មុំ

ហ្វូងដង្កូវកំពុងរាតត្បាត ស៊ីបំផ្លាញដំណាំស្រូវ និងដំណាំដំឡូងមី របស់ប្រជាកសិករនៅក្នុងភូមិសាស្ត្រខេត្តត្បូងឃ្មុំ អស់ប្រមាណ៦៧៩ហិកតា (ដំណាំស្រូវ ៥៩០ហិកតា និងដំណាំដំឡូងមី ៨៩ហិកតា) លើស្រុកចំនួន៣ គឺស្រុកត្បូងឃ្មុំ ស្រុកតំបែរ និងស្រុកពញាក្រែក ខណៈករណីត្រូវបាន មន្ត្រីជំនាញនៃមន្ទីរកសិកម្មរុក្ខាប្រមាញ់ និងនេសាទខេត្តត្បូងឃ្មុំ បានចាត់វិធានការទប់ស្កាត់ កម្ចាត់ភ្លាមៗផងដែរបន្ទាប់ពីទទួលបានព័ត៌មានពីប្រជាពលរដ្ឋ។

លោក ហេង ពិសិដ្ឋ ប្រធានមន្ទីរកសិកម្មរុក្ខាប្រមាញ់ និងនេសាទខេត្តត្បូងឃ្មុំ មានប្រសាសន៍ឲ្យដឹងថា បន្ទាប់ពីទទួលព័ត៌មានពីប្រជាកសិករមានករណីវត្តមានដង្កូវហ្វូងស៊ីបំផ្លិចបំផ្លាញដំណាំស្រូវ និងដំណាំដំឡូងមីរបស់ប្រជាកសិករ នៅក្នុងភូមិសាស្រ្តឃុំ ស្រុកមួយចំនួនក្នុងខេត្តត្បូងឃ្មុំភ្លាម មន្ទីរបានចាត់មន្ត្រីចុះស្រាវជ្រាវពិនិត្យ និងវាយតម្លៃឃើញថា ពិតជារងការរាតត្បាតបំផ្លាញ់ពីដង្កូវហ្វូង នៅក្នុងស្រុកពញាក្រែក មាន៤ឃុំ ស្រុកតំបែរមាន៣ឃុំ និងស្រុកត្បូងឃ្មុំ មាន១ឃុំ។

ចំពោះមុខករណីនេះ មន្ត្រីជំនាញបានចុះពន្យល់ណែនាំពីវិធានការទប់ស្កាត់ និងកម្ចាត់ដង្កូវហ្វូងដែលរាតត្បាតបំផ្លាញលើដំណាំស្រូវ និងដំណាំដំឡូងមី ភ្លាមៗ ក្នុងនោះមន្ត្រីជំនាញរបស់មន្ទីបានធ្វើការណែនាំដល់កសិករជាបន្តបន្ទាប់ ដើម្បីចាត់វិធានការកម្ចាត់ ដោយប្រើវិធីសាស្ត្របង្កើតជម្រកសិប្បនិម្មិត និងបាញ់ថ្នាំងសម្លាប់ដង្កូវហ្វូងសម្រេចលើផ្ទៃដីខាងលើ ។

អត្ថបទ: BTV NEWS