លំហូរចរាចរណ៍តាមដងផ្លូវមួយចំនួន ត្រូវបានបញ្ចៀសទិស ដើម្បីសម្រួលដល់កិច្ចប្រជុំកំពូលហ្វ្រង់កូហ្វូនីលើកទី២០ឲ្យប្រព្រឹត្តិទៅដោយរលូន

លំហូរចរាចរណ៍តាមដងផ្លូវមួយចំនួន ក្នុងរាជធានីភ្នំពេញ ត្រូវបានបញ្ចៀសទិស ដើម្បីសម្រួលដល់កិច្ចប្រជុំកំពូលហ្វ្រង់កូហ្វូនី លើកទី២០ អាចប្រព្រឹត្តិទៅដោយភាពរលូន ។

ព្រះរាជាណាចក្រកម្ពុជា នឹងត្រូវធ្វើជាម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនី លើកទី២០ និងព្រឹត្តិការណ៍ ពាក់ព័ន្ធនានា ដែលនឹងប្រព្រឹត្តទៅចាប់ពីថ្ងៃទី១៣ រហូតដល់ថ្ងៃទី១៧ ខែវិច្ឆិកា ឆ្នាំ២០២៦ នៅមជ្ឈមណ្ឌល សន្និបាត និងពិព័រណ៍អន្តរជាតិជ្រោយចង្វារ (CCIC) សណ្ឋាគារ រ៉េស៊ីដង់សុខាភ្នំពេញ មជ្ឈមណ្ឌលសន្និបាត និង ពិព័រណ៍កោះពេជ្រ និងនៅសួនច្បារមុខវត្តបទុមវត្តី នាពេលខាងមុខ។

ទន្ទឹមនឹងព្រឹត្តិការណ៍ដ៏ធំជាប្រវត្តិសាស្ត្រនេះដែរ អាជ្ញាធររាជធានីភ្នំពេញ បានសម្រេចធ្វើការបញ្ចៀសទិសដៅចរាចរណ៍មួយចំនួនធំ ដើម្បីរក្សាសន្តិសុខ សុវត្ថិភាព និងសណ្តាប់ធ្នាប់សាធារណៈ ជូនដល់គណៈប្រតិភូជាតិ និងអន្តរជាតិទាំងអស់ដែលនឹងអញ្ជើញចូលរួមក្នុងកិច្ចប្រជុំកំពូលនេះ ។

ចាប់ពីថ្ងៃទី១២ ដល់ថ្ងៃទី១៧ ខែវិច្ឆិកា ឆ្នាំ២០២៦ រដ្ឋបាលរាជធានីភ្នំពេញ ៖ មិនអនុញ្ញាតឱ្យរថយន្តធុនធ្ងន់គ្រប់ប្រភេទធ្វើចរាចរនៅតាមបណ្ដោយមហាវិថី សម្ដេចតេជោ ប៊ុន សែន ( ផ្លូវ៦០ម៉ែត្រ ) ចាប់ពី ស្ពានអាកាសមរតកតេជោ រហូតដល់ ស្ពានអាកាស សម្ដេចធិបតី ប៊ុន ម៉ាណែត , ចំពោះសាឡង់ដឹកខ្សាច់ និងទូកទេសចរណ៍ពុំអនុញ្ញាតឱ្យចរាចរតាមដងទន្លេសាប និងទន្លេមេគង្គលើ – ចំពោះកំពង់ចម្លងសុខា ត្រូវផ្អាកដំណើរការទាំងស្រុង ក្នុងអំឡុងពេលកិច្ចប្រជុំខាងលើ ។ នៅថ្ងៃទី១៥ ខែវិច្ឆិកា ឆ្នាំ២០២៦ ចំពោះកំពង់ចម្លងអរិយក្សត្រឆ្លងមករាជធានីភ្នំពេញ ត្រូវផ្អាកដំណើរការជាបណ្តោះអាសន្ន ៦៩មហាវិថីព្រះមុនីវង្ស ។

នៅថ្ងៃទី១៣ ខែវិច្ឆិកា ឆ្នាំ២០២៦ រដ្ឋបាលរាជធានីភ្នំពេញ មិនអនុញ្ញាតការធ្វើចរាចរលើកំណាត់មហាវិថី ព្រះសុរាម្រឹត ចាប់ពីរង្វង់មូល វិមានឯករាជ្យ រហូតដល់ស្តុបនាគបាញ់ទឹក, មិនអនុញ្ញាតចរាចរលើកំណាត់មហាវិថី សម្ដេចសុធារស ចាប់ពីស្តុបនាគបាញ់ទឹក រហូតដល់វិថី ឧកញ៉ា ឈុន (ផ្លូវលេខ២៤០) និងមិនអនុញ្ញាតធ្វើចរាចរលើកំណាត់ វិថី ឧកញ៉ា ឈុន (ផ្លូវលេខ២៤០) ចាប់ពីស្តុបសាលសន្និសីទចតុមុខ រហូតដល់ស្តុបរោងដំរី ចាប់ពី វេលាម៉ោង ១៤:០០នាទី រហូតដល់បញ្ចប់កម្មវិធី។ ផុតរយៈពេលហាមឃាត់បណ្តោះអាសន្ននេះ រដ្ឋបាលរាជធានីភ្នំពេញនឹងបើកឱ្យធ្វើចរាចរជាធម្មតាវិញ ។ នៅថ្ងៃទី១៥ និងទី១៦ ខែវិច្ឆិកា ឆ្នាំ២០២៦ មិនអនុញ្ញាតធ្វើចរាចរលើកំណាត់មហាវិថី អូស៊ីអាយស៊ី ចាប់ពីរង្វង់មូលអប្សរា រហូតដល់រង្វង់មូល នាងទេពមច្ឆា , ចំពោះស្ពានបេតុងខ្សែកាបឫស្សីកែវ (ឆ្លងកាត់ទន្លេសាប) ត្រូវបិទការធ្វើចរាចរទាំងស្រុង ក្នុងអំឡុងពេលកិច្ចប្រជុំខាងលើ ។

ពលរដ្ឋ សម្តែងការពេញចិត្តចំពោះការជូមដំណឹងឲ្យបានដឹងមុន និងរីករាយចូលរួមសហការជាមួយ ការពង្វាងទិសចរាចរណ៍នេះ ដើម្បីសម្រួលដល់កិច្ចប្រជុំកំពូល អាចដំណើរការទៅដោយរលូន ។ ទន្ទឹមនឹងនោះ ពលរដ្ឋ ក៏សម្តែងក្តីមោទនភាពក្រៃលែង ដែលកម្ពុជា អាចមានឱកាសធ្វើជាម្ចាស់ផ្ទះរៀបចំកិច្ចប្រជុំកំពូលដ៏ធំបែបនេះ ជាប្រវត្តិសាស្ត្រ ។

គួរជម្រាបថា ៖ កិច្ចប្រជុំកំពូលហ្វ្រង់កូហ្វូនីលើកទី២០ នឹងប្រារព្វឡើងនៅថ្ងៃទី១៥ និង១៦ ខែវិច្ឆិកា ឆ្នាំ២០២៦ ឆាប់ៗខាងមុខ គ្រាដែលកម្ពុជាធ្វើជាម្ចាស់ផ្ទះ នៃការរៀបចំសម្រាប់ឆ្នាំ២០២៦នេះ ក្រោមប្រធានបទ៖ « រួមគ្នាបន្តកសាងសន្តិភាព ដើម្បីវិបុលភាពរួម និងស្ថិរភាពយូរអង្វែង» ៕ អត្ថបទ ៖ លីហេង