សិស្សបឋមសិក្សាថ្នាក់ទី៦ ចាប់ផ្ដើមប្រឡងបញ្ចប់ឆ្នាំ ដើម្បីបន្តសិក្សាអនុវិទ្យាល័យ

សិស្សបឋមសិក្សាថ្នាក់ទី ៦ នៅក្នុងឆ្នាំសិក្សា២០២៤នេះ ចាប់ផ្ដើមប្រឡងតេស្តស្តង់ដាដំណាច់ឆ្នាំ ដើម្បីជ្រើសរើសសិស្សដែលប្រឡងជាប់ អាចឡើងទៅបន្តសិក្សានៅអនុវិទ្យាល័យថ្នាក់ទី៧ ខណៈសិស្សដែលប្រឡងធ្លាក់ត្រូវរៀនត្រួតថ្នាក់ទី៦ដដែល។

ចំពោះក្របខណ្ឌ រាជធានីភ្នំពេញ គ្រប់បឋមសិក្សាទាំងអស់ បានរៀបចំការ​ប្រឡង​តេស្ត​ស្តង់ដា​ដំណាច់​ឆ្នាំ​ថ្នាក់ទី៦ ឡើងថ្នាក់ទី៧ នៅថ្ងៃទី ១៧ ខែកញ្ញា ឆ្នាំ ២០២៤នេះ។ ការ​ប្រឡង​ធ្វើ​ឡើង​រយៈ​ពេល​ពេញមួយថ្ងៃ ជាការទទួលខុសត្រូវ ជាការរៀបចំផ្ទាល់ដោយសាលាបឋមសិក្សានីមួយៗ ទាំង​ការតាក់តែងវិញ្ញាសា ការដំណើរការប្រឡង ក៏ដូចជាការធ្វើកំណែ និងការប្រកាសលទ្ធផល។

លោក សូ ធី ជានាយកសាលាបឋមសិក្សាចតុមុខ លើកឡើងឱ្យដឹងថា ការប្រឡង​នេះ​ជា​ការ​ប្រឡង​សំខាន់ ដែលសិស្សថ្នាក់ទី ៦ទាំងអស់ ត្រូវមានកាតព្វកិច្ចចូលរួមប្រឡងជាដាច់ខាត។ ចំពោះ​លទ្ធផល ក៏ជាការសម្រេចជោគវាសនា ឡើងថ្នាក់ ឬត្រូវរៀនត្រួត​ថ្នាក់​របស់​សិស្ស​នីមួយ​ៗ​ផង​ដែរ។ ការប្រឡងនេះរៀបចំឡើងដូចទៅនឹង ការប្រឡងសញ្ញាបត្របឋមភូមិ ក៏ដូចជាការ​ប្រឡង​សញ្ញាបត្រទុតិយភូមិផងដែរ។

សូមជម្រាបថា ការប្រឡងដែលរៀបចំឡើងនៅថ្ងៃនេះ មាន ៥វិញ្ញាសា។ វិញ្ញាសាទាំងនេះ រួមមាន តែង​សេចក្ដី វិទ្យាសាស្ត្រអនុវត្ត សរសេរតាមអាន គណិតវិទ្យា និងសិក្សាសង្គម។ ក្រសួងអប់រំ យុវជន និងកីឡា បានបញ្ជាក់នៅក្នុងសេចក្ដីណែនាំ ស្ដីពី ការពង្រឹង​យន្តការ​ធ្វើ​តេស្ត​រង្វាយ​តម្លៃ​សិស្ស​នៅ​តាមគ្រឹះស្ថានសិក្សាអប់រំចំណេះដឹងទូទៅសាធារណៈថា សាលារៀនត្រូវ​ធ្វើ​តេស្ត​ស្តង់​ដា​ដំណាច់​កម្រិតបឋមសិក្សា។ វិញ្ញាសា ត្រូវគ្របដណ្តប់ខ្លឹមសារដែលសិស្សបានសិក្សានៅ កម្រិត​បឋម​សិក្សា​កម្រិតខ្ពស់។ គ្រឹះស្ថានមធ្យមសិក្សាបឋមភូមិ ត្រូវយកលទ្ធផល​តេស្ត​ស្តង់ដា​ដំណាច់​កម្រិត​ប​ឋមសិក្សានេះ ធ្វើជា មូលដ្ឋាន ឬលទ្ធផល​សិក្សា​ដើ​ម​ឆ្នាំ​សម្រាប់​កម្រិត​ថ្នាក់​បន្ទាប់​ទៀត​ក្នុង​ការ​រៀ​បចំថ្នាក់រៀន ផែនការ កែលម្អសាលារៀន ផែនការបង្រៀនរបស់គ្រូ ផែនការរៀន​របស់​សិស្ស និងកិច្ចអន្តរាគមន៍ផ្សេងៗ៕ អត្ថបទ៖ គឹម ហុក