កម្ពុជាធ្វើជាម្ចាស់ផ្ទះនៃកិច្ចប្រជុំបណ្តាញវិទ្យាស្ថានការពារជាតិ និងសន្តិសុខអាស៊ាន ដោយមានតំណាងប្រទេសជាង ៤០ចូលរួម

កម្ពុជា បានធ្វើជាម្ចាស់ផ្ទះនៃកិច្ចប្រជុំបណ្តាញវិទ្យាស្ថានការពារជាតិ និងសន្តិសុខអាស៊ាន Network of ASEAN Defence Institutions (NADI) ក្រោមមូលបទ “និម្មាបនកម្ម​សន្តិសុខ​ដែល​កំពុងលេចឡើងនៅអាស៊ីប៉ាស៊ីហ្វិក ផ្តោតលើការវាយតម្លៃផលប៉ះពាល់ និងអនុសាសន៍​សម្រាប់​អាស៊ាន ខណៈកិច្ចប្រជុំ នេះបានធ្វើឡើងនៅខេត្តសៀមរាបចាប់ពីថ្ងៃទី១៨ ដល់ទី២១ ខែកញ្ញា ឆ្នាំ២០២៤នេះ ដែលមានតំណាងប្រទេសចំនួន៤៥ចូលរួម។

ថ្លែងនៅ​ក្នុង​ឱកាសបើកនៃកិច្ចប្រជុំនេះ នាយឧត្តមសេនីយ៍ ណឹម សុវត្ថិ អគ្គនាយក អគ្គ​នាយកដ្ឋាន​នយោបាយ និងកិច្ចការបរទេស និងជាប្រធានឧត្តមមន្ត្រីការពារជាតិកម្ពុជា កិច្ច​ប្រជុំ​NADI ឆ្នាំ២០២៤នេះ នៅកម្ពុជា មានតួនាទីសំខាន់ក្នុងការរៀបចំគោលគំនិត និងទស្សនទាន ពាក់​ព័ន្ធនឹងកាលានុវត្តភាព និងបញ្ហាប្រឈម​ដែល​កើត​ចេញ​ពី​ការរៀបចំ​យន្តការ​សន្តិសុខ​ថ្មីៗ​នៅ​ក្នុង​តំបន់ និងផលប៉ះពាល់ចំពោះមជ្ឈភាពអាស៊ាន សម្រាប់ជាការ​ពិចារណា​ក្នុង​កិច្ច​ប្រជុំ​រដ្ឋមន្ត្រី​ការពារ​ជាតិ​អាស៊ាននៅចុងឆ្នាំ២០២៤។

នាយឧត្តមសេនីយ៍ ណឹម សុវត្ថិ បានលលើកឡើង អំពីបញ្ហាភូមិសាស្ត្រនយោបាយ និងសន្តិសុខ ដោយ​បានបញ្ជាក់ថាប៉ូលនៃមហាអំណាច និងសណ្តាប់​ធ្នាប់​អន្តរជាតិ​ត្រូវ​បាន​ផ្លាស់​ប្តូរ​ដោយ​ផ្អែក​លើ​ការ​កើនឡើង និងការដួលរលំនៃមហាអំណាចក្នុងពិភពលោក និងក្នុងតំបន់ព្រម​ទាំង​ការ​អភិវឌ្ឍ និងអន្តរាគមន៍នៃបច្ចេកវិទ្យា កម្លាំងយោធា និងសេដ្ឋកិច្ចជាដើម។

នាយឧត្តម​សេនីយ៍ បានបន្ថែមទៀតថាបច្ចុប្បន្ន ពិភពលោកបាន​ឈាន​ចូល​ក្នុង​ស្ថាន​ភាព​ពហុប៉ូល ដែលបានជះឥទ្ធិពលយ៉ាងខ្លាំង ឬផ្លាស់ប្តូរ​សណ្តាប់​ធ្នាប់​ពិភព​លោក​នៅ​ក្នុង​រយៈ​ពេល​ថ្មីៗ។ កម្ពុជាគាំទ្ររាល់គំនិតផ្តួចផ្តើម ដែលរក្សាបាននូវសន្តិភាព សន្តិសុខតំបន់ និងពិភពលោក។ តាមរយៈការដឹកនាំរបស់សម្តេចតេជោ ហ៊ុន សែន បានដឹកនាំ​អនុវត្ត​ដោយ​ជោគជ័យ​នូវ«នយោបាយឈ្នះ ឈ្នះ»បានធ្វើឲ្យកម្ពុជាបញ្ចប់សង្រ្គាមស៊ីវិលទាំងស្រុង ទទួលបាន​សុខ​សន្តិភាព និងការឯកភាពជាតិពេញលេញ ហើយបាន​អភិវឌ្ឍ​ប្រទេស​ជាតិ​ដែល​បាន​ឃើញ​ជាក់​ស្តែង​នា​បច្ចុប្បន្ននេះ។

ទន្ទឹមនឹងនេះ ផ្អែកតាមការដឹកនាំរបស់នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ កម្ពុជា​បានបង្ហាញការប្តេជ្ញាចិត្តដើម្បីសម្រេច​បាន​នូវ​ចក្ខុ​វិស័​យ​តំប​ន់​អាស៊ាន​ប្រកប​ដោ​យសន្តិភាពគ្មានសង្គ្រាមស៊ីវិល។ ទស្សនទាននេះគឺជាចំណុចសំខាន់ក្នុងការធ្វើឱ្យតំបន់អាស៊ាន កសាងបាននូវជំនឿទុកចិត្ត និង​លើក​កម្ពស់ឯកភាពអាស៊ាន ជាពិសេសបន្តថែរក្សាបានសន្តិភាពប្រកបដោយសន្តិសុខ និងភាព​សុខ​ដុម​សម្រាប់ប្រជាជាតិអាស៊ានជំនាន់ក្រោយ ក្នុងនាមជាគ្រួសារអាស៊ានតែមួយ៕ អត្ថបទ៖ បាន ចក់